വാരണാസി: 18 മാസം പ്രായമുള്ള പെണ്‍കുട്ടി കടല വേവിക്കുന്ന കലത്തില്‍ വീണ് പൊള്ളലേറ്റ് മരിച്ചു. ഉത്തര്‍ പ്രദേശിലെ സോന്‍ഭദ്രയിലെ ധൂധിയിലാണ് സംഭവം. ഉടന്‍ തന്നെ കുഞ്ഞിനെ മാതാപിതാക്കള്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
മൃതദേഹവുമായി വീട്ടിലേക്ക് പോയ രക്ഷിതാക്കള്‍ ഞായറാഴ്ച തന്നെ മൃതദേഹം സംസ്‌കരിക്കുകയായിരുന്നു. ആശുപത്രിയില്‍ നിന്ന് വിവരം അറിഞ്ഞ് പരിശോധനയ്ക്ക് പൊലീസ് എത്തിയപ്പോഴേയ്ക്കും സംസ്‌കാരം കഴിഞ്ഞിരുന്നു. ചെറിയ തട്ടുകടയില്‍ ചാട്ട് വിഭവങ്ങളുടെ കട നടത്തുന്ന ശൈലേന്ദ്ര എന്നയാളുടെ മകളാണ് പൊള്ളലേറ്റ് മരിച്ചത്. വെള്ളിയാഴ്ച പാനീ പൂരി ഉണ്ടാക്കുന്നതിനായി കടല വേവിക്കുന്നതിനിടയിലുണ്ടായ അപകടമെന്നാണ് ഇയാള്‍ സംഭവത്തേക്കുറിച്ച് പൊലീസിന് മൊഴി നല്‍കിയത്.
കുഞ്ഞിന്റെ അമ്മ മറ്റൊരു മുറിയിലേക്ക് പോയ സമയത്ത് 18 മാസം പ്രായമുള്ള മകള്‍ പ്രിയ കലത്തിലേക്ക് വീണുവെന്നാണ് ഇയാളുടെ മൊഴി. മകളുടെ നിലവിളി കേട്ടെത്തിയ അമ്മ കുഞ്ഞിനെ പുറത്തെടുത്ത് ആശുപത്രിയിലെത്തിക്കുകയായിരുന്നു. എന്നാല്‍ പൊള്ളലിന്റെ ഗുരുതരാവസ്ഥ മനസിലാക്കിയ ആശുപത്രിക്കാര്‍ കുട്ടിയെ ജില്ലാ ആശുപത്രിയിലേക്ക് റഫര്‍ ചെയ്യുകയായിരുന്നു. ഇവിടെ വച്ചാണ് കുട്ടി മരണപ്പെടുന്നത്. സമാനമായ രീതിയില്‍ ദമ്പതികളുടെ മറ്റൊരു മകള്‍ രണ്ട് വര്‍ഷം മുന്‍പ് മരിച്ചിരുന്നു.
Discussion about this post