കൊച്ചി: ലോട്ടറിയടിച്ച വിവരമറിഞ്ഞ് ഞെട്ടിയ ഇതരസംസ്ഥാന തൊഴിലാളി ലോട്ടറി ടിക്കറ്റുമായി പൊലീസ് സ്റ്റേഷനില് ഓടിക്കയറി. കൊച്ചിയിലാണ് സംഭവം. കൊല്ക്കത്ത സ്വദേശി എസ് ബദേസിനാണ് ഭാഗ്യം തുണച്ചത്. സ്ത്രീ ശക്തി ലോട്ടറിയുടെ 75 ലക്ഷം രൂപയാണ് ബദേസിന് അടിച്ചത്.
ചോറ്റാനിക്കരയില് റോഡ് ടാറിങ് ജോലിക്കായി എത്തിയതായിരുന്നു ബദേസ്. ലോട്ടറിയുടെ ഒന്നാം സമ്മാനം അടിച്ച കാര്യം അറിഞ്ഞപ്പോള് എന്തുചെയ്യണമെന്നറിയാതെ പകച്ചുപോയ ബദേസ് നേരെ പോലീസ് സ്റ്റേഷനിലെത്തുകയായിരുന്നു. ബദേസിനെ പോലീസ് ഉദ്യോഗസ്ഥര് ആശ്വസിപ്പിക്കുകയും കൃത്യമായ മാര്ഗ നിര്ദ്ദേശങ്ങളും ഉപദേശങ്ങളും നല്കുകയും ചെയ്ത് മടക്കി അയച്ചു.
സംഭവത്തെക്കുറിച്ച് കേരള പൊലീസാണ് ഫെയ്സ്ബുക്കില് കുറിപ്പ് പങ്കുവെച്ചത്. ഭാഗ്യമായി ലഭിച്ച പണവുമായി കൊല്ക്കത്തയിലേക്ക് മടങ്ങാനായി കാത്തിരിക്കുകയാണ് ബദേസ് എന്നും കുറിപ്പില് പറയുന്നു.
കേരള പൊലീസിന്റെ ഫെയ്സ്ബുക്ക് പോസ്റ്റ്
ലോട്ടറി അടിച്ച ഞെട്ടലില് അന്യസംസ്ഥാന തൊഴിലാളി ഓടിയെത്തിയത് പോലീസ് സ്റ്റേഷനിലേക്ക്..!
സ്ത്രീശക്തി ലോട്ടറിയുടെ 75 ലക്ഷം രൂപ ഒന്നാം സമ്മാനം അടിച്ച ഞെട്ടലില് അന്യസംസ്ഥാന തൊഴിലാളി ഓടിയെത്തിയത് മൂവാറ്റുപുഴ പോലീസ് സ്റ്റേഷനിലേക്ക്. കൊല്ക്കത്ത സ്വദേശിയായ എസ്.കെ.ബദേസ് ആണ് ലോട്ടറി അടിച്ച പരിഭ്രാന്തിയില് പോലീസിന്റെ സഹായം തേടിയെത്തിയത്.
ഒന്നാം സമ്മാനം അടിച്ച കാര്യം അറിഞ്ഞപ്പോള് എന്തുചെയ്യണമെന്നറിയാതെ പകച്ചുപോയ ബദേസ് നേരെ പോലീസ് സ്റ്റേഷനിലെത്തി പോലീസുദ്യോഗസ്ഥരോട് കാര്യം പറഞ്ഞു. ആരെങ്കിലും തന്റെ കയ്യില് നിന്നും ലോട്ടറി തട്ടിയെടുക്കുമോ എന്ന ആശങ്കയിലായിരുന്ന ബദേസിനെ പോലീസ് ഉദ്യോഗസ്ഥര് ആശ്വസിപ്പിക്കുകയും കൃത്യമായ മാര്ഗ്ഗ നിര്ദ്ദേശങ്ങളും ഉപദേശങ്ങളും നല്കുകയും ചെയ്തു.
റോഡ് ടാറിങ് ജോലിക്കായി ചോറ്റാനിക്കരയിലെത്തിയപ്പോഴാണ് ഇയാള് ലോട്ടറി എടുത്തത്. ഭാഗ്യമായി ലഭിച്ച പണവുമായി കൊല്ക്കത്തയിലേക്ക് മടങ്ങാനായി കാത്തിരിക്കുകയാണ് ബദേസ്.
Discussion about this post