മുംബൈ: സോഡാ കുപ്പി തുറക്കുന്നതിനിടെ അടപ്പ് തുളച്ചുകയറി യുവാവിന്റെ കണ്ണിന് ഗുരുതരപരിക്ക്. സംഭവത്തില് സോഡ വില്പ്പനക്കാരനെ പോലീസ് അറസ്റ്റ് ചെയ്തു. ദുബായില് ഫിനാന്സ് എക്സിക്യൂട്ടീവ് ആയി ജോലി ചെയ്യുന്ന സിദ്ധേഷ് സാവന്തിന്റെ കണ്ണിനാണ് ഗുരുതരമായി പരിക്കേറ്റത്. സോഡ വില്പ്പനക്കാരന് വിശ്വനാഥ് സിങ്ങിനെതിരെ കേസെടുത്തു.
സിദ്ധേഷ് മുംബൈ സന്ദര്ശിക്കാന് എത്തിയപ്പോഴാണ് അത്യപൂര്വ്വ സംഭവം ഉണ്ടായത്. സോഡാ കുപ്പിയുടെ അടപ്പ് തുറക്കുന്നതിനിടെ, തെറിച്ചുവീണ അടപ്പ് സിദ്ധേഷിന്റെ കണ്ണില് തറയ്ക്കുകയായിരുന്നു. ഇടതുകണ്ണിലാണ് ഗുരുതരമായി പരിക്കേറ്റത്.
ക്രിസ്മസ് ന്യൂഇയര് അവധി കൂട്ടുകാര്ക്കും കുടുംബത്തിനുമൊപ്പം ആഘോഷിക്കാന് മുംബൈയില് എത്തിയ സമയത്താണ് അപകടം സംഭവിച്ചത്. കൂട്ടുകാര്ക്കൊപ്പം കടയിലെത്തിയ സാവന്ത് മൂന്ന് സോഡയ്ക്ക് ഓര്ഡര് നല്കി. സോഡാ കുപ്പികള് ശക്തിയായി കുലുക്കിയ ശേഷം തുറക്കുമ്പോഴാണ് അപകടം ഉണ്ടായത്. ആദ്യ രണ്ടു കുപ്പികള് തുറന്ന് സോഡ ഗ്ലാസില് പകര്ന്നു.
മൂന്നാമത്തെ കുപ്പി തുറക്കുന്നതിനിടെ, തെറിച്ചുവീണ മെറ്റല് അടപ്പ് സാവന്തിന്റെ ഇടതുകണ്ണില് തറയ്ക്കുകയായിരുന്നു. കണ്ണില് ആന്തരിക രക്തസ്രാവവും കടുത്ത വേദനയും അനുഭവപ്പെട്ടതോടെ, ഉടന് തന്നെ കൂട്ടുകാര് ആശുപത്രിയില് എത്തിച്ചു. കണ്ണിന്റെ കാഴ്ച പൂര്ണമായി ലഭിക്കുന്നതിന് സാവന്ത് ചികിത്സ തുടരുകയാണ്.
Discussion about this post