ആസിഫ് അലി ആദ്യമായി വക്കീല്‍ വേഷത്തില്‍ എത്തുന്ന ചിത്രമാണ് ‘കക്ഷി അമ്മിണിപ്പിള്ള’. ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത് ചിത്രത്തിലെ ഒരു നായിക കഥാപാത്രത്തെ അവതരിപ്പിച്ച ഫറ ഷിബലയുടെ വര്‍ക്കൗട്ട് വീഡിയോ ആണ്.
ചിത്രത്തിലെ കഥാപാത്രത്തിനായി 68 കിലോയില്‍ നിന്ന് 85 കിലോ ആക്കിയാണ് ഫറ അഭിനയിച്ചത്. ഫറയെ നേരിട്ട് അറിയുന്നവര്‍ക്ക് പോലും താരത്തിന്റെ മേക്ക് ഓവര്‍ കണ്ടപ്പോള്‍ തിരിച്ചറിയാന്‍ പറ്റിയില്ല എന്നതാണ് വാസ്തവം.
ചിത്രത്തിന്റെ ഓഡീഷനായി പോയപ്പോള്‍ തനിക്ക് 68 കിലോ ആയിരുന്നുവെന്നും പിന്നീട് ചിത്രത്തിലെ കഥാപാത്രത്തിനായി 85 കിലോ ആക്കിയത് വളരെ കഷ്ട്പ്പെട്ടാണെന്നാണ് ഫറ വീഡിയോയില്‍ പറഞ്ഞിരിക്കുന്നത്. പിന്നീട് ചിത്രത്തിന്റെ ഷൂട്ട് കഴിഞ്ഞപ്പോള്‍ 63 കിലോയായി തടി കുറയ്ക്കുകയും ചെയ്തു. കാന്തി ശിവദാസന്‍ എന്ന കഥാപാത്രത്തെയാണ് ചിത്രത്തില്‍ ഫറ അവതരിപ്പിക്കുന്നത്.
ദിന്‍ജിത്ത് അയ്യത്താന്‍ ആണ് ചിത്രത്തിന്റെ സംവിധാനം. വിജയരാഘവന്‍, ഉണ്ണിരാജ, സുധി പറവൂര്‍, നിര്‍മല്‍ പാലാഴി, ശിവദാസന്‍, ബേസില്‍ ജോസഫ്, മാമുക്കോയ, അശ്വതി മനോഹരന്‍ എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ജൂണ്‍ 28 ന് ചിത്രം തീയ്യേറ്ററുകളിലെത്തും.
