ദുബായ്: ദുബായിയില് ശസ്ത്രക്രിയക്ക് വിധേയമായ യുവതി കോമയിലായെന്ന് ഹെല്ത്ത് അതോരിറ്റി സ്ഥിരീകരിച്ചു. മൂക്കിന്റെ സൗന്ദര്യം കൂട്ടാനുള്ള ശസ്ത്രക്രിയക്കിടെയാണ് 24കാരിയായ സ്വദേശിക്ക് ഹൃദയസ്തംഭനവും മസ്തിഷ്കാഘാതവുമുണ്ടായത്.
അതീവ ഗുരുതരാവസ്ഥയില് തീവ്ര പരിചരണ വിഭാഗത്തില് പ്രവേശിപ്പിച്ചിരിക്കുന്ന യുവതിക്ക് 16 ദിവസം കഴിഞ്ഞിട്ടും ബോധം തെളിഞ്ഞിട്ടില്ലെന്ന് ആശുപത്രി വൃത്തങ്ങള് അറിയിച്ചു. ദുബായിലെ ഫസ്റ്റ് മെഡ് ഡേ സര്ജറി സെന്ററിലാണ് ശസ്ത്രക്രിയ നടത്തിയത്. ഡോക്ടര്മാരുടെ ഗുരുതര പിഴവുകളാണ് ഇത്തരമൊരു അവസ്ഥയിലേക്ക് നയിച്ചതെന്ന വിലയിരുത്തലിന്റെ അടിസ്ഥാനത്തില് അന്വേഷണം അവസാനിക്കുന്നത് വരെ ഈ കേന്ദ്രത്തില് എല്ലാ ശസ്ത്രക്രിയകള്ക്കും വിലക്ക് ഏര്പ്പെടുത്തി.
കോമയിലായ യുവതിക്ക് ശസ്ത്രക്രിയ നടത്തിയ ഇഎന്ടി സ്പെഷ്യലിസ്റ്റും അനസ്തേഷ്യ വിദഗ്ധനും രോഗികളെ പരിശോധിക്കുന്നതിന് വിലക്കേര്പ്പെടുത്തിയിട്ടുണ്ട്. അതേസമയം യുവതിക്ക് അനസ്തേഷ്യ നല്കിയ സമയവും ഓരോ സമയത്തെയും ശാരീരിക അവസ്ഥകള് രേഖപ്പെടുത്താത്തിന് പുറമെ രക്തസമ്മര്ദ്ദം കുറഞ്ഞപ്പോഴും ഹൃദയത്തിന്റെ പ്രവര്ത്തനം നിലച്ചപ്പോഴുമുള്ള വിവരങ്ങളും രേഖപ്പെടുത്തിയിരുന്നില്ല.
ശസ്ത്രക്രിയക്കിടെ രോഗിയുടെ അവസ്ഥ മോശമാവാന് തുടങ്ങിയപ്പോള് അതിനെതിരായ ചികിത്സ നല്കുന്നതിനും വേണ്ടത്ര രേഖകളില്ലാലത്തത് തടസമായി. രോഗിയെ വേറെ ആശുപത്രിയിലേക്ക് മാറ്റിയപ്പോഴും രേഖകളൊന്നും ഉണ്ടായിരുന്നില്ല.
Discussion about this post