ആലപ്പുഴ: കുട്ടനാട് പുളിങ്കുന്ന് ജങ്കാര്‍ ജട്ടിക്ക് സമീപത്തെ ബേക്കറിയില്‍ ഇന്ന് പുലര്‍ച്ചെയാണ് ശക്തമായ സ്‌ഫോടനം ഉണ്ടായത്. രാവിലെ അഞ്ച് മണിയോടെയായിരുന്നു സംഭവം. സ്‌ഫോടനത്തെ തുടര്‍ന്ന് കടയുടെ നാല് ഷട്ടറുകള്‍ തകര്‍ന്നു. കടയുടെ പിറകിലെ ഭിത്തിയും പൂര്‍ണ്ണമായും തകര്‍ന്നു. എന്നാല്‍ ബേക്കറിയില്‍ ഉണ്ടായിരുന്ന പാചകവാതക സിലിണ്ടറിന് കേടുപാടുകളില്ല.
കടയിലെ ഫ്രീസറിനോ കംപ്രസറിനോ ഒന്നും കേടുപാടുകളില്ല. മറ്റെന്താണ് പൊട്ടിത്തെറിച്ചതെന്ന് തിരിച്ചറിഞ്ഞിട്ടില്ല. ശക്തമായ സ്‌ഫോടനത്തെ തുടര്‍ന്ന് ബേക്കറിയിലെ സാധനങ്ങള്‍ മീറ്ററുകള്‍ ദൂരത്തേക്ക് തെറിച്ചു പോയി. കിലോമീറ്ററുകളോളം ദൂരം സ്‌ഫോടനത്തിന്റെ ശബ്ദം കേട്ടതായി നാട്ടുകാര്‍ പറഞ്ഞു. പൊട്ടിത്തെറിയുടെ കാരണം എന്താണെന്ന് വ്യക്തമല്ലെന്ന് പോലീസ് അറിയിച്ചു. ഫോറന്‍സിക്ക് വിദഗ്ധര്‍ സംഭവസ്ഥലത്തേക്ക് തിരിച്ചിട്ടുണ്ട്.
