ന്യൂഡല്ഹി: സ്വന്തം പിതാവിനെതിരെ മോശമായി പരാമര്ശം നടത്തിയ കേന്ദ്രമന്ത്രി പീയുഷ് ഗോയലിന് മറുപടി നല്കി ബോളിവുഡ് താരം റിതേശ് ദേശ്മുഖ്. മഹാരാഷ്ട്ര മുന് മുഖ്യമന്ത്രിയും റിതേശിന്റെ പിതാവുമായ വിലാസ്റാവു ദേശ്മുഖിനെതിരെയാണ് മന്ത്രി പീയുഷ് ഗോയല് മോശം പരാമര്ശം നടത്തിയത്. തിരിച്ച് പ്രതികരിക്കാനില്ലെന്ന് ഉറപ്പുള്ളൊരാള്ക്കെതിരെ ഇത്തരത്തില് പരാമര്ശങ്ങള് നടത്തുന്നത് തെറ്റാണെന്ന് റിതേഷ് തുറന്നടിച്ചു. ട്വിറ്ററിലൂടെയാണ് മന്ത്രിയുടെ പേര് വെളിപ്പെടുത്താതെ താരം മറുപടി നല്കിയത്.
2011ല് മുംബൈ ഭീകരാക്രമണം നടക്കുന്ന സമയത്ത് തന്റെ മകന് സിനിമയില് അഭിനയിക്കാനുള്ള അവസരം ലഭിക്കുന്നതിനെക്കുറിച്ചായിരുന്നു വിലാസ്റാവുവിന്റെ ഉത്കണ്ഠയെന്നെന്നാണ് പിയുഷ് ഗോയാലിന്റെ പരാമര്ശം. മുംബൈയിലെ ഒബ്രോയി ഹോട്ടലിനകത്ത് വെടിവെയ്പ്പും ബോബേറും നടക്കുന്ന സമയത്ത് പുറത്ത് ഒരു നിര്മ്മാതാവുമായി സംസാരിക്കുകയായിരുന്നു വിലാസ്റാവുവെന്നും മന്ത്രി ആരോപിച്ചിരുന്നു. പിതാവും താനും ഒരുമിച്ച് പ്രവര്ത്തിച്ചിട്ടുണ്ടെന്ന കാര്യം സത്യമാണ്. എന്നാല് തനിക്ക് സിനിമയില് അഭിനയിക്കാനുള്ള അവസരത്തിനായി അദ്ദേഹം പരിശ്രമിച്ചിരുന്നു എന്നത് സത്യമല്ലെന്ന് റിതേഷ് കുറിച്ചു.
പിതാവ് ഒരിക്കല്പോലും ഒരു സംവിധായകനേയൊ നിര്മ്മാതാവിനേയൊ തനിക്ക് സിനിമയില് ഒരവസരം നല്കണമെന്ന് ആവശ്യപ്പെട്ടിട്ട് സമീപിച്ചിട്ടില്ലെന്നും അതില് താന് അഭിമാനിക്കുന്നുവെന്നും താരം എടുത്ത് പറയുന്നുണ്ട്. വെടിവയ്പ്പും ബോബെറും നടക്കുന്ന സമയത്താണ് താജ് അല്ലെങ്കില് ഒബ്രോയി ഹോട്ടലില് പിതാവ് സന്ദര്ശിച്ചിരുന്നത് എന്ന താങ്കളുടെ വാദം തെറ്റാണെന്നും അദ്ദേഹം തുറന്നടിച്ചു. പ്രശ്നങ്ങള് പറഞ്ഞ് തീര്ക്കാന് കുറച്ച് വൈകിപ്പോയി.
എന്നാല് ഏഴ് വര്ഷങ്ങള്ക്ക് ശേഷം വിലാസ്റാവു ദേശ്മുഖ് താങ്കള്ക്ക് മറുപടി നല്കിയിരിക്കുകയാണെന്നും റിതേഷ് കൂട്ടിച്ചേര്ത്തു. താങ്കളുടെ തെരഞ്ഞെടുപ്പ് പ്രചാരണത്തിന് എല്ലാവിധ ആശംസകളും നേരുന്നുവെന്ന് പറഞ്ഞാണ് റിതേഷിന്റെ കുറിപ്പ് അവസാനിക്കുന്നത്. 2012-ലാണ് വിലാസ്റാവു ദേശ്മുഖ് അന്തരിച്ചത്.
Discussion about this post