ഹരിപ്പാട്: ദേശീയപാതയില് നങ്ങ്യാര്കുളങ്ങര കവലയ്ക്കു സമീപം കാറും ലോറിയും കൂട്ടിയിടിച്ചു. അപകടത്തില് ഒരു കുട്ടി ഉള്പ്പടെ നാലു പേരാണ് മരണപ്പെട്ടത്. കാര്യാത്രക്കാരും കായംകുളം സ്വദേശികളുമായ സെമീന മന്സിലില് കുഞ്ഞുമോന്റെ മകന് റിയാസ്(26), ഐഷാ ഫാത്തിമ(25), ബിലാല്(5), ഉണ്ണിക്കുട്ടന് എന്നിവരാണ് മരിച്ചത്.
ശനിയാഴ്ച പുലര്ച്ചെ 3.50-ഓടെയാണ് അതിദാരുണമായ അപകടം നടന്നത്. കാറില് ആറുപേരുണ്ടായിരുന്നെന്നാണ് വിവരം. ഗുരുതരമായി പരിക്കേറ്റ രണ്ടുപേരെ വണ്ടാനം മെഡിക്കല് കോളേജില് പ്രവേശിപ്പിച്ചിരിക്കുകയാണ്. ഇവരുടെ നില അതീവഗുരുതരമാണെന്നാണ് ലഭിക്കുന്ന വിവരം. ഇടിയുടെ ആഘാതത്തില് കാര് പൂര്ണമായും തകര്ന്നിട്ടുണ്ട്.
ഫയര്ഫോഴ്സും പോലീസും ചേര്ന്ന് കാര് വെട്ടിപ്പൊളിച്ചാണ് ഉള്ളിലുണ്ടായിരുന്നവരെ പുറത്തെടുത്ത് ആശുപത്രിയിലെത്തിച്ചത്. കായംകുളത്തുനിന്ന് എറണാകുളത്തേക്ക് പോയ ഇന്നോവ കാര് എതിര്ദിശയില്നിന്ന് വന്ന ലോറിയുമായി കൂട്ടിയിടിക്കുകയായിരുന്നു. കാര് അമിതവേഗത്തിലായിരുന്നുവെന്നാണ് ലഭിക്കുന്ന വിവരം.
Discussion about this post