തിരുവനന്തപുരം: സംസ്ഥാനത്ത് ഇന്ന് കടകള് രാത്രി ഒമ്പതുമണി വരെ പ്രവര്ത്തിക്കാമെന്ന് മുഖ്യമന്ത്രി പിണറായി വിജയന്. ഈദുല് ഫിതര് പ്രമാണിച്ചാണ് കടകളുടെ പ്രവര്ത്തനസമയത്തില് ഇളവ് നല്കിയിരിക്കുന്നത്. അവശ്യസാധനങ്ങള് വില്ക്കുന്ന കടകള്ക്കാണ് രാത്രി ഒമ്പതു വരെ തുറക്കാന് അനുമതി.
ഞായറാഴ്ചകളില് സംസ്ഥാനത്ത് സമ്പൂര്ണ ലോക്ക് ഡൗണ് ആയിരുന്നു. എന്നാല് പെരുന്നാള് ദിനമായതിനാല് നാളെ സമ്പൂര്ണ്ണ ലോക്ക്ഡൗണില് ചില ഇളവുകള് അനുവദിക്കും. ചെറിയ പെരുന്നാളിന് മുന്നോടിയായി രാത്രികാലങ്ങളില് സാധനങ്ങള് വാങ്ങാന് വിശ്വാസികള് ഇറങ്ങാറുണ്ട്.
ഇതുപരിഗണിച്ചാണ് ഇന്ന് അവശ്യസാധനങ്ങള് വില്ക്കുന്ന കടകള് രാത്രി ഒമ്പതു വരെ തുറക്കാമെന്ന് അറിയിച്ചത്. അതേസമയം, പെരുന്നാള് നമസ്കാരം വീടുകളില് തന്നെയാകണമെന്നും ആഘോഷങ്ങള് ഒഴിവാക്കി പുറത്തിറങ്ങരുതെന്നും മുഖ്യമന്ത്രി അഭ്യര്ത്ഥിച്ചു.
കൊറോണയുടെ സാഹചര്യത്തില് ലോക്ക് ഡൗണായതിനാലാണ് പള്ളികളിലും ഈദ്ഗാഹുകളിലും ഒത്തുചേര്ന്നുള്ള പെരുന്നാള് നമസ്കാരം ഇക്കുറി ഒഴിവാക്കിയത്. പള്ളികളിലെ പെരുന്നാള് നമസ്കാരം ഒഴിവാക്കിയത് സമൂഹത്തിന്റെ സുരക്ഷയും താല്പ്പര്യവും മുന്നിര്ത്തിയാണെന്ന് മുഖ്യമന്ത്രി പറഞ്ഞു. സമത്വത്തിന്റെയും സഹനത്തിന്റെയും അനുതാപത്തിന്റെയും മഹത്തായ സന്ദേശമാണ് ഈദുല് ഫിത്ര് നല്കുന്നതെന്നും മുഖ്യമന്ത്രി പറഞ്ഞു.
Discussion about this post