കൊച്ചി: സംസ്ഥാന സര്ക്കാരിന്റെ ലൈഫ് പദ്ധതിയുമായി ബന്ധപ്പെട്ടുള്ള ആരോപണങ്ങളെ വിമര്ശിച്ച് സിപിഐ സംസ്ഥാന സെക്രട്ടറി കാനം രാജേന്ദ്രന്. കുഞ്ഞിന് പേരിട്ടെന്ന് കരുതി കുഞ്ഞിന്റെ അവകാശം ഏറ്റെടുക്കാനാണ് പ്രതിപക്ഷവും ബിജെപിയും ശ്രമിക്കുന്നതെന്ന് കാനം വിമര്ശിച്ചു.
കേന്ദ്രത്തില് നിന്ന് ഫണ്ട് കിട്ടിയിട്ടില്ലെന്ന് പറയുന്നില്ല. പക്ഷേ വളരെ തുച്ഛമായ പങ്കാണ് നല്കിയതെന്ന് ബിജെപിയുടെ ആരോപണങ്ങള്ക്ക് മറുപടിയായി കാനം പറഞ്ഞു. ലൈഫ് പദ്ധതിയില് പ്രതിപക്ഷത്തിന്റെ ആരോപണങ്ങള്ക്ക് അര്ഥമില്ലെന്നും അദ്ദേഹം കൂട്ടിച്ചേര്ത്തു. ലൈഫ് പദ്ധതിയില് അവകാശവാദമുന്നയിച്ച് ബിജെപിയും പ്രതിപക്ഷവും നേരത്തെ രംഗത്തെത്തിയിരുന്നു.
ലൈഫ് സംസ്ഥാന സര്ക്കാരിന്റെ സ്വന്തം പദ്ധതിയായി ചിത്രീകരിക്കുകയാണെന്നായിരുന്നു കേന്ദ്രമന്ത്രി വി മുരളീധരന്റെ ആരോപണം. കേന്ദ്ര സര്ക്കാരില് നിന്നുള്ള വിഹിതം വ്യക്തമാക്കണമെന്നും മുരളീധരന് ആവശ്യപ്പെട്ടിരുന്നു. ലൈഫ് മിഷന് പദ്ധതിയില്പ്പെട്ട വീടുകളുടെ നിര്മ്മാണം സര്ക്കാരിന്റെ മിടുക്കല്ലെന്നും പിണറായി സര്ക്കാര് പദ്ധതിയെന്ന അവകാശവാദം തന്നെ വലിയ കളവാണെന്നുമായിരുന്നു രമേശ് ചെന്നിത്തലയുടെ പ്രതികരണം.
സര്ക്കാര് വിഹിതം കേവലം ഒരു ലക്ഷം രൂപ മാത്രമാണ്. പദ്ധതിക്ക് വേണ്ടി ഇന്ദിരാ ആവാസ് യോജന ഫണ്ടും തദ്ദേശ സ്ഥാപനങ്ങളിലെ ഫണ്ടും എല്ലാം ചെലവഴിച്ചാണ് വീട് നിര്മാണം. സര്ക്കാര് വിഹിതമായ ഒരു ലക്ഷം രൂപ ഇത് വരെ കിട്ടാത്ത പഞ്ചായത്തുകള് സംസ്ഥാനത്ത് ഉണ്ടെന്നും രമേശ് ചെന്നിത്തല ആരോപിച്ചു.
Discussion about this post