ന്യൂഡല്ഹി: റിസര്വ് ബാങ്കിന്റെ സര്ക്കുലര് പ്രകാരം മൊറട്ടോറിയം കാലാവധി രണ്ടു വര്ഷത്തേക്ക് കൂടി നീട്ടാന് കഴിയുമെന്ന് കേന്ദ്ര സര്ക്കാര്. ചൊവ്വാഴ്ച സുപ്രീം കോടതിയെയാണ് കേന്ദ്രം ഇക്കാര്യം അറിയിച്ചത്. ഏതൊക്കെ മേഖലകളിലാണ് ആനുകൂല്യം നല്കേണ്ടത് എന്നതു സംബന്ധിച്ച് സര്ക്കാര് പഠിച്ചുവരികയാണെന്നും കേന്ദ്രം അറിയിക്കുന്നു. കേന്ദ്രത്തിന് വേണ്ടി സുപ്രീം കോടതിയില് ഹാജരായ സോളിസിറ്റര് തുഷാര് മേത്തയാണ് ഇക്കാര്യം കോടതിയിലെ അറിയിച്ചത്.
മൊറട്ടോറിയം കാലയളവില് പലിശയ്ക്ക് പലിശ നല്കുന്നത് എഴുതിത്തളളുന്നത് സംബന്ധിച്ച കോടതിയുടെ ചോദ്യത്തിന് കേന്ദ്രവും ആര്ബിഐ ബാങ്കേഴ്സ് അസോസിയേഷനും ഇക്കാര്യത്തില് ഒന്നിച്ചിരുന്ന് പരിഹാരം കാണേണ്ടതുണ്ടെന്നും അതിനായി അനുവദിക്കണമെന്നും തുഷാര് മേത്ത കോടതിയില് പറയുന്നു.
മൊറട്ടോറിയം കാലയളവില് ലോണ് തിരിച്ചടവ് സംബന്ധിച്ച് കേന്ദ്രത്തിന്റെ നിലപാട് വ്യക്തമാക്കണമെന്നും റിസര്വ് ബാങ്കിന് പിറകില് കേന്ദ്രത്തിന് ഒളിക്കാന് സാധിക്കില്ലെന്നും കഴിഞ്ഞ ആഴ്ച സുപ്രീം കോടതി കേന്ദ്രത്തോട് ആവശ്യപ്പെട്ടിരുന്നു. ഇതിന് പിന്നാലെയാണ് കേന്ദ്രം നിലപാട് വ്യക്തമാക്കിയത്.
Discussion about this post