കൊച്ചി: നടിയെ ആക്രമിച്ച കേസില് ഒന്നാം പ്രതി പള്സര് സുനി എന്ന സുനില് കുമാര് നടന് ദിലീപിന് എഴുതിയ കത്ത് പുറത്ത്. ദിലീപിനെ ഗുരുതര ആരോപണങ്ങള് ആരോപണങ്ങള് ഉന്നയിക്കുന്ന കത്തില് നടിയെ ആക്രമിച്ചതിന് പിന്നില് ദിലീപാണെന്ന് വ്യക്തമായി എഴുതിയിട്ടുണ്ട്. പള്സര് സുനിയുടെ അമ്മയാണ് നിര്ണായക വെളിപ്പെടുത്തല് നടത്തിയിരിക്കുന്നത്. റിപ്പോര്ട്ടര് ടിവിയോടാണ് അവര് ഇക്കാര്യം പറഞ്ഞത്.
2018 മെയ് മാസത്തില് എഴുതിയ കത്താണിത്. പള്സര് സുനി ഈ ഈ കത്ത് തന്റെ അമ്മയ്ക്ക് സൂക്ഷിക്കാന് ഏല്പ്പിച്ചതായിരുന്നു. തനിക്കെന്തെങ്കിലും സംഭവിച്ചാല് കത്ത് പുറത്തു വിടണമെന്ന് അമ്മയോട് പള്സര് സുനി പറഞ്ഞിരുന്നു. ഈ കത്താണിപ്പോള് പുറത്തു വന്നിരിക്കുന്നത്.
നടിയെ ആക്രമിക്കുന്നതിന് മുമ്പ് മാസങ്ങള് നീണ്ട ഗൂഢാലോചന നടന്നെന്നും ഗൂഢാലോചനയില് ദിലീപിനൊപ്പം പലരും പങ്കാളികളായിട്ടുണ്ടെന്നും അവര് പറഞ്ഞു.
2015 മുതലാണ് ഗൂഢാലോചന നടക്കുന്നത്. കൃത്യം നടത്തുന്നതിന് വേണ്ടി കോടി കണക്കിന് രൂപ പള്സര് സുനിക്ക് ദിലീപ് വാഗ്ദാനം ചെയ്തെന്നും അമ്മ പറഞ്ഞു.
കേസില് തന്നെ കുടുക്കിയാല് തനിക്കറിയാവുന്ന കാര്യങ്ങളെല്ലാം പുറത്തറിയിക്കുമെന്നും കത്തില് പറയുന്നുണ്ട്. പ്രതികളെയും സാക്ഷികളെയും എല്ലാം വിലയ്ക്കെടുത്താലും സത്യം അറിയാവുന്നവര് എല്ലാം എന്നും മൂടി വെക്കുമെന്ന് കരുതുന്നത് മണ്ടത്തരമാണെന്നും കത്തില് പറയുന്നു.
‘എനിക്ക് ശിക്ഷ കിട്ടിയാലും പരിഭവമോ വിഷമമോ ഇല്ല. കാരണം താന് തെറ്റ് ചെയ്തിട്ടുണ്ട്. പക്ഷെ അത് എനിക്ക് വേണ്ടിയല്ല എന്നെങ്കിലും ഓര്ക്കണം. മൂന്ന് വര്ഷം മുമ്പ് പറഞ്ഞ കാര്യം പുറത്ത് പറഞ്ഞാല് ജനം ആരാധിക്കുകയില്ല. തല്ലിക്കൊല്ലും. സ്വന്തം കുഴി ചേട്ടന് തന്നെ തോണ്ടിയതല്ലേ,’ കത്തില് പറയുന്നു.
‘യജമാനന് നായയെ പോറ്റുന്നത് വിശ്വസ്തനായ കാവല്ക്കാരനായതിനാലാണ്. യജമാനനോടുള്ള സ്നേഹത്താല് മുരളുകയും കുരക്കുകയും ചെയ്യും. പക്ഷെ അതിനെക്കൊണ്ട് ഇനി ആവശ്യമില്ലെന്ന് കണ്ടാല് ഒന്നിനും പറ്റില്ലെന്ന് കണ്ടാല് കൊല്ലുകയോ ഉപേക്ഷിക്കുകയോ ചെയ്യും. ഇതറിയാവുന്ന ഞാന് എല്ലാം കോടതിയില് തുറന്ന് പറഞ്ഞ് ചെയ്ത തെറ്റിന് മാപ്പിരന്ന് കിട്ടാവുന്ന ശിക്ഷ വാങ്ങി അനുഭവിച്ച് തീര്ക്കാം,’ കത്തില് പറയുന്നു.
കേസിലെ മറ്റൊരു പ്രതിയായ വിജേഷ് ആത്മഹത്യയ്ക്ക് ശ്രമിച്ച സംഭവത്തിലും ദുരൂഹതയുണ്ടെന്ന് അമ്മ കൂട്ടിച്ചേര്ത്തു. ഇനിയെങ്കിലും ഇക്കാര്യങ്ങള് പുറത്ത് പറഞ്ഞില്ലെങ്കില് മകന്റെ ജീവന് അപായപ്പെട്ടേക്കുമെന്ന ഭയമുണ്ടെന്നും അവര് പറഞ്ഞു.
ജനുവരി 20നകം അന്വേഷണ റിപ്പോര്ട്ട് സമര്പ്പിക്കാനാണ് കോടതി നിര്ദേശം. ഇതിന്റെ അടിസ്ഥാനത്തില് കേസില് തുടരന്വേഷണം പോലീസ് വേഗത്തിലാക്കിയിട്ടുണ്ട്. കേസില് പള്സര് സുനിയെയും നടന് ദിലീപിനെയും അന്വേഷണസംഘം വീണ്ടും ചോദ്യം ചെയ്തേക്കും. വിയ്യൂര് ജയിലിലുള്ള പള്സര് സുനിയെ ചോദ്യം ചെയ്തതിന് ശേഷമായിരിക്കും ദിലീപിനെ ചോദ്യം ചെയ്യുക.
തുടരന്വേഷണത്തിന്റെ ഭാഗമായി കഴിഞ്ഞ ദിവസം സംവിധായകന് ബാലചന്ദ്രകുമാറില് നിന്ന് അന്വേഷണസംഘം മൊഴിയെടുത്തിരുന്നു. ഈ മൊഴികളും മൊബൈല്ഫോണ് അടക്കമുള്ള തൊണ്ടിമുതലുകളും കോടതിയില് സമര്പ്പിക്കുകയും ചെയ്തു.
ദിലീപും പള്സര് സുനിയും തമ്മില് അടുത്ത ബന്ധമുണ്ടെന്നാണ് ബാലചന്ദ്രകുമാര് വെളിപ്പെടുത്തിയിരുന്നത്. ഈ സാഹചര്യത്തിലാണ് സുനിയെയും ദിലീപിനെയും ചോദ്യം ചെയ്യാനുള്ള നടപടികളിലേക്ക് അന്വേഷണ സംഘം നീങ്ങുന്നത്.
നിലവില് വിയ്യൂര് ജയിലില് കഴിയുന്ന പള്സര് സുനിയെ ചോദ്യം ചെയ്യാനായി പൊലീസ് സംഘം ആദ്യം കോടതിയില് അപേക്ഷ നല്കും. ഇതിനുശേഷമായിരിക്കും ദിലീപിനെ ചോദ്യം ചെയ്യുക. അതിനിടെ, തുടരന്വേഷണത്തിന് പ്രത്യേക സംഘത്തെ നിയോഗിക്കാനും സാധ്യതയുണ്ട്. സംസ്ഥാന പോലീസ് മേധാവി ഇതുസംബന്ധിച്ച് തീരുമാനമെടുക്കുമെന്നാണ് സൂചന.
Discussion about this post