കണ്ണൂര്: കീച്ചേരി പാലോട്ടുകാവില് സ്ത്രീകള്ക്ക് വിലക്കുണ്ടെന്നുള്ള വാര്ത്തകളെ തള്ളി ക്ഷേത്ര കമ്മിറ്റി ഭാരവാഹികള് രംഗത്ത്. ഇത്തരം പ്രചരണങ്ങള് വസ്തുതാവിരുദ്ധമെന്ന് കമ്മിറ്റി വ്യക്തമാക്കുന്നു. ശബരിമലയില് അശുദ്ധിയുടെ പേരിലാണ് സ്ത്രീകള്ക്ക് വിലക്കേര്പ്പെടുത്തുന്നതെങ്കില് കന്നിമൂല ഗണപതിയുടെ പേരിലാണ് പാലോട്ടുകാവില് സ്ത്രീകള്ക്ക് വിലക്ക് എന്നാണ് ചില പത്രങ്ങള് വാര്ത്ത നല്കിയത്. കീച്ചേരി പാലോട്ടുകാവില് കന്നിമൂല ഗണപതി എന്ന സങ്കല്പമേയില്ല. സ്ത്രീ പ്രവേശനത്തിന് വിലക്കുമില്ല എന്നാണ് കമ്മിറ്റി അംഗങ്ങള് വാദിക്കുന്നത്.
ഈ ക്ഷേത്രത്തിലെ പ്രധാന ആരാധനാമൂര്ത്തി പാലോട്ടു ദൈവമാണ്. പാലാഴിക്കോട്ട് ദൈവമാണ് പാലോട്ട് ദൈവം. തിരുമുറ്റം പാലാഴിയാണെന്നാണ് സങ്കല്പം. ഇവിടെ സ്ത്രീകള് മാത്രമല്ല പുരുഷന്മാരും അധികമായി പ്രവേശിക്കാറില്ല. അത് ആരും വിലക്കിയതുകൊണ്ടല്ല; എന്നാല് തുലാഭാരത്തിനും മറ്റും സ്ത്രീകള് തിരുമുറ്റത്ത് പ്രവേശിക്കാറുണ്ട്. അതിന്റെ പേരില് അയിത്തം കല്പ്പിക്കുകയോ പുണ്യാഹം തളിക്കുകയോ ഇതുവരെ ചെയ്തിട്ടില്ല. ഇപ്പോഴും തിരുമുറ്റത്ത് പ്രവേശിക്കാന് സ്ത്രീകള് തയാറാവുന്നുവെങ്കില് ആരും തടയുകയുമില്ല.
2004ലെ പുനഃപ്രതിഷ്ഠക്ക് ശേഷം സ്ത്രീകളും പുരുഷന്മാരും തിരുമുറ്റത്തിന്റെ ചുറ്റുമതിലിനു പുറത്തു നിന്നാണ് തെയ്യം കാണാറുള്ളത്. തിരുമുറ്റം ഇടുങ്ങിയതായതിനാല് തെയ്യനടത്തിപ്പിനുള്ള സൗകര്യം കണക്കിലെടുത്താണിത്. തിരുമുറ്റത്ത് ഊരയ്മക്കാരും തെയ്യ നടത്തിപ്പുകാരുമേ ഉണ്ടാകാറുള്ളൂ. തെയ്യം ഭക്തജനങ്ങള്ക്കിടയിലേക്ക് ഇറങ്ങി വരികയും അവരുടെ കൈയില് സ്പര്ശിച്ച് പ്രസാദം നല്കയും അനുഗ്രഹിക്കുകയും ചെയ്യും.
പാര്ടി ഗ്രാമമായതിനാല് സിപിഎമ്മിന്റെ നയമാണ് ക്ഷേത്രത്തില് നടപ്പാക്കുന്നതെന്ന പ്രചാരണവും വസ്തുതക്ക് നിരക്കുന്നതല്ല. ക്ഷേത്ര ഊരായ്മക്കാരായിരുന്ന കുടുക്കവളപ്പില്, നമ്പിടി, തച്ചോളി, കോറോത്ത് എന്നീ കുടുംബങ്ങള്ക്ക് ഉത്സവ നടത്തിപ്പിന് പ്രയാസമുണ്ടായപ്പോള് 1976 ല് നാട്ടുകാരെ എല്പിക്കുകയായിരുന്നു. കമ്മിറ്റിയില് വിവിധ രാഷ്ട്രീയ പാര്ട്ടി പ്രതിനിധികളുമുണ്ട്. പ്രസിഡന്റ് ഇ അനില്കുമാര് അറിയിച്ചു.
Discussion about this post