കൊച്ചി: ബ്രസീലിന്റെ തോല്വി താങ്ങാനാകാത്തതിനെ തുടര്ന്ന് തലച്ചോറില് രക്തം കട്ടപിടിച്ച് യുവ ഫുട്ബോളര് ഗുരുതരാവസ്ഥയില് ആശുപത്രിയില്. കടുത്ത ബ്രസീല് ആരാധകനും വിവിധ ക്ലബ്ബുകള്ക്കുവേണ്ടി കളിക്കുകയും ചെയ്യുന്ന കാക്കനാട് പാറക്കമുകള് കളപ്പുരക്കല് കെപി അക്ഷയ് (23) ആണ് ലോകകപ്പില് ബ്രസീല് പുറത്തായതിനെ തുടര്ന്ന് അബോധാവസ്ഥയിലായത്.
ക്രൊയേഷ്യയ്ക്കെതിരെയുള്ള ഫുട്ബോള് ലോകകപ്പ് മത്സരത്തില് ബ്രസീലിന്റെ തോല്വിയെ തുടര്ന്ന് അമിത രക്തസമ്മര്ദം മൂലം തലച്ചോറില് രക്തം കട്ടപിടിച്ചാണ് യുവ ഫുട്ബോളര് അക്ഷയ് ഗുരുതരാവസ്ഥയില് ആശുപത്രിയില് ചികിത്സയില് കഴിയുന്നത്.
ബ്രസീല്-ക്രൊയേഷ്യ ക്വാര്ട്ടര് ഫൈനല് മത്സരം സുഹൃത്തുക്കള്ക്കൊപ്പം സ്ക്രീനില് കാണുമ്പോള് അക്ഷയ് കുഴഞ്ഞുവീഴുകയായിരുന്നു. ക്ഷീണം മാറാനായി ബിഗ് സ്ക്രീന് വച്ചിരുന്ന പ്രദേശത്തുതന്നെ കിടന്ന അക്ഷയ് രാവിലെയായിട്ടും വിളിച്ചിട്ട് എഴുന്നേല്ക്കാതിരുന്നപ്പോഴാണ് ആശുപത്രിയില് എത്തിച്ചത്.
ചികിത്സയ്ക്കായി 17.50 ലക്ഷം രൂപ വേണ്ടിവരുമെന്നാണ് ഡോക്ടര്മാര് അറിയിച്ചത്. ഓണ്ലൈന് കമ്പനിയിലെ ഡെലിവറി ബോയ് ആയിരുന്നു അക്ഷയ്. അച്ഛന് കെടി പുരുഷോത്തമന് കൂലിവേലക്കാരനാണ്. അമ്മ ജയയും വിദ്യാര്ത്ഥിയായ സഹോദരനും അടങ്ങുന്നതാണ് കുടുംബം.
നിര്ധനകുടുംബത്തെ സഹായിക്കാന് പി എ വേലായുധന് ചെയര്മാനും അനില്കുമാര് കണ്വീനറും പി ഐ ജെയിന് ട്രഷററുമായി സഹായനിധി രൂപീകരിച്ചു. സൗത്ത് ഇന്ത്യന് ബാങ്കിന്റെ കാക്കനാട് രാജഗിരി വാലി ശാഖയിലാണ് അക്കൗണ്ട് തുറന്നത്. സുമനസുള്ളവര് യുവ കായിക താരത്തെ സഹായിക്കണം.
അക്കൗണ്ട് നമ്പര്: 0587053000008842, ഐഎഫ്എസ്സി കോഡ്: എസ്ഐബിഎല് 0000587, ഗൂഗിള് പേ നമ്പര്: 9946902955
Discussion about this post