ന്യൂഡല്ഹി: ലോക്ക്ഡൗണില് കടുത്ത ചൂടിലും സ്വന്തം നാടണയാന് എല്ലാവഴികളും തേടുകയാണ് തൊഴിലാളികള്. ദിവസങ്ങളെടുത്ത് നാട്ടിലേക്ക് നടന്നു പോകുന്നവരെ കുറിച്ചുള്ള വാര്ത്തകളാണ് ഉത്തരേന്ത്യയില് നിന്നും പുറത്തുവരുന്നത്. അത്തരത്തില് കൊടുംചൂടിലും ഏത് ദുരിതവും സഹിച്ച് ചെരുപ്പില്ലാതെ നടക്കുന്ന തൊഴിലാളിയ്ക്ക്
സ്വന്തം ഷൂ അഴിച്ചു നല്കി ശ്രദ്ധനേടിയിരിക്കുകയാണ് മാധ്യമപ്രവര്ത്തകന്. ബിബിസി റിപ്പോര്ട്ടര് സല്മാന് രവിയാണ് കുടിയേറ്റ തൊഴിലാളിക്ക് തന്റെ ചെരുപ്പഴിച്ച് നല്കിയത്.
ഹരിയാനയില് നിന്ന് സ്വദേശമായ മധ്യപ്രദേശിലെ ചത്താര്പുറിലേക്ക് കാല്നടയായി യാത്ര തുടങ്ങിയ സംഘത്തെ ഡല്ഹിയില് വെച്ചാണ് ബിബിസി സംഘം കണ്ടത്. സംസാരത്തിനിടെയാണ് സംഘത്തിലെ ഒരാളുടെ കാലില് ചെരുപ്പ് ഇല്ലെന്നത് ശ്രദ്ധയില്പ്പെട്ടത്. ചോദിച്ചപ്പോള് ചെരുപ്പ് പൊട്ടിയെന്നായിരുന്നു മറുപടി. നിങ്ങള്ക്ക് കുറേ ദൂരം പോവാനുള്ളതല്ലേ തന്റെ ഷൂ ഇട്ടോളൂ എന്ന് പറഞ്ഞുകൊണ്ട് ഉടന് തന്നെ റിപ്പോര്ട്ടര് തന്റെ കാലിലെ ഷൂ അഴിച്ച് തൊഴിലാളിക്ക് നല്കി. ചെരിപ്പിടാതെ തന്റെ റിപ്പോര്ട്ടിങ് തുടര്ന്നു.
ബിബിസി ഫേസ്ബുക്ക് പേജില് തത്സമയം പങ്കുവെച്ച വീഡിയോയില് ആളുകള് സല്മാന് രവിയെ അഭിനന്ദനം കൊണ്ട് മൂടുകയാണ്. റിപ്പോര്ട്ടറുടേത് മാതൃകാപരമായ പെരുമാറ്റം ആണെന്നാണ് സോഷ്യല് മീഡിയ ഒന്നടങ്കം പറയുന്നത്.
അതേസമയം, സര്ക്കാര് ഞങ്ങളെപ്പോലെയുള്ള പാവങ്ങളുടെ കാര്യങ്ങള് ശ്രദ്ധിക്കുന്നില്ലെന്ന് തൊഴിലാളികള് പരാതിപ്പെട്ടു. പലയിടത്തുനിന്നും പോലീസ് തങ്ങളെ മര്ദിക്കുകയാണ്. അതിര്ത്തി കടക്കാന് സമ്മതിക്കുന്നില്ല. ഭക്ഷണം പോലും കഴിക്കാന് സമ്മതിക്കുന്നില്ല. പ്രധാനമന്ത്രി ചെയ്യുന്നതെല്ലാം ശരിയാണ്, പക്ഷെ പാവങ്ങളെക്കൂടി ഓര്ക്കണമെന്ന് തൊഴിലാളികള് പറയുന്നു.
Discussion about this post