തിരുവനന്തപുരം: സിസ്റ്റര് അഭയ കൊലക്കേസിലെ നിര്ണായക ശിക്ഷ വിധി ഇന്ന്. തിരുവനന്തപുരം പ്രത്യേക സിബിഐ കോടതിയാണ് ശിക്ഷ വിധിക്കുക. കോടതി കുറ്റക്കാരെന്ന് കണ്ടെത്തിയ ഫാ. തോമസ് എം കോട്ടൂരിനും സിസ്റ്റര് സെഫിയ്ക്കുമെതിരായ ശിക്ഷയാണ് കോടതി ഇന്ന് വിധിക്കുക. 28 വര്ഷത്തിന് ശേഷമാണ് കേസില് വിധി വരുന്നത്.
കഴിഞ്ഞ ദിവസമാണ് സിസ്റ്റര് അഭയ കൊല്ലപ്പെട്ട കേസില് പ്രതികളായ ഫാ. തോമസ് എം. കോട്ടൂര്, സിസ്റ്റര് സെഫി എന്നിവര് കുറ്റക്കാരാണെന്ന് പ്രത്യേക സിബിഐ കോടതി വിധി പറഞ്ഞത്. രണ്ടു പ്രതികള്ക്കുമെതിരായ കൊലക്കുറ്റവും തെളിവ് നശിപ്പിക്കല് കുറ്റവും കോടതി ശരിവെച്ചു. പ്രതികള് തമ്മിലുള്ള ശാരീരികബന്ധം സിസ്റ്റര് അഭയ നേരിട്ട് കണ്ടതിനെത്തുടര്ന്ന് ഇരുവരും ചേര്ന്ന് അഭയയെ തലയ്ക്കടിച്ചു വീഴ്ത്തി കിണറ്റിലിട്ടുവെന്നാണ് സിബിഐയുടെ കണ്ടെത്തല്. കോണ്വെന്റില് അതിക്രമിച്ചു കടന്നുവെന്ന കുറ്റംകൂടി കോട്ടൂരിനുണ്ട്. 28 വര്ഷം നീണ്ട നടപടികള്ക്കൊടുവിലാണ് പ്രതികള് കുറ്റക്കാരെന്ന് പ്രത്യേക സിബിഐ കോടതി ജഡ്ജി കെ സനില് കുമാര് കണ്ടെത്തിയത്.
തിരുവനന്തപുരം സിബിഐ പ്രത്യേക കോടതി ഇന്ന് രാവിലെ പതിനൊന്നിന് ശിക്ഷയില് വാദം കേള്ക്കും. കൊലപാതക കുറ്റത്തിന് വധശിക്ഷയോ ജീവപര്യന്തം തടവോ, ഒപ്പം പിഴയുമാണ് ഇന്ത്യന് ശിക്ഷ നിയമം നിഷ്കര്ഷിയ്ക്കുന്ന ശിക്ഷ. തെളിവ് നശിപ്പിച്ചെന്ന കുറ്റത്തിന് ഒന്ന് മുതല് പരമാവധി ഏഴ് വര്ഷം വരെ തടവും പിഴയും, കൊലപ്പെടുത്താന് ലക്ഷ്യമിട്ട് അതിക്രമിച്ച് കയറിയതിന് പരമാവധി പത്ത് വര്ഷത്തില് താഴെ തടവും പിഴയുമാണ് ഐപിസി നിഷ്കര്ഷിയ്ക്കുന്നത്.
അപൂര്വ്വങ്ങളില് അപൂര്വ്വമായ കേസായി പരിഗണിച്ച് പരാമവധി ശിക്ഷ പ്രതികള്ക്ക് വിധിക്കണമെന്നാകും പ്രോസിക്യൂഷന് കോടതിയില് വാദിക്കുക. പ്രായവും അസുഖങ്ങളും കണക്കിലെടുത്ത് ശിക്ഷയില് ഇളവ് വേണമെന്നാകും പ്രതിഭാഗം ആവശ്യപ്പെടുക. ഇരുവാദങ്ങളും പരിശോധിച്ചാകും തിരുവനന്തപുരം പ്രത്യേക സിബിഐ കോടതി ജഡ്ജി കെ സനില് കുമാര് ശിക്ഷ വിധിയ്ക്കുക.
കോട്ടയം പയസ് ടെന്ത് കോണ്വെന്റിലെ അന്തേവാസിയും ബിസിഎം കോളേജില് പ്രീഡിഗ്രി രണ്ടാം വര്ഷ വിദ്യാര്ത്ഥിയുമായ സിസ്റ്റര് അഭയ എന്ന ബീന തോമസ് 1992 മാര്ച്ച് 27 നാണ് കൊല്ലപ്പെട്ടത്. പ്രതികള് തമ്മിലുള്ള ലൈംഗിക ബന്ധം അഭയ പുറത്ത് പറയാതിരിക്കാനായിരുന്നു കൊലപാതകമെന്നാണ് പ്രോസിക്യൂഷന് കേസ്.
Discussion about this post