കൊച്ചി: കിഴക്കമ്പലം പഞ്ചായത്തില്‍ രണ്ടാമതും ഭരണം പിടിച്ച് ട്വന്റി ട്വന്റി. കിഴക്കമ്പലത്തെ കൂടാതെ ഐക്കരനാടും മഴുവന്നൂര്‍ പഞ്ചായത്തിലും ട്വന്റി ട്വന്റി അധികാരം ഉറപ്പിച്ചു. ഐക്കരനാടില്‍ 14 സീറ്റുകളിലും ട്വന്റി ട്വന്റിയാണ് മുന്നേറുന്നത്. മഴുവന്നൂരിലെ 19 വാര്‍ഡുകളില്‍ ഫലം പുറത്ത് വന്ന 16 വാര്‍ഡുകളിലെ 12 വാര്‍ഡിലും ട്വന്റി ട്വന്റി ജയിച്ചു.
കുന്നത്തുനാട് പഞ്ചായത്തുകളില്‍ ട്വന്റി ട്വന്റി സ്ഥാനാര്‍ത്ഥികള്‍ മുന്നേറുന്നുണ്ടെന്നാണ് റിപ്പോര്‍ട്ട്. കിഴക്കമ്പലത്ത് വോട്ട് ചെയ്യാന്‍ എത്തിയ ദമ്പതികളെ ആക്രമിച്ച വാര്‍ഡിലും ട്വന്റി ട്വന്റി ജയിച്ചു.
നിര്‍ബന്ധിത കോര്‍പ്പറേറ്റ് സോഷ്യല്‍ റെസ്‌പോണ്‍സിബിലിറ്റി നടപ്പിലാക്കാന്‍ കിറ്റക്‌സ് രൂപീകരിച്ച ചാരിറ്റബിള്‍ ട്രസ്റ്റാണ് ട്വന്റി 20. കഴിഞ്ഞ തദ്ദേശ സ്വയംഭരണ തെരഞ്ഞെടുപ്പിലാണ് കിഴക്കമ്പലത്ത് കിറ്റക്‌സിന്റെ സിഎസ്ആര്‍ പദ്ധതിയുടെ ഭാഗമായി രൂപം കൊണ്ട ട്വന്റി 20 എന്ന ചാരിറ്റബിള്‍ ട്രസ്റ്റ് സ്ഥാനാര്‍ത്ഥികളെ നിര്‍ത്തുന്നത്. എല്‍ഡിഎഫും യുഡിഎഫും മാറി മാറി ഭരിച്ച പഞ്ചായത്തിലാണ് കഴിഞ്ഞ തവണ ട്വന്റിക്ക് അട്ടിമറി വിജയം നേടാനായത്.
