തങ്ങളുടെ മക്കള് വലിയ നിലയിലെത്തി കാണണമെന്നാണ് എല്ലാ മാതാപിതാക്കളുടെയും ആഗ്രഹം. അവര് ജീവിതത്തില് വിജയം കൈവരിക്കുന്നതാണ് മാതാപിതാക്കളുടെ സ്വപ്നം. മക്കളുടെ ആഗ്രഹങ്ങള് സാധിക്കാന് വേണ്ടി മാതാപിതാക്കള് തങ്ങളാല് കഴിയുന്നതെല്ലാം ചെയ്തുകൊടുക്കാറുമുണ്ട്.
ഇപ്പോഴിതാ ഒരു അമ്മയുടെയും ആ അമ്മ കൊതിച്ചതുപോലെ ജീവിതത്തില് വിജയം കൈവരിച്ച മകന്റെയും സ്നേഹം വ്യക്തമാക്കുന്ന ഒരു ചിത്രമാണ് ഇന്ന് സോഷ്യല്മീഡിയ ഏറ്റെടുത്തിരിക്കുന്നത്. അമ്മ സ്വപ്നം കണ്ടതുപോലെ ഒരു പൈലറ്റ് ആയിരിക്കുകയാണ് മകന്.
തന്റെ കുഞ്ഞുമകന് വളര്ന്ന് വലുതായി ഒരു പൈലറ്റായി തീരണം എന്നായിരുന്നു ആ അമ്മയുടെ ആഗ്രഹം. എന്നിട്ട്, അവന് പറത്തുന്ന അതേ വിമാനത്തില് മക്കയിലേക്ക് ഒരു ദിവസം പറക്കണം എന്നതും അമ്മയുടെ ആഗ്രഹമായിരുന്നു. വര്ഷങ്ങള്ക്ക് ശേഷം ആ ആഗ്രഹം സഫലമാക്കിയിരിക്കുകയാണ് മകന്.
ട്വിറ്ററിലാണ് പോസ്റ്റ് പ്രത്യക്ഷപ്പെട്ടിരിക്കുന്നത്. ട്വീറ്റില് അമീര് റാഷിദ് വാനി പൈലറ്റിന്റെ വേഷത്തിലുള്ള തന്റെ ചിത്രവും കുട്ടിയായിരിക്കുമ്പോള് അമ്മ എഴുതിയ കുറിപ്പിന്റെ ചിത്രവും പങ്ക് വച്ചിട്ടുണ്ട്.
‘ഈ കാര്ഡ് സ്കൂളില് പഠിക്കുമ്പോള് എന്റെ അമ്മ എഴുതിയതാണ്. ഒപ്പം നീ ഒരു പൈലറ്റായാല് എന്നെ അതില് മക്കയിലേക്ക് കൊണ്ടു പോകണം എന്നും പറയുമായിരുന്നു. ഇന്ന് എന്റെ അമ്മ വിശുദ്ധ കഅബയിലേക്കുള്ള യാത്രക്കാരില് ഒരാളാണ്. ആ വിമാനത്തിന്റെ പൈലറ്റ് ഞാനാണ്.’ എന്നാണ് കുറിപ്പില് എഴുതിയിരിക്കുന്നത്. നിരവധി പേരാണ് ട്വീറ്റിന് താഴെ പ്രതികരിച്ചത്.
Discussion about this post