ന്യൂഡല്ഹി: ഇതുവരെ ആരും തന്നെ മോമോസ് കഴിക്കാന് ക്ഷണിച്ചിട്ടില്ലെന്ന് തുറന്നുപറഞ്ഞ് പ്രധാനമന്ത്രി നരേന്ദ്ര മോഡി. വാരണാസിയിലെ തെരുവ് കച്ചവടക്കാരനോടാണ് പ്രധാനമന്ത്രി തന്റെ പരിഭവം പറഞ്ഞത്. ഉത്തര്പ്രദേശിലെ തെരുവ് കച്ചവടക്കാരോട് വീഡിയോ കോണ്ഫറന്സ് വഴി സംസാരിക്കുകയായിരുന്നു അദ്ദേഹം.
‘വാരണാസിയില് മോമോസ് വളരെ പ്രസിദ്ധമാണെന്ന് എനിക്ക് അറിയാമെങ്കിലും ആരും എന്നെ മോമോസ് കഴിക്കാന് ക്ഷണിച്ചിട്ടില്ല…’ എന്നായിരുന്നു പ്രധാനമന്ത്രി പറഞ്ഞത്. പിന്നാലെ ‘നിങ്ങളുടെ കച്ചവടം എങ്ങനെ പോകുന്നു? ലോണ് ലഭിക്കാനായി നിങ്ങള് എത്ര ഓഫീസര്മാരെ സമീപിച്ചു? ഇപ്പോള് ദിവസേന നിങ്ങള് എത്രരൂപയാണ് സമ്പാദിക്കുന്നത്? എന്നും പ്രധാനമന്ത്രി കച്ചവടക്കാരോട് ചോദിച്ചു.
തെരുവ് കച്ചവടക്കാര്ക്കായുള്ള ആത്മനിര്ഭര് ഭാരത് പദ്ധതിയുടെ പ്രധാനമന്ത്രി സ്വനിധി സ്കീം വഴിയുള്ള വായ്പ പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു മോഡി. 300,000 തെരുവ് കച്ചവടക്കാര്ക്കാണ് വായ്പ വിതരണം ചെയ്യുന്നത്.
വായ്പയെടുത്ത തെരുവ് കച്ചവടക്കാര്ക്ക് തടസ്സരഹിതമായ സേവനങ്ങള് നല്കിയതിന് രാജ്യത്തുടനീളമുള്ള ബാങ്കിംഗ് ഉദ്യോഗസ്ഥരെ പ്രധാനമന്ത്രി പ്രശംസിച്ചു.
Discussion about this post