ഇന്ത്യന് സിനിമാ പ്രേമികള് ഏറെ ആകാംഷയോടെ കാത്തിരിക്കുന്ന ‘തഗ്സ് ഓഫ് ഹിന്ദോസ്ഥാന്’ എന്ന ചിത്രത്തിന്റെ പുതിയ മേയ്ക്കിംഗ് വീഡിയോ അണിയറപ്രവര്ത്തകര് പുറത്തുവിട്ടു. സമൂഹ മാധ്യമങ്ങളില് മികച്ച പ്രതികരണമാണ് ഈ വീഡിയോയ്ക്ക് ലഭിക്കുന്നത്. നേരത്തെ പുറത്തിറങ്ങിയ ചിത്രത്തിന്റെ ട്രെയിലറിനും കാരക്ടര് പോസ്റ്ററിനും മികച്ച പ്രേക്ഷക പ്രതികരണം ലഭിച്ചിരുന്നു.
ചിത്രത്തില് ഖുദാബക്ഷ് എന്ന കഥാപാത്രത്തെയാണ് അമിതാഭ് ബച്ചന് അവതരിപ്പിക്കുന്നത്. തലപ്പാവും പടച്ചട്ടയും കൈയില് വാളുമായി നില്ക്കുന്ന ബിഗ്ബിയുടെ ചിത്രം കടല്ക്കൊള്ളക്കാരെ ഓര്മ്മിക്കുന്ന വിധത്തിലുള്ളതാണ്. കടല്ലിന്റെ പശ്ചാത്തലത്തില് ഒരുക്കുന്ന ചിത്രം ഏറെ പ്രതീക്ഷയോടെയാണ് ആരാധകര് കാത്തിരിക്കുന്നത്. കുതിരപ്പുറത്തേറി വരുന്ന അമീര്ഖാന്റെ ചിത്രവും നവമാധ്യമങ്ങളില് ശ്രദ്ധ നേടി. ഫിരംഗി എന്നാണ് അമീര്ഖാന് അവതരിപ്പിക്കുന്ന കഥാപാത്രത്തിന്റെ പേര്.
ലോകമെങ്ങുമുള്ള ബിഗ്ബി ആരാധകര് വാനോളം പ്രതീക്ഷയുമായി കാത്തിരിക്കുന്ന ബ്രഹ്മാണ്ഡ ചിത്രം ഈ വര്ഷം ബോളിവുഡില് ഏറ്റവും വലിയ മുതല് മുടക്കില് നിര്മ്മിക്കുന്ന ചിത്രം കൂടിയാണ്. വിജയ് കൃഷ്ണ ആചാര്യയാണ് ചിത്രത്തിന്റെ സംവിധായകന്.
ദംഗല് എന്ന ചിത്രത്തില് ഗീത ഫോഗട്ട് എന്ന കഥാപാത്രത്തെ അവതരിപ്പിച്ച് പ്രേക്ഷക ഹൃദയങ്ങളില് ഇടം പിടിച്ച ഫാത്തിമ സനയും ‘തഗ്സ് ഓഫ് ഹിന്ദോസ്ഥാനില് എത്തുന്നുണ്ട്. ചിത്രത്തിലെ ഫാത്തിമ സനയുടെ ക്യാരക്ടര് പോസ്റ്ററിനും പ്രേക്ഷകരില് നിന്നും മികച്ച പ്രതികരണമാണ് ലഭിച്ചത്. കണ്ണില് തീ പാറുന്ന നോട്ടവുമായാണ് ഫാത്തിമ പോസ്റ്ററില് പ്രത്യക്ഷപ്പെട്ടത്. ബിഗ് ബജറ്റ് ചിത്രമായ ‘തഗ്സ് ഓഫ് ഹിന്ദോസ്ഥാന്’ പീരിയഡ് ഡ്രാമയാണ്. ഈ വര്ഷം നവംബറില് ചിത്രം തീയ്യേറ്ററുകളിലെത്തും.
Discussion about this post