മലയാള സിനിമാ ലോകത്തെ മുതിർന്ന താരമായ കവിയൂർ പൊന്നമ്മയെ സന്ദർശിച്ച് സംവിധായകൻ ഷാജി കൈലാസും ഭാര്യയും മുൻകാല നടിയുമായ ആനിയും. ഇളയ സഹോദരനോടൊപ്പം വിശ്രമജീവിതം നയിക്കുന്ന കവിയൂർ പൊന്നമ്മയെ വീട്ടിലെത്തി സന്ദർശിക്കുകയായിരുന്നു ഇരുവരും.
പ്രിയപ്പെട്ട പൊന്നു അമ്മക്കൊപ്പം വിലപ്പെട്ട സമയം ചെലവഴിക്കാൻ സാധിച്ചതിൽ സന്തോഷമുണ്ടെന്നും ദൈവത്തിന്റെ അനുഗ്രഹം അമ്മയ്ക്ക് ഉണ്ടാകട്ടെ എന്നും ഷാജി കൈലാസ് സോഷ്യൽമീഡിയയിൽ കുറിച്ചു. ഇവർക്കൊപ്പം നിർമാതാവ് ആൽവിൻ ആന്റണിയും ഉണ്ടായിരുന്നു.
”എന്റെ പ്രിയപ്പെട്ട പൊന്നു അമ്മയോടൊപ്പം വിലപ്പെട്ട സമയം ചിലവഴിച്ചതിൽ അതിയായ സന്തോഷമുണ്ട്. ഏറെ അനുഗ്രഹീതമായ നിമിഷങ്ങളാണിത്. സർവ ശക്തൻ എന്റെ ‘പൊൻ’അമ്മയ്ക്ക് എല്ലാ ആരോഗ്യവും സന്തോഷവും നൽകി അനുഗ്രഹിക്കട്ടെ.”- എന്നാണ് ചിത്രങ്ങൾക്കൊപ്പെ ഷാജി കൈലാസ് കുറിച്ചത്.
അതേസമയം, നേരത്തെ കവിയൂർ പൊന്നമ്മ വാർധക്യ കാലത്ത് കുടുംബാംഗങ്ങളോ ബന്ധുക്കളോ ആരും നോക്കാനില്ലാതെ ഒറ്റപ്പെട്ട ജീവിതം നയിക്കുകയാണ് എന്ന തരത്തിൽ വാർത്തകൾ പ്രചരിച്ചിരുന്നു.
എന്നാൽ, താൻ തന്റെ ഇളയസഹോദരനും കുടുംബത്തിനുമൊപ്പമാണ് വർഷങ്ങളായി താമസിക്കുന്നതെന്നും അവരാണ് തന്റെ കാര്യങ്ങൾ നോക്കുന്നതെന്നും കവിയൂർ പൊന്നമ്മ വ്യക്തമാക്കിയിരുന്നു. ഒരു പണിയുമില്ലാത്ത ആളുകളാണ് തെറ്റായ വാർത്തകൾ പ്രചരിപ്പിക്കുന്നതെന്നും ഇക്കാര്യത്തിൽ കൂടുതലൊന്നും പറയുവാനില്ലെന്നുമാണ് അന്ന് താരം സ്വകാര്യ മാധ്യമത്തോട് പറഞ്ഞത്.
Discussion about this post