പുതുച്ചേരി: അര്ധരാത്രി വീട്ടില് കയറിയ പാമ്പിനെ പിടികൂടാന് ആരുടെയും സഹായം ലഭിക്കാതായതോടെ വീട്ടമ്മ വിളിച്ചത് പുതുച്ചേരി മുഖ്യമന്ത്രി വി നാരായണസ്വാമിയെ. ഇതോടെ മണിക്കൂറുകള് നീണ്ട ഭയപ്പാടിന് നിമിഷങ്ങള് കൊണ്ട് ആശ്വാസമായി. അരിയാന്കുപ്പത്തുള്ള വീട്ടില് അര്ധരാത്രിക്ക് കയറിയ പാമ്പിനെ പിടിക്കാനാണ് മുഖ്യമന്ത്രി ഇടപെട്ടത്.
പോലീസിന്റെയും വനംവകുപ്പിന്റെയും സഹായം കിട്ടാതെ വന്നതോടെയാണ് വീട്ടമ്മ മുഖ്യമന്ത്രിയെ നേരിട്ട് വിളിച്ച് സഹായം അഭ്യര്ത്ഥിച്ചത്. മുഖ്യമന്ത്രി കാര്യം ഗൗരവമായി ഏറ്റെടുത്തു. നിമിഷങ്ങള്ക്കുള്ളില് വനംവകുപ്പ് ജീവനക്കാര് എത്തി പാമ്പിനെ ചാക്കിനുള്ളില് ആക്കുകയായിരുന്നു. അരിയാന്കുപ്പത്ത് താമസിക്കുന്ന രാജയുടെ വീട്ടിലാണ് ചൊവ്വാഴ്ച രാത്രി ഒരുമണിയോടെ പാമ്പിനെ കണ്ടത്. ഈ സമയം രാജ വീട്ടിലുണ്ടായിരുന്നില്ല. പാമ്പിനെ പിടിക്കാന് കഴിയാതെവന്നതോടെ രാജയുടെ ഭാര്യ വിജയ ആദ്യം വിളിച്ചത് പോലീസിനെയാണ്.
വനംവകുപ്പ് അധികൃതരെ ബന്ധപ്പെടാനായിരുന്നു മറുപടി. ഫോണ് നമ്പറും പോലീസ് നല്കി. ഈ നമ്പറില് വിളിച്ചിട്ട് ആരും ഫോണെടുത്തില്ല. തുടര്ന്നാണ് വിജയ മുഖ്യമന്ത്രിയുടെ വീട്ടിലേക്ക് വിളിച്ചത്. മുഖ്യമന്ത്രിയുടെ നമ്പറാണെന്ന് അറിയാതെയായിരുന്നു വിളിച്ചത്. വീട്ടിലുണ്ടായിരുന്ന സര്ക്കാര് ഡയറിയില് കണ്ട ആദ്യ നമ്പറില് വിളിയ്ക്കുകയായിരുന്നു. നേരമില്ലാനേരത്ത് ഫോണ് ബെല്ലടിച്ചപ്പോള് എടുത്തത് മുഖ്യമന്ത്രി തന്നെയായിരുന്നു. വിവരം പറഞ്ഞപ്പോള് ഭയപ്പെടേണ്ട ഉടന് നടപടിയെടുക്കാമെന്നായിരുന്നു പ്രതികരണം.
പിന്നീട് അധികം കാത്തിരിക്കേണ്ടി വന്നില്ല; വിജയയുടെ വീട്ടുപടിയ്ക്കല് വനം വകുപ്പ് ജീവനക്കാര് എത്തി മൂര്ഖനെ പിടികൂടി തിരികെ പോയി. ബുധനാഴ്ച രാവിലെ മുഖ്യമന്ത്രി വിളിച്ച് വനംവകുപ്പ് പാമ്പിനെ പിടികൂടിയോയെന്ന് അന്വേഷിക്കുകയും ചെയ്തു. വീടിന് സമീപം കാടുപിടിച്ച് കിടക്കുന്നതിനെ കുറിച്ചറിഞ്ഞ മുഖ്യമന്ത്രി സ്ഥലം എംഎല്എ.അനന്തരാമനോട് നേരിട്ട് പോയി അന്വേഷിക്കാനും നിര്ദേശിച്ചു.
Discussion about this post