ഗാന്ധിനഗര്: ദിശമാറിയ വായു ചുഴലിക്കാറ്റ് ഗുജറാത്ത് തീരം തൊടാതെ പടിഞ്ഞാറന് ദിശയിലേക്ക് നീങ്ങുന്നു. വായു തീരം തൊട്ടില്ലെങ്കിലും ഗുജറാത്തില് ശക്തമായ മഴയും കാറ്റും തുടരുകയാണ്. ഇത് 48 മണിക്കൂര് കൂടി തുടരുമെന്ന് മുന്നറിയിപ്പ് നല്കിയിട്ടുണ്ട്. ഗുജറാത്തിലെ പല മേഖലകളിലും കനത്ത നാശനഷ്ടമാണ് റിപ്പോര്ട്ട് ചെയ്തിരിക്കുന്നത്.
ദിശമാറിയ വായു ചുഴലിക്കാറ്റ് ഒമാന് തീരത്തേക്കാണ് നീങ്ങുന്നത്. ചുഴലിക്കാറ്റ് വീശിയില്ലെങ്കിലും വായുവിന്റെ പ്രഭാവത്തില് ഗുജറാത്തതില് കനത്ത മഴയും കാറ്റും തുടരുകയാണ്. സൗരാഷ്ട്ര, കച്ച് മേഖലകളില് വന് നാശനഷ്ടങ്ങളാണ് ഉണ്ടായത്. അഞ്ഞൂറിലധികം ഗ്രാമങ്ങളില് വൈദ്യുതി വിതരണം പൂര്ണ്ണമായും വിച്ഛേദിക്കപ്പെട്ടു.
ഗുജറാത്തില് 3 ലക്ഷം പേരെയാണ് മാറ്റിപ്പാര്പ്പിച്ചത്. ട്രെയിന് റോഡ് ഗതാഗതവും തടസ്സപ്പെട്ടു. ഇന്നലെ അര്ധരാത്രി വരെ അഞ്ച് വിമാനത്താവളങ്ങളും അടച്ചിട്ടു. കര,വ്യോമ,നാവിക സേനകളും ദേശീയ ദുരന്ത നിവാരണ സേനയും തീരസംരക്ഷണ സേനയും മേഖലയില് ക്യാമ്പ് ചെയ്യുന്നുണ്ട്.
Discussion about this post