ന്യൂഡല്ഹി: എയര് ഇന്ത്യയെ ഏറ്റെടുത്തതിന് പിന്നാലെ മറ്റൊരു പൊതുമേഖലാ സ്ഥാപനത്തെ കൂടി സ്വന്തമാക്കാനൊരുങ്ങി ടാറ്റ. നീലചല് ഇസ്പത് നിഗം ലിമിറ്റഡ് എന്ന പൊതുമേഖലാ സ്ഥാപനത്തെയാണ് ടാറ്റ സ്റ്റീല് ലോങ് പ്രൊഡക്ട്സ് ലിമിറ്റഡിന് വില്ക്കുന്നത്.
പൊതുമേഖലാ സ്ഥാപനത്തെ വില്ക്കാനുള്ള ടെണ്ടറില് ഏറ്റവും ഉയര്ന്ന തുക ക്വോട്ട് ചെയ്തത് ടാറ്റ കമ്പനിയാണ്. 12100 കോടി രൂപയാണ് ടാറ്റ കമ്പനി ക്വോട്ട് ചെയ്തത്. ടെണ്ടര് അംഗീകരിക്കപ്പെട്ടതോടെ മറ്റ് തടസങ്ങളില്ലെങ്കില് കേന്ദ്രത്തിന്റെ പക്കലുണ്ടായിരുന്ന പൊതുമേഖലാ സ്ഥാപനത്തിന്റെ 93.71 ശതമാനം ഓഹരികളും ഇനി ടാറ്റ സ്റ്റീല് ലോങ് പ്രൊഡക്ട്സ് കമ്പനിക്ക് സ്വന്തമാകും.
കേന്ദ്രമന്ത്രിമാരായ നിര്മല സീതാരാമന്, പിയൂഷ് ഗോയല്, നിതിന് ഗഡ്കരി എന്നിവരുള്പ്പെട്ട സമിതിയാണ് ഈ വില്ക്കലിന് അനുമതി കൊടുത്തത്. 1.1 മെട്രിക് ടണ് ഉല്പ്പാദന ശേഷിയുള്ള സ്റ്റീല് പ്ലാന്റ് നീലചല് ഇസ്പത് നിഗം ലിമിറ്റഡിനുണ്ട്.
എന്എംടിസി, എന്എംഡിസി, ഭെല്, എംഇസിഒഎന് എന്നീ നാല് പൊതുമേഖലാ കമ്പനികളുടെയും ഒഡിഷ സര്ക്കാരിന് കീഴിലെ പൊതുമേഖലാ സ്ഥാപനങ്ങളായ ഒഎംസി, ഐപിഐസിഒഎല് എന്നിവയുടെയും സംയുക്ത ഉടമസ്ഥതയിലായിരുന്നു ഈ കമ്പനി പ്രവര്ത്തിച്ചിരുന്നത്.
ടാറ്റയ്ക്ക് പുറമെ ജെഎസ്ഡബ്ല്യു സ്റ്റീലായിരുന്നു ടെണ്ടറില് പങ്കെടുത്ത മറ്റൊരു കമ്പനി. ജിന്റല് സ്റ്റീലും നല്വ സ്റ്റീലും പവര് ലിമിറ്റഡും ചേര്ന്നൊരു കണ്സോര്ഷ്യവും ബിഡ് സമര്പ്പിച്ചിരുന്നു.
കനത്ത കടബാധ്യതയെ തുടര്ന്ന് കഴിഞ്ഞ വര്ഷം ഒക്ടോബറിലാണ് കേന്ദ്ര സര്ക്കാര് എയര് ഇന്ത്യയെ ടാറ്റ ഗ്രൂപ്പിന് വിറ്റത്. 18000 കോടി രൂപയ്ക്കായിരുന്നു കരാര്. എയര് ഇന്ത്യയുടെ ആകെ കടത്തില് 15300 കോടി രൂപ ടാറ്റ ഏറ്റെടുത്തിരുന്നു.
Discussion about this post