തേഞ്ഞിപ്പാലം: കാലിക്കറ്റ് സര്വ്വകലാശാല ക്യാംപസില് ഉദ്ഘാടനം കാത്തുകിടക്കുന്ന നീന്തല്ക്കുളത്തില് നീന്തിതുടിച്ച് ആ കര്മ്മം അങ്ങ് നിര്വ്വഹിച്ച് ഒരു പറ്റം വിദ്യാര്ത്ഥികള്. അവധി ദിവസങ്ങളിലും രാത്രിയിലുമാണ് കുളത്തില് എത്തി നീന്തി തുടിച്ചാണ് വിരുതന്മാര് പണി പറ്റിച്ചത്.
കഴിഞ്ഞ 28നാണ് മുഖ്യമന്ത്രി പിണറായി വിജയന് ഉദ്ഘാടനം ചെയ്യാനിരുന്നത് അദ്ദേഹത്തിന്റെ അസൗകര്യം കാരണം അന്ന് അത് നടന്നില്ല. അടുത്ത 15ന് അകം മുഖ്യമന്ത്രിയുടെ തീയ്യതിക്കായി ശ്രമിച്ചതും ഫലം കണ്ടില്ല. ഈ മാസം തന്നെ പുതുവര്ഷ സമ്മാനമായി നീന്തല്ക്കുളം സമര്പ്പിക്കാനാകുമോ എന്നാണ് അധികൃതരുടെ നോട്ടം. അഞ്ചരക്കോടി രൂപ ചെലവിലാണ് രാജ്യാന്തര നിലവാരമുള്ള നീന്തല്ക്കുളം നിര്മിച്ചത്. പക്ഷേ, ചുറ്റുമതില് ഉയരം കുറവാണ്. ഇതാണ് വിദ്യാര്ത്ഥികള്ക്ക് അവസരമുണ്ടായത്.
25 ലക്ഷം ലീറ്റര് വെള്ളം നീന്തല്ക്കുളത്തില് തെളിഞ്ഞുകിടക്കുന്നത് കണ്ടാല് ആര്ക്കുമൊന്ന് ഇറങ്ങി നീന്തി തുടിച്ച് കയറുവാനൊക്കെ തോന്നും. പക്ഷേ, അനധികൃത നീന്തല് തുടര്ന്നാല് ജലജന്യ രോഗങ്ങള്ക്ക് സാധ്യത ഉണ്ടെന്നാണ് ബന്ധപ്പെട്ടവരുടെ ഭയം. ഉദ്ഘാടനശേഷം വെള്ളം അപ്പപ്പോള് ശുദ്ധീകരിക്കും. ഇപ്പോള് വെറുതെ നിറച്ചതാണ്. അനധികൃത കുളി തടയാന് പോലീസ് സഹായം തേടാനാണ് ഇപ്പോള് അധികൃതരുടെ ശ്രമം.
ഉദ്ഘാടനം കഴിഞ്ഞാല് നീന്തല് പരിശീലനത്തിന് നിശ്ചിത വാടകയ്ക്ക് കുളം വിട്ടുനല്കും. സ്റ്റാര്ട്ടിങ് ബ്ലോക്ക്, ട്രാക്ക് ലൈന് എന്നിവ കൂടി തയാറാക്കിയാല് നീന്തല്ക്കുളം പൂര്ണ്ണ പ്രവര്ത്തനസജ്ജമാകും. വൈകാതെ പുരുഷ, വനിതാ നീന്തല് പരിശീലകരെ നിയമിക്കും. നീന്തല് വിദഗ്ധരായ പമ്പ് ഓപ്പറേറ്റര്, ശുചീകരണത്തൊഴിലാളികള് എന്നിവരെ നീയമിക്കാനും നടപടി തുടങ്ങിയിട്ടുണ്ട്. 10 ട്രാക്ക് ആണ് കുളത്തിന്. നീളം 50 മിറ്റര്. മത്സരക്കുളത്തിന് 2 മീറ്റര് ആഴമുണ്ട്. വാംഅപ് കുളത്തിന് 90 സെന്റിമീറ്റര് മുതല് 1.75 മീറ്റര് വരെയാണ് ആഴം.
Discussion about this post