ലക്നൗ: ഉത്തര്പ്രദേശിലെ ആഗ്രയില് നിര്മാണത്തിലിരിക്കുന്ന മുഗള് മ്യൂസിയത്തിന്റെ പേര് ഛത്രപതി ശിവജി മ്യൂസിയം എന്നാക്കി മാറ്റി യോഗി സര്ക്കാര്. അടിമത്ത മാനസികാവസ്ഥ വെച്ചുപുലര്ത്തുന്ന ഒന്നിനും ഉത്തര്പ്രദേശില് സ്ഥാനമില്ലെന്ന് യോഗി പറഞ്ഞു.
ആഗ്രയിലെ വികസന പ്രവര്ത്തനങ്ങള് അവലോകനം ചെയ്യാന് തിങ്കളാഴ്ച ചേര്ന്ന ഓണ്ലൈന് യോഗത്തിലാണ് മ്യൂസിയത്തിന്റെ പേര് മാറ്റാനുള്ള തീരുമാനം മുഖ്യമന്ത്രി യോഗി ആദിത്യനാഥ് പ്രഖ്യാപിച്ചത്. മുഗളന്മാര് എങ്ങനെ നമ്മുടെ നായകന്മാരാകുമെന്ന് ആദിത്യനാഥ് ചോദിച്ചു.
ഇനിമുതല് ആഗ്രയില് നിര്മാണത്തിലിരിക്കുന്ന മ്യൂസിയം ഛത്രപതി ശിവജി മഹാരാജാവിന്റെ പേരില് അറിയപ്പെടും. ശിവജി മഹാരാജാണ് നമ്മുടെ നായകനെന്നും ആദിത്യനാഥ് പറഞ്ഞു. ട്വിറ്ററിലൂടെയാണ് ഉത്തര്പ്രദേശ് മുഖ്യമന്ത്രി ഇക്കാര്യം പറഞ്ഞത്.
2015ല് അഖിലേഷ് യാദവ് സര്ക്കാരാണ് മുഗള് മ്യൂസിയം നിര്മിക്കാനുള്ള പദ്ധതിക്ക് അംഗീകാരം നല്കിയിരുന്നത്. താജ്മഹലിനോട് ചേര്ന്ന് ആറ് എക്കര് ഭൂമിയിലാണ് മ്യൂസിയത്തിന്റെ നിര്മാണം പുരോഗമിക്കുന്നത്. അധികാരത്തിലേറിയതുമുതല് ഉത്തര്പ്രദേശിലെ നിരവധി സ്ഥലങ്ങളുടെയും പൊതുമേഖലാ സ്ഥാപനങ്ങളുടെയും പേരുകള് യോഗി സര്ക്കാര് മാറ്റിയിരുന്നു.
Discussion about this post