തിരുവനന്തപുരം: കൊവിഡ് 19 വൈറസ് പടരുന്ന പശ്ചാത്തലത്തില്‍ എല്ലാ പരീക്ഷകളും മാറ്റി വയ്ക്കാനുള്ള യുജിസി നിര്‍ദേശം തള്ളി കേരളം. ആരോഗ്യവകുപ്പ് പുറപ്പെടുവിച്ച കര്‍ശന മാര്‍ഗനിര്‍ദേശങ്ങള്‍ പാലിച്ചു കൊണ്ടു പരീക്ഷകള്‍ പൂര്‍ത്തിയാക്കുമെന്നാണ് കേരളത്തിലെ സര്‍വകലാശാലകളുടെ നിലപാട്. ഇക്കാര്യം ഉടനെ യുജിസിയെ അറിയിക്കും.
കൊവിഡ് ജാഗ്രത നിലനില്‍ക്കുന്ന പശ്ചാത്തലത്തില്‍ നിലവില്‍ നടക്കുന്ന പരീക്ഷകള്‍ അടക്കം എല്ലാ പരീക്ഷകളും മാറ്റി വയ്ക്കണമെന്ന് യുജിസി സര്‍വകലാശാലകള്‍ക്ക് നിര്‍ദേശം നല്‍കിയിരുന്നു. ഈ മാസം 31 വരെ മൂല്യനിര്‍ണയ ക്യാമ്പുകളൊന്നും നടത്തരുതെന്നും യുജിസി വ്യക്തമാക്കിയിരുന്നു.
ഐഇഎല്‍ടിസി പരീക്ഷയും മാറ്റി വച്ചു. ഐ.എസ്.സി, ഐ.സി.എസ്.സി പരീക്ഷകളും മാറ്റി വച്ചിട്ടുണ്ട്. പുതിയ തീയ്യതികള്‍ തീരുമാനിച്ചിട്ടില്ല. കൊവിഡ് പടരുന്ന പശ്ചാത്തലത്തില്‍ നേരത്തെ സിബിഎസ്ഇയും ഐസിഎസ്ഇ പത്ത്,പ്ലസ്സ് ടു പരീക്ഷകള്‍ മാറ്റിവച്ചിരുന്നു.
