പുനെ: ജോലി ഭാരം താങ്ങാനാകാതെ ബാങ്ക് മാനേജര് ജീവനൊടുക്കി. മഹാരാഷ്ട്രയിലെ ബാരാമതിയില് ബാങ്ക് ഓഫ് ബറോഡയുടെ ശാഖയിലെ ചീഫ് മാനേജറാണ് ജീവനൊടുക്കിയത്.
ഉത്തര്പ്രദേശിലെ പ്രയാഗ്രാജ് സ്വദേശിയായ ശിവശങ്കര് മിത്ര (52) ആണ് മരിച്ചത്. ജോലി ഭാരം താങ്ങാനാകാതെയാണ് ജീവനൊടുക്കുന്നതെന്ന് ആത്മഹത്യാകുറിപ്പില് വ്യക്തമാക്കി. ബാങ്ക് ജോലി സമ്മര്ദ്ദം മൂലമാണ് താന് ഈ കടുത്ത നടപടി സ്വീകരിച്ചതെന്ന് പറയുന്ന മിത്രയുടെ ആത്മഹത്യാക്കുറിപ്പ് കണ്ടെടുത്തു.
മൃതദേഹം പോസ്റ്റ്മോര്ട്ടത്തിനായി ആശുപത്രിയിലേക്ക് കൊണ്ടുപോയി. ബാരാമതിയിലെ ബാങ്ക് ഓഫ് ബറോഡയില് ചീഫ് മാനേജരായി മിത്ര ജോലി ചെയ്തിരുന്നു. ആരോഗ്യപ്രശ്നങ്ങളും ജോലി സമ്മര്ദ്ദവും ചൂണ്ടിക്കാട്ടി അദ്ദേഹം 2025 ജൂലൈ 11 ന് രാജി സമര്പ്പിച്ചു. നോട്ടീസ് പിരിയഡിലിരിക്കെയാണ് മരണം.
ആത്മഹത്യാക്കുറിപ്പില് അദ്ദേഹം സഹപ്രവര്ത്തകരെയോ മേലുദ്യോഗസ്ഥരെയോ കുറ്റപ്പെടുത്തിയിട്ടില്ല. എന്നിരുന്നാലും, ഏതെങ്കിലും ബാങ്ക് ഉദ്യോഗസ്ഥര് അധിക ജോലി സമ്മര്ദ്ദം ഉണ്ടാക്കിയിട്ടുണ്ടോ എന്ന് അന്വേഷിക്കുമെന്ന് പൊലീസ് പറഞ്ഞു.
ഭാര്യയോടും മകളോടും ജീവിതം അവസാനിപ്പിച്ചതിന് അദ്ദേഹം ക്ഷമ ചോദിക്കുകയും സാധ്യമെങ്കില് തന്റെ കണ്ണുകള് ദാനം ചെയ്യാന് ആവശ്യപ്പെടുകയും ചെയ്തതായി പൊലീസ് പറഞ്ഞു.
Discussion about this post