ന്യൂഡല്ഹി: കൊവിഡിന്റെ പശ്ചാത്തലത്തില് രാജ്യത്ത് അടച്ചിട്ട സ്കൂളുകള് ഒക്ടോബര് 15 മുതല് തുറക്കാമെന്ന് നേരത്തെ കേന്ദ്രം വ്യക്തമാക്കിയിരുന്നു. ഈ പശ്ചാത്തലത്തില് സ്കൂളുകള് തുറന്ന് പ്രവര്ത്തിക്കുന്നതിനുള്ള മാര്ഗ്ഗ നിര്ദേശം പുറത്തിറക്കി. കേന്ദ്ര വിദ്യാഭ്യാസ മന്ത്രാലയമാണ് മാര്ഗ രേഖ പുറത്തിറക്കിയത്.
കുട്ടികളെ ക്ലാസില് വരാന് നിര്ബന്ധിക്കരുത്. വീട്ടിലിരുന്ന് പഠിക്കാന് ആഗ്രഹിക്കുന്നവരെ അതിന് അനുവദിക്കണം.മാതാപിതാക്കളുടെ രേഖാമൂലമുള്ള ഉറപ്പില് മാത്രമായിരിക്കണം കുട്ടികള് സ്കൂളുകളില് എത്തേണ്ടത്. അറ്റന്റന്സിന്റെ കാര്യത്തില് കടുംപിടിത്തം പാടില്ല. തുടങ്ങിയ കാര്യങ്ങള് വ്യക്തമാക്കിയിട്ടുണ്ട്. തിരക്കൊഴിവാക്കും വിധം ക്ലാസുകള് ക്രമീകരിക്കണം. ഇരിപ്പിടങ്ങള് കൃത്യമായ അകലം ഉറപ്പാക്കി ക്രമീകരണങ്ങള് നടത്തണമെന്നും നിര്ദ്ദേശത്തില് പറയുന്നു.
വിദ്യാര്ത്ഥികള്ക്ക് ഉച്ചഭക്ഷണം നല്കണം, കുട്ടികളുടെ ആരോഗ്യം കണക്കിലെടുത്ത് എല്ലാ സംസ്ഥാനങ്ങളും കേന്ദ്ര ഭരണ പ്രദേശങ്ങളും പാകം ചെയ്ത ഉച്ച ഭക്ഷണം വിതരണം ചെയ്യണം. അല്ലെങ്കില് അതിന് തത്തുല്യമായ സാമ്പത്തിക സാമ്പത്തിക സഹായം സ്കൂളുകള്ക്ക് നല്കണം. വിദ്യാര്ത്ഥികള്ക്ക് പുതിയ അധ്യയന കാലത്തെ പരീക്ഷകള്, ഇടവേളകള് തുടങ്ങി എല്ലാ കാര്യങ്ങളെയും കുറിച്ച് വിശദീകരിച്ച് കൊടുക്കണം. സ്കൂള് തുറന്ന് രണ്ട് മൂന്ന് ആഴ്ച പരീക്ഷകള് നടത്തരുത്. സ്കൂള് തുറക്കുന്നതിന് മുന്പ് എല്ലാ കുട്ടികളുടെയും പക്കല് ടെക്സ്റ്റ്ബുക്കുകള് ഉണ്ടെന്ന് ഉറപ്പാക്കണം. കുട്ടികളും അധ്യാപകരും സ്കൂള് ജീവനക്കാരും മാസ്ക് നിര്ബന്ധമായും ധരിക്കണം. സ്കൂളുകളില് പരിപാടികളും മറ്റ് ചടങ്ങുകളും സംഘടിപ്പിക്കരുത്.
പ്രവര്ത്തി സമയങ്ങളില് മുഴുവന് വൈദ്യ സഹായം ലഭ്യമാക്കണം, സ്കൂളിലോ തൊട്ടടുത്തോ പ്രവര്ത്തി സമയത്ത് അടിയന്തിര വൈദ്യ സഹായം വേണ്ടി വന്നാല് അതിന് വേണ്ട സൗകര്യം ഒരുക്കണം. നഴ്സ്, ഡോക്ടര് എന്നിവരുടെ സേവനം ലഭ്യമാക്കണം. കൃത്യമായ ഇടവേളകളില് വിദ്യാര്ത്ഥികളിലും അധ്യാപകരിലും മെഡിക്കല് ചെക്കപ്പ് നടത്തണം. സ്കൂള് തുറക്കും മുന്പ് എല്ലാ വിദ്യാര്ത്ഥികളുടെയും അധ്യാപകരുടെയും ആരോഗ്യസ്ഥിതി എന്താണെന്ന് ചോദിച്ച് മനസിലാക്കണം. അറ്റന്റന്സിന്റെ കാര്യത്തില് കടുംപിടിത്തം പാടില്ല. സിക്ക് ലീവിന്റെ കാര്യത്തിലും വ്യക്തത വരുത്തണം. രോഗബാധിതരായ വിദ്യാര്ത്ഥികളെയും അധ്യാപകരെയും വീട്ടില് ഇരിക്കാന് പ്രോത്സാഹിപ്പിക്കണം.
ഒരു കൊവിഡ് കേസുണ്ടെന്ന് തോന്നിയാല് സര്ക്കാര് വ്യക്തമാക്കിയ പ്രോട്ടോക്കോള് പ്രകാരം നടപടിയെടുക്കണം. വീടില്ലാത്ത, ഇതര സംസ്ഥാനങ്ങളില് നിന്നോ രാജ്യങ്ങളില് നിന്നോ വന്ന വിദ്യാര്ത്ഥികള്, ശാരീരികമായി അവശത അനുഭവിക്കുന്നവര്, കൊവിഡ് ബാധ സ്ഥിരീകരിച്ചവര് എന്നിവരുടെ കാര്യം പ്രാധാന്യത്തോടെ പരിഗണിക്കണം. വിദ്യാര്ത്ഥികളോട് കൂടുതല് സൗഹാര്ദ്ദപരമായ രീതിയിലുള്ള വിശകലന പഠന സമ്പ്രദായങ്ങളില് ക്ലാസുകള് നടത്തണം. നൂതനമായ ആശയങ്ങളിലൂടെ പഠനം കൂടുതല് ഫലപ്രദമാക്കാനുള്ള മാര്ഗങ്ങള് തേടണമെന്നും നിര്ദ്ദേശത്തില് വ്യക്തമാക്കുന്നു.
Discussion about this post