കൊച്ചി: അന്തരിച്ച സംവിധായകനും തിരക്കഥാകൃത്തുമായ സച്ചിദാനന്ദനെന്ന സച്ചിയെ ഓർമ്മിച്ചുള്ള കുറിപ്പാണ് ഇന്ന് മുങ്ങിമരിച്ച നടൻ അനിൽ നെടുമങ്ങാട് അവസാനമായി സോഷ്യൽമീഡിയയിൽ പങ്കുവെച്ചത്. അതും മരണം വരെ തന്റെ ഫേസ്ബുക്ക് കവർചിത്രം സച്ചിയായിരിക്കുമെന്ന വരി കൂടി ചേർത്തായിരുന്നു അനിലിന്റെ കുറിപ്പ്. എന്നാൽ ഈ കുറിപ്പ് ഫേസ്ബുക്കിലൂടെ പങ്കുവെച്ചതിന് പിന്നാലെ അനിലിനെ മരണം കവർന്നെടുത്തത് സോഷ്യൽമീഡിയയ്ക്ക് ഇനിയും വിശ്വസിക്കാനായിട്ടില്ല.
‘ഞാനും മരിക്കുവോളം ഫേസ്ബുക്കിലെ കവർ ഫോട്ടോയായിട്ട് നിങ്ങളിങ്ങനെ.’ എന്നായിരുന്നു സച്ചിയെ ഓർമ്മിക്കുന്ന പോസ്റ്റിലെ ഒരുവരി. ഈ പോസ്റ്റിട്ട് മൂന്നു മണിക്കൂറിനകമായിരുന്നു അനിൽ മലങ്കര ഡാമിലെ കയത്തിൽ അകപ്പെട്ട് മുങ്ങിമരിച്ചത്.
ടിവി അവതാരകനായി തിളങ്ങിയ അനിൽ നെടുമങ്ങാട് ഒരുപാട് ചിത്രങ്ങളിൽ ചെറുതും വലുതുമായ വേഷങ്ങൾ ചെയ്തതിനു ശേഷം കമ്മട്ടിപാടത്തിലെ നെഗറ്റീവ് കഥാപാത്രത്തിലൂടെയാണ് ഏറെ ചർച്ചചെയ്യപ്പെട്ടത്. പിന്നീട് അദ്ദേഹത്തിന്റെ അഭിനയ ജീവിതത്തിലെ തന്നെ വഴിത്തിരിവായാണ് അയ്യപ്പനും കോശിയും എന്ന സച്ചി ചിത്രത്തിലെ പോലീസ് വേഷം തേടിയെത്തിയത്. ഇതേറെ ചർച്ചചെയ്യപ്പെട്ടിരുന്നു. സച്ചിയുടെ വിയോഗത്തിന് പിന്നാലെ അനിൽ നെടുമങ്ങാടും വിടവാങ്ങിയത് സിനിമാലോകത്തെ കണ്ണീരിലാഴ്ത്തിയിരിക്കുകയാണ്.
ഇന്ന് വൈകുന്നേരം ആറ് മണിയോടടുത്ത് തൊടുപുഴ മലങ്കര ഡാമിലാണ് അനിൽ നെടുമങ്ങാടിന്റെ ജീവൻ കവർന്ന അപകടമുണ്ടായത്. ഡാമിൽ കുളിക്കാനിറങ്ങിയതിനിടെ അദ്ദേഹം കയത്തിൽ അകപ്പെടുകയായിരുന്നു എന്നാണ് വിവരം.
ജോജു ജോർജ്ജ് നായകനായ സിനിമയുടെ ഷൂട്ടിങ്ങിനായാണ് അനിൽ ഇവിടേയ്ക്ക് എത്തിയത്. സിനിമയുടെ ഷൂട്ടിങ് ഇടവേളയ്ക്കിടയിൽ തൊട്ടടുത്തുള്ള ഡാമിൽ കുളിക്കാനിറങ്ങിയ അനിൽ കയത്തിൽപ്പെടുകയായിരുന്നു. മൃതദേഹം സ്വകാര്യ ആശുപത്രിയിലെത്തിച്ചു. ആശുപത്രിയിലെത്തിക്കുമ്പോൾ തന്നെ മരണപ്പെട്ടിരുന്നുവെന്നാണ് വിവരം. മൃതദേഹം ജില്ലാ ആശുപത്രിയിലേക്ക് മാറ്റും.
സച്ചിയെ അനുസ്മരിച്ച് അനിൽ നെടുമങ്ങാട് കുറിച്ച ഫേസ്ബുക്ക് പോസ്റ്റ്:
ഈ ദിവസം ഇങ്ങേരെ കുറിച്ചാണ് എഴുതേണ്ടത് .. ഒന്നും എഴുതാനും കഴിയുന്നില്ല. ഞാനും മരിക്കുവോളം എഫ് ബി യിലെ കവർ ഫോട്ടോയായിട്ട് നിങ്ങളിങ്ങിനെ …. ഷൂട്ടിനിടയിൽ ഒരു ദിവസം എന്റെതല്ലാത്ത കുറ്റം കൊണ്ട് എത്താൻ ലേറ്റായപ്പോ കുറച്ച് സെക്കന്റ് എന്റെ കണ്ണിൽ നോക്കിയിരുന്നിട്ട് നീയും സ്റ്റാറായി അല്ലേ .? ഞാൻ പറഞ്ഞു ആയില്ല ആവാം .ചേട്ടൻ വിചാരിച്ചാൽ ഞാൻ ആവാം….സിഐ സതീഷ് എന്ന കഥാപാത്രത്തിനെ സച്ചിച്ചേട്ടനെ ഞാൻ നിരീക്ഷിച്ച് അവതരിപ്പിച്ചതാണ് .സച്ചിയുടെ സംസാരവും പെരുമാറ്റവും ഒക്കെ ഞാൻ ചേട്ടനോട് പറയാതെ അനുകരിക്കുകയായിരുന്നു .
ഈ ദിവസം ഇങ്ങേരെ കുറിച്ചാണ് എഴുതേണ്ടത് .. ഒന്നും എഴുതാനും കഴിയുന്നില്ല. ഞാനും മരിക്കുവോളം എഫ് ബി യിലെ കവർ ഫോട്ടോയായിട്ട്…
Posted by Anil P. Nedumangad on Thursday, 24 December 2020
Discussion about this post