കോട്ടയം: കുളിക്കാന് പോയപ്പോള് ഊരിവെച്ച സ്വര്ണ്ണാഭരണങ്ങള് കാണാതായ സംഭവത്തില് അന്വേഷണം നടത്തി വന്നപ്പോള് അറസ്റ്റിലായത് മകന്. അയര്ക്കുന്നം സ്വദേശിയായ ആല്ബിന്(21) ആണ് അറസ്റ്റിലായത്. കഴിഞ്ഞ ശനിയാഴ്ചയായിരുന്നു സംഭവം. ജോലി കഴിഞ്ഞെത്തിയ അമ്മ വളയും മോതിരവും വീട്ടിനുള്ളില് ഊരിവെച്ച് പുറത്തുള്ള കുളിമുറിയില് കുളിക്കാന് പോയി. ആ സമയം മകന് വരാന്തയില് ഇരിക്കുന്നുണ്ടായിരുന്നു.
ശേഷം കുളി കഴിഞ്ഞെത്തിയപ്പോള് ആഭരണങ്ങള് കണ്ടില്ല. തുടര്ന്നാണ് പോലീസില് പരാതി നല്കിയത്. എന്നാല് സംഭവം നടന്ന് അടുത്ത ദിവസം തന്നെ മകന് അവിടെ നിന്നും സ്ഥലം വിട്ടിരുന്നു. മകന് ചെന്നൈയില് പഠിക്കാന് പോയെന്നാണ് മാതാപിതാക്കള് പോലീസിനോട് പറഞ്ഞത്. എന്നാല് സംശയം തോന്നിയ പോലീസ് ആല്ബിന്റെ മൊബൈല് ടവര് ലൊക്കേഷന് കേന്ദ്രീകരിച്ച് രഹസ്യാന്വേഷണം നടത്തി.
സൈബര് സെല്ലിന്റെ സഹായത്തോടെ നടത്തിയ അന്വേഷണത്തില് കോട്ടയത്തും തുടര്ന്ന് എറണാകുളത്തും ഇയാളുടെ ഫോണ് കോളുകള് കണ്ടെത്തിയിട്ടുണ്ട്. തുടര്ന്നു സൈബര് സെല്ലിന്റെ സഹായത്തോടെ പാലക്കാട്ടെ ലോഡ്ജില് മുറിയെടുത്ത് വിശ്രമിക്കുകയായിരുന്ന യുവാവിനെ പിടികൂടുകയായിരുന്നു. മോഷ്ടിച്ച ഒരു വള വിറ്റ് 50000 രൂപ ഇയാള് കൈക്കലാക്കിയിരുന്നു. സംഭവം അറിഞ്ഞതിന്റെ അമ്പരപ്പിലാണ് വീട്ടുകാര്. പ്രതി സ്വന്തം മകനാണെന്ന് അറിഞ്ഞതോടെ വീട്ടുകാര് കേസ് ഒഴിവാക്കി.
Discussion about this post