ഹൈദരാബാദില്‍ കനത്ത മഴ : താഴ്ന്ന പ്രദേശങ്ങളിലെല്ലാം വെള്ളം കയറി

ഹൈദരാബാദ് : കനത്ത മഴയില്‍ വലഞ്ഞ് ഹൈദരാബാദ്. ഇന്നലെ രാവിലെ തുടങ്ങിയ മഴയില്‍ നഗരത്തിലെ താഴ്ന്ന പ്രദേശങ്ങളെല്ലാം വെള്ളത്തിനടിയിലായി. നിരവധി വീടുകളില്‍ വെള്ളം കയറുകയും മരങ്ങള്‍ കടപുഴകുകയും ചെയ്തിട്ടുണ്ട്. ഇന്ന് കൂടി മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.

സിദ്ദിപൂര്‍ ജില്ലയിലെ ഹാബ്ഷിപൂരിലാണ് ഏറ്റവുമധികം മഴ രേഖപ്പെടുത്തിയത്. ബന്‍സിലാല്‍പേട്ടിലും മരേഡ്പള്ളിയിലും മഴ കനത്തു. തെലങ്കാനയുടെ മറ്റ് സ്ഥലങ്ങളിലും ഇടിമിന്നലോട് കൂടിയുള്ള മഴയ്ക്ക് സാധ്യതയുണ്ടെന്നാണ് വിവരം. കനത്ത ചൂടിന് ആശ്വാസമായെങ്കിലും അപ്രതീക്ഷിതമായി പെയ്ത മഴ ജനജീവിതം താറുമാറാക്കിയിരിക്കുകയാണ്. ദുരന്തബാധിത പ്രദേശങ്ങളില്‍ സൈന്യത്തെ വിന്യസിച്ചിട്ടുണ്ട്.