കോഴിക്കോട്: നിയമസഭാ തെരഞ്ഞെടുപ്പിലെ ബിജെപിയുടെ ദയനീയ തോല്വിയുടെ ഉത്തരവാദിത്തം ഏറ്റെടുക്കുന്നെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്.
പരാജയത്തിന്റെ പ്രാഥമിക ഉത്തരവാദിത്വം തനിക്ക് തന്നെയാണ്.
കോന്നിയില് മത്സരിച്ചിരുന്നില്ലെങ്കില് മഞ്ചേശ്വരത്ത് വിജയിക്കുമായിരുന്നു. രണ്ടിടത്തും മത്സരിക്കേണ്ടെന്നായിരുന്നു വ്യക്തിപരമായ തന്റെ ആഗ്രഹമെന്നും അത് നേരത്തെ തുറന്നു പറഞ്ഞതാണെന്നും സുരേന്ദ്രന് കോഴിക്കോട് വാര്ത്താസമ്മേളനത്തില് പറഞ്ഞു.
താന് പാര്ട്ടിക്ക് വിധേയനാണ്. പാര്ട്ടി ശാസനകള് അനുസരിക്കുക മാത്രമാണ് ചെയ്തത്. രണ്ടിടത്ത് മല്സരിക്കാന് ആഗ്രഹിച്ചിരുന്നില്ലെന്നും കേന്ദ്രനേതൃത്വം പറഞ്ഞത് അനുസരിക്കുക മാത്രമാണ് ചെയ്തതെന്നും സുരേന്ദ്രന് വ്യക്തമാക്കി.
മഞ്ചേശ്വരത്ത് രണ്ടാം സ്ഥാനത്തെത്തിയെങ്കിലും കോന്നിയില് സുരേന്ദ്രന് മൂന്നാമതായി. സംസ്ഥാനത്ത് രണ്ട് മണ്ഡലങ്ങളിലും മത്സരിച്ച് തോല്ക്കുന്ന ആദ്യത്തെ നേതാവാണ് സുരേന്ദ്രന്.
രണ്ടിടത്തും മത്സരിക്കേണ്ടെന്നായിരുന്നു വ്യക്തിപരമായ എന്റെ ആഗ്രഹം, അത് ഞാന് തുറന്നു പറഞ്ഞതാണ്. രണ്ടു മണ്ഡലങ്ങളില് മത്സരിച്ചത് കൊണ്ട് സംസ്ഥാനത്തെ ആകെ പ്രവര്ത്തനങ്ങളെ ബാധിച്ചെന്ന് കരുതുന്നില്ല. ചിലപ്പോള് രണ്ടിടത്ത് മത്സരിച്ചിരുന്നില്ലെങ്കില് മഞ്ചേശ്വരത്ത് വിജയിക്കുമായിരുന്നെന്ന് വിലയിരുത്തുന്നവരുണ്ട്. ഇങ്ങനെ കരുതുന്നവരോട് ഞാന് വിയോജിപ്പ് പ്രകടിപ്പിക്കുന്നില്ല-സുരേന്ദ്രന് പറഞ്ഞു”
കഴിഞ്ഞ ഒരു വര്ഷമായി സംസ്ഥാനത്ത് ബിജെപിയെ നയിക്കുന്നത് ഞാനാണ്. പരാജയത്തിന്റെ പ്രാഥമിക ഉത്തരവാദിത്വം എനിക്ക് തന്നെയാണ്. തോല്വിയെക്കുറിച്ച് വിശദമായി പാര്ട്ടി ചര്ച്ച ചെയ്തിട്ടുണ്ട്. എനിക്ക് പറയാനുള്ളത് കേന്ദ്രനേതൃത്വത്തെ ധരിപ്പിച്ചിട്ടുണ്ട്. ബാക്കി കാര്യങ്ങളെല്ലാം തീരുമാനിക്കേണ്ടത് അവരാണ്. രാഷ്ട്രീയമായും സംഘടനാപരമായും സംഭവിച്ച പിഴവുകള് വിശദമായ വിലയിരുത്തും. തുടര്ന്ന് ആവശ്യമായ തിരുത്തില് നടപടികള് സ്വീകരിക്കും. ഒരു സീറ്റു പോയി. എന്ത് വേണമെങ്കിലും പാര്ട്ടി തീരുമാനിക്കാമെന്ന് ഞാന് പറഞ്ഞിട്ടുണ്ട്- സുരേന്ദ്രന് പറഞ്ഞു.
Discussion about this post