കണ്ണൂര്: ക്ഷേത്രത്തിലെ ഭണ്ഡാരം കുത്തിത്തുറന്ന് പണം കവര്ന്ന കള്ളന് സിസിടിവിയില് കുടുങ്ങി. കണ്ണൂര് ജില്ലയിലാണ് സംഭവം. കൂത്തുപറമ്പ് പുറക്കളം കോട്ടയം തിരൂര്ക്കുന്ന് മഹാഗണപതി ക്ഷേത്രത്തിലാണ് കവര്ച്ച നടന്നത്. കാണിക്കയിട്ട ശേഷമാണ് കള്ളന് ഭണ്ഡാരത്തിലെ പണം മോഷ്ടിച്ചത്.
ചൊവ്വാഴ്ച പുലര്ച്ചെ രണ്ട് മണിയോടെയാണ് സംഭവം. കവര്ച്ച നടത്തിയയാളുടെ ദൃശ്യങ്ങള് ക്ഷേത്രത്തില് സ്ഥാപിച്ച സിസിടിവി ക്യാമറയില് പതിയുകയായിരുന്നു. രണ്ട് തവണ ക്ഷേത്രത്തിന് മുന്നിലെത്തി നിരീക്ഷണം നടത്തിയ ശേഷം മുന്വശത്തെ ഗേറ്റ് ചാടി കടന്ന് ചുറ്റുമതിലിനു ഉള്ളില് പ്രവേശിച്ചു.
ക്ഷേത്രത്തിനു അകത്തു ഉണ്ടായിരുന്ന പാര കൊണ്ട് ഒരു ഭണ്ഡാരത്തിന്റെ പൂട്ട് തകര്ത്ത് പണം കവര്ന്നു. തുടര്ന്ന് ക്ഷേത്ര പരിസരം നിരീക്ഷിച്ച ശേഷം മറ്റൊരു ഭണ്ഡാരത്തിന്റെ പൂട്ടും തകര്ത്ത് അതില് നിന്നു പണം കവര്ന്നു.ഒരു ഭണ്ഡാരപ്പെട്ടിയില് നിന്നു പണം കവര്ന്ന ശേഷം മറ്റൊരു ഭണ്ഡാരപ്പെട്ടിയില് കാണിക്ക സമര്പ്പിച്ചാണ് ആ ഭണ്ഡാരത്തിന്റെ പൂട്ട് തകര്ത്ത് കവര്ച്ച നടത്തിയത്.
ഇതിന് പുറമേ ഭണ്ഡാരങ്ങളുടെ പൂട്ട് തകര്ക്കാന് ഉപയോഗിച്ച പാര യഥാസ്ഥാനത്ത് കൊണ്ടു വയ്ക്കുകയും ചെയ്തു. 50 മിനിറ്റ് ഓളം ക്ഷേത്രത്തില് ചെലവഴിച്ച മോഷ്ടാവ് വന്ന വഴിയിലൂടെ തന്നെയാണ് തിരിച്ചു പോയത്. ഒരു ഭണ്ഡാരത്തിന്റ പൂട്ട് ക്ഷേത്ര പരിസരത്തെ ആല്മരത്തിന്റെ ചുവട്ടില് നിന്നും കണ്ടെത്തി.
Discussion about this post