ന്യൂഡൽഹി: ഏറെ അനിശ്ചിതത്വങ്ങൾക്ക് ഒടുവിൽ സിബിഎസ്ഇ 10,12 ക്ലാസുകളിലെ പരീക്ഷാ തീയതി പ്രഖ്യാപിച്ചു. മേയ് നാല് മുതലായിരിക്കും പരീക്ഷകൾ ആരംഭിക്കുകയെന്ന് കേന്ദ്ര വിദ്യാഭ്യാസമന്ത്രി രമേശ് പൊഖ്റിയാൽ അറിയിച്ചു.
മേയിൽ ആരംഭിക്കുന്ന പരീക്ഷകൾ ജൂൺ പത്തിന് ആണ് അവസാനിക്കുക. മാർച്ച് ഒന്നിന് സിബിഎസ്ഇയുടെ പ്രാക്ടിക്കൽ പരീക്ഷകൾ ആരംഭിക്കും. ജൂലായ് പതിനഞ്ചിനാണ് ഫലപ്രഖ്യാപനം.
നേരത്തെ, സിബിഎസ്ഇ 10, 12 ക്ലാസ്സുകളിലെ വാർഷിക പൊതുപരീക്ഷകൾ ഓഫ്ലൈനായിത്തന്നെ നടത്തുമെന്ന് വ്യക്തമാക്കി സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ രംഗത്തെത്തിയിരുന്നു. പരീക്ഷ കോവിഡ് മാനദണ്ഡങ്ങൾ പാലിച്ച് ഓഫ്ലൈനായി തന്നെ നടത്തുമെന്നാണ് പുറത്തിറക്കിയ പ്രസ്താവനയിൽ സിബിഎസ്ഇ അറിയിച്ചിരുന്നത്. പരീക്ഷകൾ കോവിഡ് പശ്ചാത്തലത്തിൽ ഓൺലൈനായി നടത്തുമെന്ന അഭ്യൂഹങ്ങൾക്കിടെയായിരുന്നു ബോർഡ് ഇക്കാര്യത്തിൽ വിശദീകരണം നൽകിയത്.
പരീക്ഷകൾ ഒഴിവാക്കിയേക്കുമെന്ന വാർത്തകളെ തള്ളി കേന്ദ്ര വിദ്യാഭ്യാസമന്ത്രി തന്നെ രംഗത്തെത്തിയിരുന്നു. കോവിഡ് കാലത്ത് പഠനം നടത്തിയവരെ മറ്റ് തലമുറകൾ പരിഹസിക്കാൻ ഇടവരുത്തില്ലെന്നും വൈകിയാലും പരീക്ഷ നടത്തുമെന്നുമാണ് മന്ത്രി പൊഖ്റിയാൽ അറിയിച്ചിരുന്നത്.
Discussion about this post