തിരുവനന്തപുരം: സംഗീത സംവിധായകന് എംകെ അര്ജ്ജുനന് മാസ്റ്ററുടെ വിയോഗത്തില് അനുശോചനം അറിയിച്ച് മുഖ്യമന്ത്രി പിണറായി വിജയന്. നാടക-ചലച്ചിത്ര കലകളിലൂടെ മലയാളിക്ക് ലഭിച്ച അനശ്വര സംഗീത സംവിധായകനാണ് അര്ജുനന് മാസ്റ്റര് എന്നും അദ്ദേഹത്തിന്റെ വിയോഗം സംഗീതലോകത്തിന് മാത്രമല്ല സമൂഹത്തിനാകെ നികത്താനാവാത്ത നഷ്ടമാണെന്നും കുടുംബാംഗങ്ങളുടെ ദുഃഖത്തില് പങ്കു ചേരുന്നുവെന്നുമാണ് മുഖ്യമന്ത്രി ഫേസ്ബുക്കില് കുറിച്ചത്.
വാര്ധക്യസഹജമായ അസുഖങ്ങളെ തുടര്ന്ന് കൊച്ചി പള്ളുരുത്തിയിലെ വസതിയില് വെച്ച് ഇന്ന് പുലര്ച്ചെ മൂന്നരക്ക് ആയിരുന്നു അന്ത്യം. സംസ്കാരം ഇന്ന് ഉച്ചയ്ക്ക് രണ്ട് മണിക്ക് പുള്ളുരുത്തി ശ്മശാനത്തില് നടക്കും. 1958ല് നാടകമേഖലയിലൂടെയായിരുന്നു എംകെ അര്ജുനന് എന്ന അര്ജുനന് മാസ്റ്ററിന്റെ അരങ്ങേറ്റം. 1968ല് പി ഭാസ്കരന്റെ ‘കറുത്ത പൗര്ണ്ണമി’യിലൂടെയാണ് സിനിമയില് അരങ്ങേറ്റം കുറിച്ചത്.
2017 ല് ജയരാജ് സംവിധാനം ചെയ്ത ഭയാനകം എന്ന ചിത്രത്തിലെ എന്നെ നോക്കി എന്ന ഗാനത്തിന് അദ്ദേഹത്തിന് മികച്ച സംഗീത സംവിധായകനുള്ള സംസ്ഥാന പുരസ്കാരം ലഭിച്ചിരുന്നു. ഇന്ത്യന് സിനിമയുടെ അഭിമാനമായ എആര് റഹ്മാന്റെ ചലച്ചിത്ര മേഖലയിലേക്കുള്ള അരങ്ങേറ്റവും അര്ജുനന് മാസ്റ്റര് വഴിയായിരുന്നു. അര്ജുനന് മാസ്റ്റര്ക്കൊപ്പം കീ ബോര്ഡ് പ്ലയറായി റഹ്മാന് പ്രവര്ത്തിച്ചിട്ടുണ്ട്.
Discussion about this post