കൊച്ചി: കൊച്ചിയിലെ മാളില് വെച്ച് യുവനടിയെ അപമാനിച്ച സംഭവത്തിലെ പ്രതികള് മാളില് കയറിയത് കൊവിഡ് രജിസ്റ്ററില് പേരുവിവരം വെളിപ്പെടുത്താതെ ആണെന്ന് കണ്ടെത്തി. അതേസമയം പ്രതികള് വന്നതും പോയതും മെട്രോ ട്രെയിനാലാണെന്ന് സിസിടിവി ദൃശ്യങ്ങള് പരിശോധിച്ചപ്പോള് മനസിലായി. സംഭവത്തില് പൊലീസ് അന്വേഷണം പുരോഗമിക്കുകയാണ്.
കഴിഞ്ഞ ദിവസമാണ് നടി സോഷ്യല് മീഡിയയിലൂടെയാണ് തനിക്ക് അപമാനമേറ്റ വിവരം വെളിപ്പെടുത്തിയത്. കുടുംബത്തോടൊപ്പം ഷോപ്പിംഗ് പോയപ്പോഴായിരുന്നു സംഭവം. പ്രതികരിക്കാനാകാതെ പോയതില് ദുഃഖമുണ്ടെന്നും നടി ഇന്സ്റ്റഗ്രാമില് കുറിച്ചു.
അതേസമയം യുവനടിയുടെ വെളിപ്പെടുത്തലിന്റെ അടിസ്ഥാനത്തില് വനിതാ കമ്മീഷന് സ്വമേധയാ കേസെടുത്തിട്ടുണ്ട്. അപമാനിക്കാന് ശ്രമിച്ചവര്ക്കെതിരെ കര്ശന നടപടി എടുക്കുമെന്നാണ് വനിതാ കമ്മീഷന് വ്യക്തമാക്കിയത്. മാളിലെ സിസിടിവി ദൃശ്യങ്ങള് എത്രയും വേഗം ഹാജരാക്കാന് വനിതാ കമ്മീഷന് അധ്യക്ഷ പോലീസിന് നിര്ദേശം നല്കിയിട്ടുണ്ട്. ഭയപ്പെടാതെ ഉടന് പ്രതികരിക്കാന് സ്ത്രീകള് തയാറാകണമെന്നും നടിയെ നേരിട്ട് കണ്ട് വിശദാംശങ്ങള് ചോദിച്ചറിയുമെന്നും എംസി ജോസഫൈന് വ്യക്തമാക്കി.
നടി സോഷ്യല് മീഡിയയില് പങ്കുവെച്ച കുറിപ്പ് ഇങ്ങനെ,
‘ആദ്യം താന് അയാള്ക്ക് അറിയാതെ പറ്റിയതാണോ എന്ന് സംശയിച്ചു. എന്നാല് എന്റെ സഹോദരി എല്ലാം വ്യക്തമായി കണ്ടിരുന്നു. അവള് എനിക്കരികില് വന്ന് കുഴപ്പം ഒന്നും ഇല്ലല്ലോ എന്ന് ചോദിച്ചു. ഞാന് ഊഹിക്കാത്ത ഒരു കാര്യം സംഭവിച്ചതിനാല് അതിന്റെ ഞെട്ടലിലായിരുന്നു. ഞാന് അവര്ക്കരികിലേക്ക് നടന്നു ചെന്നപ്പോള് അവര് എന്നെ കണ്ടില്ലെന്ന് നടിച്ചു. എനിക്ക് മനസ്സിലായെന്ന് അവര് അറിയണമെന്ന് കരുതിയാണ് ഞാന് ചെയ്തത്. പിന്നീട് പണമടക്കാന് കൗണ്ടറില് നില്ക്കുന്ന സമയത്ത് അവര് എനിക്കരികില് വന്നു സംസാരിക്കാന് ശ്രമിച്ചു.
ഇത്രയും ചെയ്തിട്ടും അവര് എന്നോട് സംസാരിക്കാനുള്ള ധൈര്യം കാണിച്ചു. ഞാന് ഏതൊക്കെ സിനിമയാണ് ചെയ്യുന്നത് എന്നാണ് അവര്ക്ക് അറിയേണ്ടത്. എന്നാല് ഞങ്ങള് അവരെ അവഗണിക്കുകയും സ്വന്തം കാര്യം നോക്കി പോകാന് പറയുകയും ചെയ്തു. എന്റെ അമ്മ ഞങ്ങള്ക്ക് അരികിലേക്ക് വന്നപ്പോള് അവിടെ നിന്ന് പോയി’.
Discussion about this post