ബൽറാംപൂർ: ഉത്തർപ്രദേശിൽ പാമ്പുകടിയേറ്റ് മരിച്ച സഹോദരന്റെ അന്ത്യകർമങ്ങൾക്കിടെ സഹോദരനും പാമ്പ് കടിയേറ്റ് മരണം. ജ്യോഷ്ഠന്റെ മരണാനന്തര ചടങ്ങിനെത്തിയ അനുജൻ കിടന്നുറങ്ങുന്നതിനിടെയാണ് പാമ്പുകടിയേറ്റ് കൊല്ലപ്പെട്ടതായി പോലീസ് അറിയിച്ചത്. ബുധനാഴ്ച ഭവാനിപൂർ ഗ്രാമത്തിൽ നടന്ന സഹോദരൻ അരവിന്ദ് മിശ്രയുടെ (38) അന്ത്യകർമങ്ങൾക്കിടെയാണ് ഗോവിന്ദ് മിശ്ര(22) രാത്രി പാമ്പ് കടിയേറ്റ് മരിച്ചതെന്ന് സർക്കിൾ ഓഫീസർ രാധാ രമൺ സിംഗ് പറഞ്ഞു. ചൊവ്വാഴ്ചയാണ് അരവിന്ദ് മിശ്ര പാമ്പുകടിയേറ്റ് മരിച്ചത്.
പിന്നാലെ ഗോവിന്ദ് മിശ്രയെ ഉറക്കത്തിൽ പാമ്പുകടിയേറ്റ് മരിച്ച നിലയിലാണ് കാണപ്പെട്ടത്. അതേ വീട്ടിൽ ഉണ്ടായിരുന്ന കുടുംബത്തിലെ ബന്ധുക്കളിലൊരാളായ ചന്ദ്രശേഖർ പാണ്ഡെക്കും (22) പാമ്പ് കടിയേറ്റിട്ടുണ്ടെന്നും പോലീസ് പറയുന്നു. പാണ്ഡെയെ ഉടൻ ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ നില ഗുരുതരമായി തുടരുകയാണ്.
ALSO READ- കക്കാടാറ്റിൽ ‘നരൻ’ ഷോ കാണിച്ച യുവാക്കൾക്ക് എതിരെ കേസ്; പോലീസ് സ്‌റ്റേഷനിൽ ഹാജരാകാൻ നിർദേശം
സംഭവത്തെ തുടർന്ന് മുതിർന്ന മെഡിക്കൽ, അഡ്മിനിസ്‌ട്രേറ്റീവ് ഉദ്യോഗസ്ഥർ വ്യാഴാഴ്ച ഗ്രാമം സന്ദർശിച്ചു. പ്രദേശത്തെ എംഎൽഎ കൈലാഷ് നാഥ് ശുക്ല കുടുംബത്തെ കാണുകയും അവർക്ക് സഹായം ഉറപ്പ് നൽകുകയും ചെയ്തു.
