ന്യൂഡല്ഹി: രാജ്യത്ത് കൊവിഡ് 19 വൈറസ് ബാധിതരുടെ എണ്ണം വര്ധിച്ച സാഹചര്യത്തില് ജാഗ്രതയുടെ ഭാഗമായി നിര്ദേശിച്ച ലോക്ക് ഡൗണ് എല്ലാവരും ഗൗരവമായി എടുക്കണമെന്ന അഭ്യര്ത്ഥനയുമായി പ്രധാനമന്ത്രി നരേന്ദ്ര മോഡി. രാജ്യത്തെ ജനങ്ങള് ഈ അവസരത്തില് സര്ക്കാരിന്റെ നിര്ദേശങ്ങള് അനുസരിച്ച് സ്വയം രക്ഷിക്കാന് തയ്യാറാകണമെന്നും മോഡി പറഞ്ഞു.
വൈറസ് ബാധിതരുടെ എണ്ണം കൂടിയ സാഹചര്യത്തിലാണ് രാജ്യത്ത് ലോക്ക് ഡൗണ് പ്രഖ്യാപിച്ചിരിക്കുന്നത്. ഡല്ഹി, മുംബൈ, കൊല്ക്കത്ത, ചെന്നൈ, ബെംഗളൂരു അടക്കം രാജ്യത്തെ 80 നഗരങ്ങളിലും ലോക്ക് ഡൗണ് പ്രഖ്യാപിച്ചു. നേരത്തേ രോഗം സ്ഥിരീകരിച്ച രാജ്യത്തെ വിവിധ സംസ്ഥാനങ്ങളിലെ എഴുപത്തഞ്ച് ജില്ലകളിലും കഴിഞ്ഞ ദിവസം കേന്ദ്ര സര്ക്കാര് ലോക്ക് ഡൗണ് നിര്ദേശിച്ചിരുന്നു
ഇന്ന് രാവിലെ ആറ് മണി മുതല് ഡല്ഹി ലോക്ക് ഡൗണിലേക്ക് പ്രവേശിച്ചിരിക്കുകയാണ്. ഡല്ഹിയുടെ അതിര്ത്തികളെല്ലാം തന്നെ ഇതിനോടകം തന്നെ അടച്ചുകഴിഞ്ഞു. ഈ മാസം 31 വരെയാണ് ലോക്ക് ഡൗണ്. ലോക്ക്ഡൗണില് പ്രവേശിച്ചതിനാല് ഡല്ഹിയിലെ നിരത്തുകളില് കാബുകളോ ഓട്ടോകളോ ഓടിക്കാന് അനുമതിയുണ്ടാവില്ല. സ്വകാര്യ വാഹനങ്ങള്ക്കും നിരോധനം ഏര്പ്പെടുത്തിയിട്ടുണ്ട്. ‘അസാധാരണ സന്ദര്ഭങ്ങള് അസാധാരണ നടപടികളെടുപ്പിക്കുന്നു’ എന്നാണ് ഇതിനെ കുറിച്ച് കെജരിവാള് ട്വീറ്റ് ചെയ്തത്.
രാജ്യത്ത് മഹാരാഷ്ട്ര, കേരളം, ഡല്ഹി, ഗുജറാത്ത്, ഉത്തര്പ്രദേശ്, ഹരിയാന, കര്ണാടക, തെലങ്കാന, രാജസ്ഥാന്, ആന്ധ്ര പ്രദേശ്, തമിഴ്നാട്, പഞ്ചാബ്, ജമ്മു കാശ്മീര്, ലഡാക്ക്, പശ്ചിമ ബംഗാള്, ചണ്ഡീഗഢ്, ചത്തീസ്ഗഡ്, ഹിമാചല് പ്രദേശ്, മധ്യപ്രദേശ്, ഒഡീഷ, ഉത്തരാഖണ്ഡ്, പോണ്ടിച്ചേരി എന്നിവിടങ്ങളിലാണ് ഇതുവരെ വൈറസ് ബാധ സ്ഥിരീകരിച്ചത്. രാജ്യത്ത് വൈറസ് ബാധിതരുടെ എണ്ണം 400 കവിഞ്ഞിരിക്കുകയാണ്. ഇതുവരെ എട്ട്് പേരാണ് വൈറസ് ബാധമൂലം മരിച്ചത്.
Discussion about this post