എക്കാലത്തെയും ക്ലാസിക് സിനിമകളില് ഒന്നായ, പി.പത്മരാജന്റെ ‘കള്ളന് പവിത്രനി’ലെ ദമയന്തി എന്ന നായികയായി നെടുമുടി വേണുവിനും ഭരത് ഗോപിക്കും സുഭാഷിണിക്കുമൊപ്പം തിളങ്ങിയ 18 വയസ്സുകാരി ബീന ജോസഫ് എന്ന ബീന കുമ്പളങ്ങിയെ മലയാളികള് മറക്കില്ല. എന്നാല് സിനിമയില് പിന്നീട് ബീനയെ ഭാഗ്യം തുണച്ചില്ല.
പുതിയ തലമുറ ബീനയെ തിരിച്ചറിയുക ‘കല്യാണരാമനി’ല് പ്യാരിയുടെ പഞ്ചാരയടിയില് മയങ്ങാത്ത ഭവാനിയെന്ന വേലക്കാരിയിലൂടെയാണ്. ഏറെക്കാലത്തെ ഇടവേളയ്ക്ക് ശേഷം മലയാള സിനിമയിലേക്ക് തിരിച്ചെത്തിയെങ്കിലും ആ രണ്ടാം വരവും അവരുടെ ജീവിതത്തില് നേട്ടമായില്ല.
പിന്നീട് ചെറിയ വേഷങ്ങളിലൂടെ നിരവധി സിനിമകളുടെ ഭാഗമാകാന് കഴിഞ്ഞെങ്കിലും ബീനയ്ക്ക് സ്വന്തമായി വീടോ സമ്പാദ്യമോ ഇല്ല. താരസംഘടനയായ അമ്മ നല്കുന്ന കൈനീട്ടം മാത്രമാണ് ഏക വരുമാനം. അത് മരുന്നിനു പോലും തികയാറില്ലന്നെ് പറയുകയാണ് ബീന.
36 വയസ്സിലായിരുന്നു ബീനയുടെ വിവാഹം. ബീനയും സാബുവും പ്രണയിച്ചാണ് വിവാഹിതരായതാണ്. എന്നാല് വാടകയ്ക്ക് താമസിച്ച വീടിന്റെ മുകള്നിലയില് നിന്ന് വീണ് സാബു മരിച്ചു. ഇതോടെ ബീന ഒറ്റയ്ക്കായി. മക്കളില്ല. ഒപ്പം രോഗങ്ങളും അവരെ കീഴടക്കിയിരിക്കുകയാണിപ്പോള്.
’25 വര്ഷത്തോളം പല സ്ഥലങ്ങളില് വാടകയ്ക്ക് താമസിക്കുകയായിരുന്നു. ഇപ്പോഴും സ്വന്തം വീട് എന്ന സ്വപ്നം പൂര്ത്തിയായിട്ടില്ല. ഒപ്പം അസുഖങ്ങളും ദുരിതങ്ങളും. എത്ര കാലം മറ്റുള്ളവരെ ബുദ്ധിമുട്ടിക്കും”- ഇടറിയ വാക്കുകളില് ബീന പറയുന്നു.
കല്യാണരാമന്, പുലിവാല് കല്യാണം, ചതിക്കാത്ത ചന്തു, സദാനന്ദന്റെ സമയം, ക്രോണിക് ബാച്ച്ലര് തുടങ്ങി നിരവധി ചിത്രങ്ങളില് അഭിനയിച്ചു. ഒന്നു രണ്ട് സീരിയലുകളിലും അഭിനയിച്ചു. ‘സദാനന്ദന്റെ സമയ’ത്തില് വെടിക്കെട്ട് ജാനു എന്ന കഥാപാത്രമായിരുന്നു. അക്കാലത്ത് അത്തരം ടൈപ്പ് റോളുകളാണ് കൂടുതല് കിട്ടിയിരുന്നതെന്നും ബീന കൂട്ടിച്ചേര്ത്തു.
സാബുവിന്റെ മരണശേഷം എങ്ങോട്ടു പോകണം എന്നറിയില്ലായിരുന്നു. ആകെ വിഷമിച്ചു പോയി. പണമൊന്നും ഉണ്ടായിരുന്നില്ല. വാടക കൊടുത്ത് നില്ക്കാനും പറ്റില്ല. അപ്പോഴാണ് ഇടവേള ബാബു എന്റെ അവസ്ഥ അറിഞ്ഞത്. അവര്ക്കൊന്നും ഞാന് ഇത്ര വിഷമത്തിലാണ് ജീവിക്കുന്നത് എന്ന് അറിയില്ലായിരുന്നു.
ഞാനാണെങ്കില് ആരോടും ഒന്നും പറഞ്ഞിട്ടുമില്ല. ഭര്ത്താവ് മരിച്ചതറിഞ്ഞ് ബാബു ഓടി വന്നു. എന്റെ സാഹചര്യം മനസ്സിലായപ്പോള് ബാബുവാണ് പറഞ്ഞത് സ്ഥലം കണ്ടു വച്ചോളൂ വീട് വച്ചു തരാന് ഏര്പ്പാട് ചെയ്യാമെന്ന്. ഇപ്പോള് ‘അമ്മ’ സംഘടന നല്കുന്ന കൈനീട്ടമുള്ളതു കൊണ്ട് പട്ടിണിയില്ലാതെ കഴിയുന്നു. മരുന്നിനും മറ്റും പലപ്പോഴും പണം തികയാറില്ല. സിനിമയില് അവസരം ലഭിച്ചിരുന്നെങ്കില് മറ്റുള്ളവരെ ആശ്രയിക്കാതെ പട്ടിണിയില്ലാതെ ജീവിക്കാമായിരുന്നു. അതു മാത്രമാണ് പ്രാര്ഥനയെന്നും ബീന പറയുന്നു.
Discussion about this post