കോഴിക്കോട്; എന്ഡിഎ സ്ഥാനാര്ത്ഥി സുരേഷ് ഗോപി തെരഞ്ഞെടുപ്പ് ചട്ടം ലംഘിച്ചിട്ടില്ലെന്ന് ബിജെപി സംസ്ഥാന പ്രസിഡണ്ട് പിഎസ് ശ്രീധരന്പിള്ള. അയ്യപ്പന്റെ പേരില് വോട്ട് ചോദിക്കുന്നത് തെറ്റാണ്, എന്നാല് സുരേഷ് ഗോപി അയ്യപ്പന്റെ പേരില് വോട്ടു ചോദിച്ചിട്ടില്ലെന്ന് ശ്രീധരന്പിള്ള പറഞ്ഞു. കളക്ടര് അയച്ച നോട്ടീസിന് നിയമപരമായി മറുപടി നല്കുമെന്നും ശ്രീധരന്പിള്ള കോഴിക്കോട് പറഞ്ഞു.
അതേ സമയം സുരേഷ് ഗോപിക്ക് തെരഞ്ഞെടുപ്പ് ചട്ടലംഘനം നടത്തിയെന്ന് കാണിച്ച് നോട്ടീസ് നല്കിയതിന് കളക്ടര് അനുപമയെ ബിജെപി നേതാക്കള് രൂക്ഷമായ രീതിയിലാണ് വിമര്ശിച്ചത്. എന്നാല് ഈ വിമര്ശനങ്ങളോട് പ്രതികരിക്കാന് ഇല്ലെന്നാണ് കളക്ടര് അനുപമ പ്രതികരിച്ചത്. തന്റെ ജോലി ചെയ്യുക മാത്രമാണ് ചെയ്തതെന്നും അനുപമ വ്യക്തമാക്കി.
അതേസമയം, തനിക്ക് ലഭിച്ച നോട്ടീസിന് മറുപടി നല്കുമെന്ന് തൃശ്ശൂര് എന്ഡിഎ സ്ഥാനാര്ത്ഥിയും എംപിയും സുരേഷ് ഗോപി പറഞ്ഞു. എന്തെങ്കിലും വീഴ്ച സംഭവിച്ചിട്ടുണ്ടെങ്കില് പാര്ട്ടി പരിശോധിക്കും. അയ്യന്റെ അര്ത്ഥം അവര് അന്വേഷിക്കട്ടെ. എന്താണ് പറഞ്ഞതെന്ന് കൃത്യമായ ബോധ്യമുണ്ട്. ചട്ടലംഘനം നടത്തിയിട്ടില്ലെന്നും സുരേഷ് ഗോപി തൃശ്ശൂരില് മാധ്യമങ്ങളോട് പറഞ്ഞു. ഇപ്പോള് ഇഷ്ട ദേവന്റെ പേര് പോലും മാധ്യമങ്ങള്ക്ക് മുന്നില് പറയാന് പറ്റാത്ത അവസ്ഥയാണെന്നും സുരേഷ് ഗോപി പറഞ്ഞു.
Discussion about this post