ന്യൂഡല്ഹി: കേരളത്തില് നിന്ന് ഡല്ഹിയിലേക്ക് പ്രവേശിക്കാന് ആര്ടിപിസിആര് പരിശോധന ഫലം നിര്ബന്ധമാക്കി. കേരളത്തിലെ കോവിഡ് രോഗികളുടെ എണ്ണം ക്രമാതീതമായി ഉയരുന്ന സാഹചര്യം കണക്കിലെടുത്ത് ഡല്ഹി സര്ക്കാരിന്റെ നടപടി. ഈ മാസം 26 മുതല് മാര്ച്ച് 15 വരെയാണ് പരിശോധന നിര്ബന്ധമാക്കിയത്
വിമാനം, ട്രെയിന്, ബസ് എന്നീ മാര്ഗങ്ങളില് എത്തുന്നവര്ക്ക് 72 മണിക്കൂറിനുള്ളിലുള്ള ആര്ടി-പിസിആര് പരിശോധനാ ഫലം നെഗറ്റീവ് ആണെന്നുള്ള റിപ്പോര്ട്ട് ഉണ്ടെങ്കിലേ പ്രവേശനം അനുവദിക്കൂ. അതേസമയം റോഡ് മാര്ഗം മറ്റു വാഹനങ്ങളില് എത്തുന്നവരെ ഇതില് നിന്ന് ഒഴിവാക്കിയിട്ടുണ്ട്.
കേരളത്തെ കൂടാതെ മഹാരാഷ്ട്ര, ഛത്തീസ്ഗഢ്, മധ്യപ്രദേശ്, പഞ്ചാബ് എന്നീ സംസ്ഥാനങ്ങളില് നിന്നുള്ളവര്ക്കും ഡല്ഹിയില് പ്രവേശിക്കണമെങ്കില് ആര്ടി-പിസിആര് പരിശോധന ഫലം നിര്ബന്ധമാക്കി.
അതിനിടെ കര്ണാടകയും ഉത്തരാഖണ്ഡും മണിപ്പുരും മഹാരാഷ്ട്രയും കേരളത്തില് നിന്നുമെത്തുന്നവര്ക്ക് നിയന്ത്രണം ഏര്പ്പെടുത്തി. ആര്ടിപിസിആര് പരിശോധനാഫലം നെഗറ്റീവായവര്ക്ക് മാത്രം മംഗളൂരുവിലേക്ക് പ്രവേശനമെന്നാണ് ദക്ഷിണ കന്നഡ അധികൃതര് അറിയിച്ചിരിക്കുന്നത്.
ഒരിക്കല്മാത്രം യാത്രചെയ്യുന്നവര് 72 മണിക്കൂറിനകം പരിശോധന നടത്തിയ റിപ്പോര്ട്ടാണ് ഹാജരാക്കേണ്ടത്. നിത്യേന യാത്രചെയ്യുന്നവര് 15 ദിവസത്തിലൊരിക്കല് പരിശോധന നടത്തിയ റിപ്പോര്ട്ടും മംഗളൂരുവിലെ എവിടേക്കാണ് പോകുന്നതെന്നു തെളിയിക്കുന്ന രേഖയും കൈയില് കരുതണം. ആംബുലന്സില് രോഗികളുമായി വരുന്നവര് ആശുപത്രിയിലെത്തിയാല് ഉടന് രോഗിയെയും കൂടെ വന്നവരെയും കോവിഡ് പരിശോധനയ്ക്ക് വിധേയമാക്കണം.
Discussion about this post