ന്യൂഡല്ഹി: ഫേയ്സ്ബുക്ക് പോലെയുള്ള സോഷ്യല് മീഡിയ അക്കൗണ്ടുകള് ആധാറുമായി ബന്ധിപ്പിക്കണമെന്ന് ആവശ്യപ്പെട്ട് സുപ്രീംകോടതിയില് പൊതുതാല്പര്യ ഹര്ജി. അഭിഭാഷകയും ഡല്ഹിയിലെ ബിജെപി നേതാവുമായ അശ്വിനി ഉപാധ്യായ ആണ് ഹര്ജി നല്കിയിരിക്കുന്നത്.
വ്യാജവാര്ത്തകളും മറ്റും സോഷ്യല് മീഡിയയിലൂടെ പ്രചരിക്കുന്നത് തടയാന് അക്കൗണ്ടുകളെ ആധാറുമായി ബന്ധിപ്പിക്കുന്നതിലൂടെ കഴിയും. ഇതിനുള്ള സാധ്യത കേന്ദ്രസര്ക്കാരിനോട് ആരായണമെന്നാവശ്യപ്പെട്ടാണ് ഹര്ജി നല്കിയിരിക്കുന്നത്.
നിലവില് രാജ്യത്ത് 3.5 കോടി ട്വിറ്റര് അക്കൗണ്ടുകളും 32.5 കോടി ഫേസ്ബുക്ക് അക്കൗണ്ടുകളുമാണുള്ളത്. സോഷ്യല്മീഡിയ വിദഗ്ധരുടെ അഭിപ്രായത്തില് ഇവയില് പത്ത് ശതമാനത്തോളം വ്യാജഅക്കൗണ്ടുകളാണ്. ഇതില് പ്രശസ്തരുടെ പേരുകളിലും വ്യാജ അക്കൗണ്ടുകളുണ്ട്.
ഇത്തരം വ്യാജ അക്കൗണ്ടുകളില് പലതും യഥാര്ത്ഥമാണെന്ന് കരുതി ജനങ്ങള് അവയിലൂടെ പങ്കുവയ്ക്കപ്പെടുന്ന വിവരങ്ങള് വിശ്വസിക്കുന്നു. ഇത് പലവിധത്തിലുള്ള കലാപങ്ങള്ക്കും വര്ഗീയ സംഘര്ഷങ്ങള്ക്കും വരെ കാരണമാകുന്നവെന്നും ഹര്ജിയില് പറയുന്നു.
കൂടാതെ വ്യാജ അക്കൗണ്ടുകള്ക്കെതിരെ നടപടിയെടുക്കാന് കേന്ദ്രസര്ക്കാരിന് നിര്ദേശം നല്കണമെന്നും ഹര്ജിയില് ആവശ്യപ്പെട്ടിട്ടുണ്ട്.
Discussion about this post