കാക്കനാട്: സ്കൂള്, കോളേജ് വിദ്യാര്ത്ഥികളെ ബസില് കയറിയാല് ചീത്തവിളിക്കുകയും, സീറ്റിലിരുന്നാല് വഴക്കുപറയുകയും വെയിലത്തും മഴയത്തും നിര്ത്തി, കയറ്റാതെ പോവുകയും ചെയ്യുന്ന ബസ് ജീവനക്കാരുടെ ധാര്ഷ്ട്യം ഇനി നടക്കില്ല. ഇത്തരം ബസുകാരെ പൂട്ടാന് ജില്ലാ കളക്ടര് തന്നെ രംഗത്തെത്തിയിരിക്കുകയാണ്.
തിങ്കളാഴ്ച വൈകീട്ട് ഇടപ്പള്ളി ചങ്ങമ്പുഴ പാര്ക്ക് ബസ് സ്റ്റോപ്പില് നടത്തിയ മിന്നല് പരിശോധനയിലാണ് കുട്ടികളെ അവഗണിക്കുന്ന ബസുകള്ക്ക് മൂക്കുകയറിടുന്ന ദൗത്യം കളക്ടര് എസ് സുഹാസ് ഏറ്റെടുത്തത്. തൊട്ടടുത്തുള്ള ഹയര് സെക്കന്ഡറി സ്കൂളിലെ വിദ്യാര്ഥികളില് നിന്നു ലഭിച്ച പരാതിയുടെ അടിസ്ഥാനത്തിലാണ് ഈ സ്റ്റോപ്പിലേക്ക് കളക്ടര് എത്തിയത്.
ബസ് സ്റ്റോപ്പില് കളക്ടറെ കണ്ടപ്പോള് വിദ്യാര്ഥികള്ക്കും യാത്രക്കാര്ക്കും അദ്ഭുതം തോന്നി. കളക്ടറെ കണ്ട് ബസ് ജീവനക്കാരും ഒന്നു ഞെട്ടി. കളക്ടര് സ്റ്റോപ്പിലുണ്ടെന്ന് കണ്ടതോടെ ബസുകളെല്ലാം സ്റ്റോപ്പില് നിര്ത്തി വിദ്യാര്ത്ഥികളെ കയറ്റാനും തുടങ്ങി. ബസുകള് പരിശോധിച്ച കളക്ടര് സ്റ്റോപ്പില് നിര്ത്തണമെന്നും കുട്ടികളോട് മാന്യമായി പെരുമാറണമെന്നും ആവശ്യപ്പെട്ടു.
കൂടാതെ, കണ്സെഷന് നിഷേധിക്കുന്ന ബസുകള്ക്കെതിരെ നടപടി എടുക്കുമെന്ന മുന്നറിയിപ്പും നല്കി. വിദ്യാര്ത്ഥികളുടെ പരാതികള് ആര്ടിഒയ്ക്ക് കൈമാറിയ കളക്ടര്, തുടര് ദിവസങ്ങളിലും പരിശോധന നടത്തുമെന്നും അറിയിച്ചു.
അതേസമയം, ചുമതല ഏറ്റ ദിവസം മുതല് പല കോണില് നിന്നും കേള്ക്കുന്നതാണ് വിദ്യാര്ത്ഥികളോടുള്ള ബസ് ജീവനക്കാരുടെ അവഗണനയെന്ന് കളക്ടര് പറഞ്ഞു. ഇതിന് ശാശ്വത പരിഹാരം കാണും. ബസ് കയറാന് നില്ക്കുന്ന കുട്ടികളെ കാണുമ്പോള് വീട്ടിലുള്ള കുട്ടികളുടെ മുഖം ഓര്ക്കണമെന്നാണ് ബസ് മുതലാളിമാരോടും തൊഴിലാളികളോടുമുള്ള തന്റെ അഭ്യര്ത്ഥനയെന്ന് കളക്ടര് പറഞ്ഞു.
Discussion about this post