ന്യൂഡല്ഹി: ഇന്ത്യക്കെതിരെ 50 ശതമാനം തീരുവ ഏര്പ്പെടുത്തിയുള്ള അമേരിക്കന് പ്രസിഡന്റ് ഡോണള്ഡ് ട്രംപിന്റെ ഉത്തരവിന് പിന്നാലെ നിലപാട് വ്യക്തമാക്കി പ്രധാനമന്ത്രി നരേന്ദ്ര മോദി. രാജ്യത്തെ കര്ഷകരുടെയും മത്സ്യത്തൊഴിലാളികളുടെയും താല്പര്യങ്ങള് ഒരു കാരണവശാലും വിട്ടുവീഴ്ച ചെയ്യില്ലെന്ന് പ്രധാനമന്ത്രി വ്യക്തമാക്കി. ഇതിന് വ്യക്തിപരമായി വലിയ വില നല്കേണ്ടി വരുമെങ്കിലും അതിന് തയാറാണെന്ന് പ്രധാനമന്ത്രി പറഞ്ഞു.
ദില്ലിയില് നടന്ന എം എസ് സ്വാമിനാഥന് ശതാബ്ദി അന്താരാഷ്ട്ര സമ്മേളനത്തില് സംസാരിക്കുകയായിരുന്നു പ്രധാനമന്ത്രി. ‘കര്ഷകരുടെ താല്പര്യമാണ് ഞങ്ങളുടെ പ്രധാന മുന്ഗണന. ഇന്ത്യ ഒരിക്കലും കര്ഷകരുടെയും ക്ഷീരകര്ഷകരുടെയും മത്സ്യത്തൊഴിലാളികളുടെയും താല്പര്യങ്ങളില് വിട്ടുവീഴ്ച ചെയ്യില്ല. ഇതിന് വ്യക്തിപരമായി ഞാന് വലിയ വില നല്കേണ്ടിവരുമെന്ന് എനിക്കറിയാം. പക്ഷേ ഞാന് അതിന് തയ്യാറാണ്. രാജ്യത്തെ കര്ഷകര്ക്കും മത്സ്യത്തൊഴിലാളികള്ക്കും ക്ഷീരകര്ഷകര്ക്കും വേണ്ടി ഇന്ത്യയും തയ്യാറാണ്’ – ട്രംപിന്റെ താരിഫ് പ്രഖ്യാപനത്തിന് പിന്നാലെ പ്രധാനമന്ത്രി പറഞ്ഞു.