കോട്ടയം: മോഷണ ശ്രമത്തിനിടെ കിട്ടിയ പോത്തിനെ വാഹനത്തില്‍ കെട്ടിവലിച്ച് മോഷ്ടാക്കള്‍. ഈ ദാരുണ സംഭവം നടന്നത് കോട്ടയം ജില്ലയിലെ തീക്കോയി ഒറ്റയിട്ടിയിലാണ്. വഴിയരികില്‍ കെട്ടിയിട്ടിരുന്ന പോത്തിനെ വാഹനത്തില്‍ കെട്ടി വലിച്ച് കൊണ്ടുപോവാനായിരുന്നു ശ്രമം.
വെള്ളാതോട്ടത്തില്‍ ജോജിയുടെ പോത്തിനെയാണ് മോഷ്ടിക്കാന്‍ ശ്രമിച്ചത്. മോഷ്ടാക്കള്‍ പോത്തിനെ വാഹനത്തില്‍ കയറ്റാനായി ശ്രമിച്ചിരുന്നു. എന്നാല്‍ പോത്തിന്റെ ഭാരം കാരണം അത് സാധിച്ചില്ല. ഇതോടെ വാഹനത്തില്‍ കെട്ടി വലിക്കുകയായിരുന്നു.
അര കിലോമീറ്ററോളം പോത്തിനെ വാഹനത്തില്‍ കെട്ടി വലിച്ച് കൊണ്ടുപോയതിന് ശേഷം ഉപേക്ഷിച്ച് സംഘം കടന്നു. പോത്തിന് ഗുരുതര പരിക്കുകളേറ്റിട്ടുണ്ട്. പോത്തിനെ കെട്ടി വലിക്കുന്ന വാഹനത്തിന്റെ ദൃശ്യങ്ങള്‍ സിസിസിടിവിയില്‍ പതിഞ്ഞിട്ടുണ്ട്.
മൃഗങ്ങളോടുള്ള മനുഷ്യന്റെ ക്രൂരതയ്ക്ക് അവസാനമില്ല. നായയെ കഴുത്തില്‍ക്കുരുക്കിട്ട് കാറില്‍ കെട്ടിവലിച്ച് കൊടുംക്രൂരതയുടെ ഞെട്ടലില്‍ നിന്നും ഇനിയും മലയാളികള്‍ മോചിതരായിട്ടില്ല. അതിനിടെയാണ് മറ്റൊരു മിണ്ടാപ്രാണിയോടുള്ള കണ്ണില്ലാത്ത ക്രൂരത.
നെടുമ്പാശേരി അത്താണിക്കുസമീപം ചാലാക്കയിലാണ് നായയെ കാറിന്റെ പുറകില്‍ കെട്ടി വലിച്ച സംഭവം നടന്നത്. ബൈക്ക് യാത്രക്കാരനായ യുവാവ് മൊബൈല്‍ ഫോണില്‍ പകര്‍ത്തിയ ദൃശ്യങ്ങള്‍ സമൂഹമാധ്യമങ്ങളില്‍ വൈറലായിയിരുന്നു. ടാക്‌സികാറിലാണ് നായയെ കെട്ടിവലിച്ചത്.
വേഗത്തില്‍ പോകുന്ന കാറിന് പിന്നിലാണ് നായയെ കെട്ടി വലിച്ച് കൊടും ക്രൂരത നടന്നത്. വെയിലത്ത് ടാറിട്ട റോഡിലൂടെ കാറിന് പിന്നാലെ നായ ഓടുന്നതാണ് ദൃശ്യങ്ങള്‍. ഇതിന് പിന്നാലെ ക്രൂരത ചെയ്തയാള്‍ക്കെതിരെ പോലീസ് നടപടി സ്വീകരിച്ചിരുന്നു.
