45 th president of usa
Posted by
20 January

അമേരിക്കയുടെ 45ാമത് പ്രസിഡന്റായി ഡൊണാള്‍ഡ് ട്രംപ് ഇന്ന് ചുമതലയേല്‍ക്കും

വാഷിങ്ങ്ടണ്‍: അമേരിക്കയുടെ 45ാമത് പ്രസിഡന്റായി ഡൊണാള്‍ഡ് ട്രംപ് ഇന്ന് ചുമതലയേല്‍ക്കും.ചടങ്ങിനായി കാപ്പിറ്റോള്‍ ഹില്‍ ഒരുങ്ങിക്കഴിഞ്ഞു.അമേരിക്കന്‍ ഭരണഘടന അനുസരിച്ചാണ് നാലുവര്‍ഷം കൂടുമ്പോള്‍ ജനുവരി 20ന് പ്രസിഡന്റിന്റെ സത്യപ്രതിജ്ഞാച്ചടങ്ങ് നടക്കുക. മാര്‍ച്ച് നാലിനായിരുന്ന ചടങ്ങ് 1933ലാണ് ഭരണഘടനഭേദഗതിയോടെ ജനുവരി നാലിലേക്ക് മാറ്റിയത്.

ജനപ്രതിനിധിസഭയുടെ ആസ്ഥാനമായ കാപ്പിറ്റോള്‍ ഹില്ലിന്റെ പടവുകളിലാണ് ചടങ്ങ്. രാവിലെ വൈറ്റ്ഹൗസിനടുത്തെ സെന്റ് ജോണ്‍സ് പള്ളിയിലെ പ്രാര്‍ത്ഥനക്ക് ശേഷം നിയുക്ത പ്രസിഡന്റും ഭാര്യയും പ്രസിഡന്റ് ഒബാമയും മിഷേലുമൊത്താണ് പ്രഭാതഭക്ഷണം കഴിക്കുക. കാപ്പിറ്റോള്‍ ഹില്ലിലേക്കുള്ള യാത്രയില്‍ രണ്ടുപേരും ട്രംപിനെ അനുഗമിക്കും.

പ്രാദേശിക സമയം 9.30ക്ക് സംഗീതപരിപാടികളോടെ ഉദ്ഘാടനവേദി സജീവമാകും. ഇന്ത്യന്‍ സമയം രാത്രി 10 മണിയോടെയാണ് ഉദ്ഘാടനചടങ്ങ് തുടങ്ങുക. ആദ്യം സുപ്രീംകോടതി ചീഫ് ജസ്റ്റിസ് വൈസ് പ്രസിഡന്റിന് സത്യപ്രതിജ്ഞാവാചകം ചൊല്ലികൊടുക്കും. പിന്നീട് ഡൊണാള്‍ഡ് ട്രംപ് സ്ഥാനമേല്‍ക്കും. അതുകഴിഞ്ഞ് ഉദ്ഘാടനപ്രസംഗം. മുന്‍ പ്രസിഡന്റുമാരായ ജോര്‍ജ് ഡബ്ല്യൂ ബുഷ്, ബില്‍ ക്ലിന്റണ്‍ എന്നിവരും ഭാര്യമാര്‍ക്കൊപ്പം ചടങ്ങില്‍ പങ്കെടുക്കും.

obama step down
Posted by
20 January

ബറാക് ഒബാമ പടിയിറങ്ങുന്നു: അമേരിക്കയ്ക്ക് തീരാ നഷ്ട്ം

വാഷിങ്ങ്ടണ്‍: ബറാക് ഒബാമ പ്രസിഡന്റ് സ്ഥാനമൊഴിയുന്നു. രണ്ടു ഭരണകാലാവധിക്കുശേഷം ഒബാമ പടിയിറങ്ങുമ്പോള്‍ അമേരിക്കയ്ക്ക് തീരാനഷ്ടമാണ്. പക്ഷേ ആരോപണങ്ങളും അത്ര കുറവല്ല.

ഏതാണ്ട് 18 ലക്ഷം പേര്‍ 2008ലെ ഒബാമയുടെ സത്യപ്രതിജ്ഞാ ചടങ്ങ് കാണാനെത്തി. അമേരിക്കയുടെ വെള്ളിവെളിച്ചമായിരുന്നു കെനിയക്കാരന്‍ അച്ഛന്റെയും വെളുത്ത വര്‍ഗക്കാരി അമ്മയുടേലും മകനായ ബറാക് ഒബാമ ഓരോ പൗരന്റെയും ഉള്ളറിഞ്ഞ ഭരാണാധികാരിയായിരുന്നു.ഒബാമ സ്ഥാനമേല്‍ക്കുമ്പോള്‍ അമേരിക്കയുടെ സമ്പദ്‌രംഗം കടുത്ത പ്രതിസന്ധിയുടെ പിടിയിലായിരുന്നു. പരിഹാരമായി നടപ്പാക്കിയ ഉത്തേജകപാക്കേജായിരുന്നു ഒബാമയുടെ ഓരോ കാല്‍വെയ്പ്പുകളും.

Italy earthquake
Posted by
19 January

ഭൂകമ്പത്തില്‍ ഇറ്റലിയിലെ മഞ്ഞുമല ഇടിഞ്ഞുവീണ് ഹോട്ടല്‍ തകര്‍ന്നു; നിരവധിപേര്‍ മരിച്ചു

റോം: മധ്യ ഇറ്റലിയിലെ മലനിരകളില്‍ ഭൂകമ്പത്തെ തുടര്‍ന്നുണ്ടായ ഹിമപാതത്തില്‍ ഹോട്ടല്‍ തകര്‍ന്നു. നിരവധി പേര്‍ മരിച്ചതായാണ് സംശയം. കാണാതായ മുപ്പതോളം പേര്‍ക്കായി തെരച്ചില്‍ തുടരുകയാണ്. ഒരാളുടെ മൃതദേഹം മാത്രമാണ് രക്ഷാപ്രവര്‍ത്തകര്‍ നീണ്ടനേരത്തെ തെരച്ചിലിനൊടുവില്‍ കണ്ടെത്തിയിരിക്കുന്നത്.

മഞ്ഞുമലയ്ക്കടിയില്‍ പെട്ട് കൂടുതല്‍ പേര്‍ മരിച്ചിരിക്കാനാണ് സാധ്യതയെന്ന് രക്ഷാപ്രവര്‍ത്തകര്‍ പറയുന്നു. 20 വിനോദ സഞ്ചാരികളും 7 ജീവനക്കാരും അടക്കം 30ഓളം പേര്‍ ഹോട്ടലില്‍ ഉണ്ടായിരുന്നതായാണ് പ്രാഥമിക കണക്ക്. അബ്രൂസോ മേഖലയിലെ ഗ്രാന്‍ സാസ്സോ പര്‍വ്വതത്തിലുള്ള മഞ്ഞുമലയാണ് ആഡംബര ഹോട്ടലായ റിഗോപിയാനോയില്‍ പതിച്ചത്.
ബുധനാഴ്ച മധ്യ ഇറ്റലിയിലെ പര്‍വ്വത മേഖലയില്‍ രൂപപ്പെട്ട തുടര്‍ ഭൂചലനങ്ങളാണ് ഹിമപാതത്തിന് ഇടയാക്കിയത്. വിദേശ ടൂറിസ്റ്റുകളടക്കം 30ഓളം പേരാണ് മലമുകളിലെ സ്പായിലുണ്ടായിരുന്നത്. പ്രാദേശിക സമയം ബുധനാഴ്ച രാത്രിയായിരുന്നു അപകടം. അപകടത്തില്‍ നാല് നിലയുള്ള ഹോട്ടല്‍ പൂര്‍ണമായും തകര്‍ന്നിരിക്കുകയാണ്.

സമുദ്രനിരപ്പില്‍ നിന്നും 1200 മീറ്റര്‍ ഉയരത്തിലുള്ള ഹോട്ടലിലേക്ക് കനത്ത മഞ്ഞുവീഴ്ച കാരണം ഏറെ സമയമെടുത്താണ് രക്ഷാപ്രവര്‍ത്തന സംഘത്തിനെത്താനായത്. അതിനാല്‍ തന്നെ മഞ്ഞിനടിയില്‍പ്പെട്ടവരെ ജീവനോടെ കണ്ടെത്താനാകുമെന്ന പ്രതീക്ഷ കുറവാണെന്ന് രക്ഷാപ്രവര്‍ത്തകര്‍ അറിയിച്ചിരിക്കുകയാണ്.

suicide attempt aginst trump’s president position
Posted by
19 January

പ്രസിഡന്റ് സ്ഥാനം ഏറ്റെടുക്കുന്നതിനെതിരെ പ്രതിഷേധം ശക്തം; ട്രംപിനെ താഴെയിറക്കാന്‍ ആത്മഹത്യാ ശ്രമം

വാഷിംഗ്ടണ്‍: പുതിയ അമേരിക്കന്‍ പ്രസിഡന്റ് സ്ഥാനാരോഹണത്തിന് മണിക്കൂറുകള്‍ മാത്രം ബാക്കി നില്‍ക്കെ ഡൊണാള്‍ഡ് ട്രംപിനെതിരെ സ്വയം തീ കൊളുത്തി അമേരിക്കക്കാരന്റെ പ്രതിഷേധം. ട്രംപിന്റെ വാഷിംഗ്ടണ്‍ ഡിസിയിലെ ഹോട്ടല്‍ ട്രംപ് ഇന്റര്‍നാഷണലിന് തൊട്ടടുത്ത് ഒരു 45 കാരനാണ് ആത്മാഹൂതിക്ക് ശ്രമിച്ചത്. പക്ഷേ ഇയാളെ ഇതുവരെ തിരിച്ചറിഞ്ഞിട്ടില്ല.

പ്രസിഡന്റ് സ്ഥാനമേല്‍ക്കുന്നതിന് തൊട്ടുമുമ്പായി പ്രതിഷേധിക്കാനാണ് താന്‍ ഈ മാര്‍ഗ്ഗം അവലംബിച്ചതെന്ന് ഇയാള്‍ വ്യക്തമാക്കി. ഇയാളുടെ പുറത്തേക്ക് തീ പടരുകയായിരുന്നു. രാത്രി 9.30 യ്ക്ക് നടന്ന സംഭവത്തില്‍ കാലിഫോര്‍ണിയക്കാരനായ ഇയാള്‍ക്ക് പത്തു ശതമാനം പൊള്ളലേറ്റു. പുറത്താണ് പൊള്ളല്‍ പിന്നീട് പോലീസ് എത്തി ആശുപത്രിയിലേക്ക് കൊണ്ടുപോയെങ്കിലും ജീവഹാനി സംഭവിക്കുന്ന രീതിയില്‍ ഇയാള്‍ക്ക് പൊള്ളലേറ്റിട്ടില്ല. അതേസമയം ഇയാളെ അറസ്റ്റ് ചെയ്തിട്ടില്ലെന്ന് വാഷിംഗ്ടണ്‍ ഡി സി പോലീസ് വ്യക്തമാക്കി. അമേരിക്കന്‍ ഭരണഘടനയെ ബഹുമാനിച്ച നാം പൂര്‍ണ്ണമായും കഴിവില്ലാത്ത ഒരാളെ തെരഞ്ഞെടുത്തതിനാണ് തന്റെ പ്രതിഷേധമെന്ന് ഇയാള്‍ പറഞ്ഞു.

ഒരു ലൈറ്റര്‍ ഉപയോഗിച്ചായിരുന്നു ഇയാള്‍ തീ കൊളുത്തിയത്. തുടക്കത്തില്‍ സ്വന്തം വസ്ത്രങ്ങള്‍ കത്തിച്ച പ്രതിഷേധം തുടങ്ങിയ ഇയാള്‍ പിന്നീട് സ്വയം തീ കൊളുത്തുകയായിരുന്നു. പിന്നീട് ഇയാള്‍ നിലത്ത് കിടന്നു. വെള്ളിയാഴ്ച സ്ഥാനാരോഹണത്തിനായി വൈറ്റഹൗസിലേക്കുള്ള ട്രംപിന്റെ പരേഡ് റൂട്ടില്‍ ട്രംപ് ഇന്റര്‍നാഷണല്‍ ഹോട്ടലിന് മുന്നിലൂടെയുള്ള പാത കൂടിയുണ്ട്. അതേസമയം സ്ഥാനാരോഹണം അടുക്കുമ്പോള്‍ ട്രംപിനെതിരേ പ്രതിഷേധവും കൂടുകയാണ്.

ഈ ആഴ്ച അവസാനം മാത്രം വിവിധ പ്രതിഷേധങ്ങളിലായി നാലു ലക്ഷം പേരാണ് വാഷിംഗ്ടണ്‍ ഡിസിയില്‍ പങ്കെടുത്തത്. ശനിയാഴ്ച വാഷിംഗ്ടണില്‍ നടക്കാനിരിക്കുന്ന വനിതകളുടെ മാര്‍ച്ചില്‍ ഇതിന്റെ പകുതി ആള്‍ക്കാര്‍ പങ്കെടുക്കും എന്നാണ് കരുതുന്നത്. ചൊവ്വാഴ്ച ഇവാന്‍കാ ട്രംപിന്റെ മാന്‍ഹട്ടനിലെ വീടിന് മുന്നിലൂടെ അവരെ പരിഹസിച്ച് പ്രതിഷേധം നടന്നിരുന്നു.

Obama thanks Modi
Posted by
19 January

സ്ഥാനം ഒഴിയുന്ന ഒബാമ പ്രധാനമന്ത്രി മോഡിയെ നന്ദി അറിയിച്ചു

വാഷിങ്ടണ്‍: സ്ഥാനം ഒഴിയുന്ന അമേരിക്കന്‍ പ്രസിഡന്റ് ബരാക്ക് ഒബാമ ഇന്ത്യന്‍ പ്രധാനമന്ത്രി നരേന്ദ്ര മോഡിയോട് തന്റെ നന്ദി അറിയിച്ചു. മോഡിയെ ടെലിഫോണില്‍ വിളിച്ചാണ് ഇന്ത്യ- അമേരിക്ക ബന്ധം മെച്ചപ്പെടുത്തിയതിന് മോഡിക്ക് നന്ദി അറിയിച്ചത്.

പ്രതിരോധം, സിവില്‍ ആണവ ഊര്‍ജം, രാജ്യാന്തര സഹകരണം തുടങ്ങിയ മേഖലകളില്‍ ഇരുരാജ്യങ്ങളും തമ്മിലുള്ള ബന്ധം മെച്ചപ്പെടുത്താന്‍ കൈക്കൊണ്ട പ്രവര്‍ത്തനങ്ങള്‍ക്ക് ഒബാമ മോഡിയെ നന്ദി അറിയിച്ചു. ഇന്ത്യ അമേരിക്കയുടെ പ്രധാന പ്രതിരോധ പങ്കാളിയായി മാറുന്ന സാഹചര്യത്തില്‍ ഇരു രാജ്യങ്ങളും തമ്മില്‍ സാമ്പത്തിക- സുരക്ഷാ മേഖലകളിലുള്ള ബന്ധത്തിന്റെ പുരോഗതി ഇരുവരും ചര്‍ച്ച ചെയ്തു.

2014ല്‍ മോഡി പ്രധാനമന്ത്രിയായി തിരഞ്ഞെടുക്കപ്പെട്ട വേളയില്‍ ആദ്യം അഭിനന്ദനം അറിയച്ച നേതാക്കളിലൊരാളും ഒബാമ ആയിരുന്നു. ഇതിന് ശേഷം ഏഴുതവണ മോഡിയും ഒബാമയും തമ്മില്‍ കൂടിക്കാഴ്ച നടത്തി.

Obama’s farewell speech
Posted by
19 January

എഴുത്തും വായനയും എല്ലാമായി മക്കള്‍ക്കൊപ്പം സമയം ചിലവിടാനാണ് ഇനി പദ്ധതിയെന്ന് ഒബാമ

വാഷിങ്ടണ്‍: ഇനിയുള്ള സമയം എഴുത്തും വായനയും എല്ലാമായി മക്കള്‍ക്കൊപ്പം ചെലവിടാനാണ് ഉദ്ദേശിക്കുന്നതെന്ന് സ്ഥാനം ഒഴിയാന്‍ പോകുന്ന അമേരിക്കന്‍ പ്രസിഡന്റ് ബരാക് ഒബാമ. എന്നാല്‍ താന്‍ സാമൂഹിക വിഷയങ്ങളില്‍ നിന്നും ഒഴിഞ്ഞ് നി ല്‍ക്കുകയില്ലെന്നും, വിശ്രമം അല്‍പ്പകാലത്തേക്ക് മാത്രമാണെന്നും ഒബാമ കൂട്ടിച്ചേര്‍ക്കുന്നു. അടിസ്ഥാന മൂല്യങ്ങള്‍ പണയപ്പെടുന്ന ഘട്ടത്തില്‍ പൊതുമണ്ഡലത്തില്‍ തിരിച്ചെത്തുമെന്ന് ഒബാമ തന്റെ അവസാന പ്രസംഗത്തില്‍ വ്യക്തമാക്കി.

പ്രതീക്ഷകളും ആശങ്കകളും ഒരു പോലെ പങ്കുവെച്ചുകൊണ്ടായിരുന്നു അമേരിക്കന്‍ പ്രസിഡന്റ് എന്ന നിലയിലെ ബരാക് ഒബാമയുടെ അവസാന വാര്‍ത്താ സമ്മേളനം. അമേരിക്കയുടെ റഷ്യ, ക്യൂബ ബന്ധങ്ങള്‍ പലസ്തീന്‍,ഇസ്രയേല്‍ സംഘര്‍ഷത്തിന്റെ ആശങ്ക എന്നിവയ്‌ക്കൊപ്പം അമേരിക്കയിലെ വര്‍ണ്ണ വെറിയും, ഭിന്നലൈഗികതാ സംവാദവും എല്ലാം പരാമര്‍ശിച്ചുള്ള പ്രസംഗം. പ്രസിഡന്റ് എന്ന നിലയില്‍ ട്രംപ് സ്വന്തം മൂല്യങ്ങളുമായി മുന്നോട്ടുപോവുക എന്നതാണ് ഔചിത്യം. എന്നാല്‍ മന്ത്രിമാരടക്കമുള്ള ടീമിനെ തെരഞ്ഞെടുക്കുമ്പോള്‍ കരുതല്‍ വേണമെന്ന് ഒബാമ ഓര്‍മ്മിപ്പിച്ചു.
ട്രംപിന്റെ സ്ഥാനാരോഹണത്തിന് താനുണ്ടാവുമെന്നും ഒബാമ വ്യക്തമാക്കി.

വിക്കിലീക്‌സിന് നയതന്ത്രരേഖകള്‍ ചോര്‍ത്തിക്കൊടുത്ത ചെല്‍സീ മാനീംഗിന്റെ ശിക്ഷ വെട്ടിച്ചുരുക്കിയ നടപടിയേയും പ്രസംഗത്തില്‍ ഒബാമ ന്യായീകരിച്ചു. തന്റെ മുന്‍ഗാമികളായ പ്രസിഡന്റുമാരുടെ പാത സ്വീകരിച്ച് പൊതുമണ്ഡലത്തില്‍ നിന്ന് മാറി നില്‍ക്കാനാണ് താത്പര്യമെന്നും ഒബാമ സൂചന നല്‍കി. എന്നാല്‍ മൂല്യങ്ങള്‍ വെല്ലുവിളി നേരിടുമ്പോള്‍ തന്റെ ശബ്ദം ഉയരുമെന്നും ഒബാമ ജനങ്ങള്‍ക്ക് ഉറപ്പ് നല്‍കി. യാത്ര പറയുമ്പോള്‍ ഒരിക്കല്‍ കൂടി ഒബാമ പറഞ്ഞു ജനങ്ങളില്‍ നെറികേടിനേക്കാള്‍ കൂടുതല്‍ നന്മയുണ്ട്. എല്ലാം ശരിയാകും.

food poison through shawarma
Posted by
18 January

ഭക്ഷ്യവിഷബാധ: ഷവര്‍മ കഴിച്ച നൂറ്റന്‍പതോളം പേര്‍ ചികിത്സയില്‍

റായിദ് : സൗദിയില്‍ ഷവര്‍മ കഴിച്ച നൂറ്റന്‍പതോളം പേര്‍ക്ക് ഭക്ഷ്യവിഷബാധ. തായിഫിന് സമീപം തുറാബയില്‍ റസ്‌റ്റോറന്റില്‍ നിന്നും ഭക്ഷണം കഴിച്ചവര്‍ക്കാണ് ഭക്ഷ്യവിഷബാധയേറ്റത്. ഇവരില്‍ 45 പേര്‍ ആശുപത്രിയില്‍ നിരീക്ഷണത്തിലാണ്.

സംഭവത്തില്‍ ആരോഗ്യവകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്. സംഭവത്തെ കുറിച്ച് അന്വേഷിക്കാന്‍ ഉത്തരവിട്ട മക്ക ഗവര്‍ണര്‍ ഖാലിദ് അല്‍ ഫൈസല്‍ രാജകുമാരന്‍ ഉത്തരവാദികള്‍ക്ക് പരമാവധി ശിക്ഷ ഉറപ്പാക്കുമെന്ന് അറിയിച്ചിട്ടുണ്ട്.

pakisthan theatre owners; planning to withdraw the ban of indian films
Posted by
18 January

പാകിസ്താന്‍ ബോളിവുഡ് സിനിമകള്‍ക്കുള്ള നിരോധനം പിന്‍വലിക്കാനൊരുങ്ങുന്നു; ഇന്ത്യന്‍ സിനിമകള്‍ ഇല്ലെങ്കില്‍ കടപൂട്ടേണ്ടി വരുമെന്ന് തീയ്യേറ്റര്‍ ഉടമകള്‍

ഇസ്ലാമാബാദ്: കടുത്ത സാമ്പത്തികസമ്മര്‍ദ്ദത്തെ തുടര്‍ന്ന് പാകിസ്താന്‍ ബോളിവുഡ് സിനിമകള്‍ക്കുള്ള നിരോധനം എടുത്തുമാറ്റാന്‍ ആലോചിക്കുന്നു. ഉറി ആക്രമണ പശ്ചാത്തലത്തില്‍ പാക് കലാകാരന്മാര്‍ക്ക് നിരോധനം ഏര്‍പ്പെടുത്തിയതിന് പിന്നാലെ കഴിഞ്ഞ നാലുമാസമായി ഇന്ത്യന്‍ സിനിമകള്‍ക്ക് പാകിസ്താനില്‍ നിരോധനം ഉണ്ടായിരുന്നു. എന്നാല്‍ ഇതുമൂലം പാക് സിനിമാശാലാ ഉടമകള്‍ തങ്ങള്‍ കടുത്ത പ്രതിസന്ധി നേരിടുന്നതായും ബോളിവുഡ് സിനിമകള്‍ക്കുള്ള നിരോധനം എടുത്തു കളയണമെന്നും പ്രധാനമന്ത്രി നവാസ് ഷെരീഫിനോട് ആവശ്യപ്പെട്ടതായിട്ടാണ് വിവരം.

വിവരസാങ്കേതികമന്ത്രി മാര്യം ഔറംഗസേബ് നയിക്കുന്ന പ്രധാനമന്ത്രിയുടെ ദേശീയ ചരിത്ര, സാഹിത്യ പാരമ്പര്യ ഉപദേശകന്‍ ഇര്‍ഫാന്‍ സിദ്ദിഖി, വാണിജ്യ സെക്രട്ടറി, ഇന്റലിജന്റ്‌സ് ഓഫീസര്‍ എന്നിവര്‍ അടങ്ങുന്ന പാനല്‍ ഇക്കാര്യം ചര്‍ച്ച ചെയ്തതായും സിനിമ ഇറക്കുമതി അനുവദിച്ച് നിയമ പരിഷ്‌ക്കരണം ആവശ്യപ്പെടുകയും ചെയ്തതായിട്ടാണ് വിവരം. പത്തുവര്‍ഷമായി ഇറക്കുമതി നിരോധിക്കപ്പെട്ടിരിക്കുന്ന വസ്തുക്കള്‍ക്കൊപ്പമാണ് ഇന്ത്യന്‍ സിനിമകളെയും പാകിസ്താന്‍ ഉള്‍പ്പെടുത്തിയിരുന്നത്. എന്നാല്‍ വിവരസാങ്കേതിക മന്ത്രാലയത്തിന്റെ അപേക്ഷ പരിഗണിച്ച് വാണിജ്യമന്ത്രാലയം ഇന്ത്യന്‍ സിനിമകള്‍ക്ക് നോ ഒബ്ജക്ഷന്‍ സര്‍ട്ടിഫിക്കറ്റ് നല്‍കി. പുതിയ നിര്‍ദേശം അനുസരിച്ച് മാസത്തില്‍ രണ്ടോ മൂന്നോ സിനിമകള്‍ക്ക് വാണിജ്യമന്ത്രാലയത്തിന്റെ എന്‍ഒസി അനുവദിക്കപ്പെട്ടിരിക്കുകയാണ്.

പാക് സിനിമാ വ്യവസായത്തിലെ 70 ശതമാനം വരുമാനവും ബോളിവുഡ് ഹോളിവുഡ് സിനിമകളില്‍ നിന്നാണെന്ന് നേരത്തേ തീയറ്റര്‍ ഉടമകള്‍ തന്നെ വ്യക്തമാക്കിയിരുന്നു. താല്‍ക്കാലികമായ ഈ നിരോധനത്തെ മറികടക്കാന്‍ കഴിഞ്ഞാലും വിലക്ക് തുടര്‍ന്നാല്‍ കടപൂട്ടേണ്ടി വരുമെന്നാണ് സിനിമാശാലകളുടെ ഉടമകളുടെ അഭിപ്രായം.

brexit; britain will remove from european union market
Posted by
18 January

ബ്രെക്‌സിറ്റ് നടപ്പാക്കുന്നതോടെ ഏകീകൃത യൂറോപ്യന്‍ യൂണിയന്‍ മാര്‍ക്കറ്റില്‍ നിന്ന് ബ്രിട്ടന്‍ പുറത്തുപോകും: തെരേസ മെയ്

ലണ്ടന്‍: ബ്രെക്‌സിറ്റ് നടപ്പാക്കുന്നതോടെ ഏകീകൃത യൂറോപ്യന്‍ യൂണിയന്‍ മാര്‍ക്കറ്റില്‍ നിന്ന് ബ്രിട്ടന്‍ പുറത്തുപോകുമെന്ന് പ്രധാനമന്ത്രി തെരേസ മെയ്. മാര്‍ച്ച് അവസാനത്തോടെ ബ്രെക്‌സിറ്റിനായുള്ള നടപടി തുടങ്ങുമെന്നും അന്തിമ ബ്രെക്‌സിറ്റ് കരാര്‍ സംബന്ധിച്ച് പാര്‍ലമെന്റില്‍ വോട്ടെടുപ്പ് നടത്തുമെന്നും മെയ് പറഞ്ഞു. ലണ്ടനിലെ ലാന്‍സസ്റ്റര്‍ ഹൗസില്‍ നടന്ന ബ്രെക്‌സിറ്റ് പ്രഭാഷണത്തിനിടെയാണ് മെയ് നിലപാട് വ്യക്തമാക്കിയത്. ബ്രെക്‌സിറ്റിനായുള്ള 12 ഇന അജണ്ടകളും തെരേസ മെയ് മുന്നോട്ടുവെച്ചു. വിടുതലിനുശേഷവും യൂറോപ്യന്‍ യൂണിയനുമായി ബന്ധം തുടരും. എന്നാല്‍, പൂര്‍വ്വ സ്ഥിതിയിലായിരിക്കില്ല അത്. മറ്റ് അംഗരാജ്യങ്ങളില്‍ നിന്നും വ്യത്യസ്തമായി അയര്‍ലന്‍ഡുമായി മാത്രം പൊതുസഞ്ചാര മേഖല സൃഷ്ടിക്കുന്ന കാര്യം ചര്‍ച്ച ചെയ്ത് തീരുമാനിക്കും.

യൂറോപ്യന്‍ യൂണിയനുമായി ഇന്റലിജന്‍സ്, പോലീസ് ഇന്‍ഫോര്‍മേഷന്‍ സംവിധാനങ്ങളിലെ സഹകരണം തുടരുമെന്നും മെയ് കൂട്ടിച്ചേര്‍ത്തു. ബ്രിട്ടനും യൂറോപ്യന്‍ യൂണിയന്‍ രാജ്യങ്ങളുമായി സ്വതന്ത്ര വ്യാപാരത്തിന് വ്യവസ്ഥ ചെയ്യുന്നതാണ് ഏകീകൃത മാര്‍ക്കറ്റ്. എന്നാല്‍ ഇരുവിഭാഗവും തമ്മിലുള്ള സുഗമമായ വ്യാപാര സാധ്യതകള്‍ ഉറപ്പുവരുത്തുന്ന പുതിയ ഉടമ്പടിയാണ് ബ്രിട്ടന്‍ ലക്ഷ്യമിടുന്നെന്നും ബ്രിട്ടീഷ് പ്രധാനമന്ത്രി പറഞ്ഞു. ഇതുവഴി മറ്റു യൂറോപ്യന്‍ മാര്‍ക്കറ്റുകളുമായുള്ള വ്യാപാരത്തിന് ബ്രിട്ടീഷ് കമ്പനികള്‍ക്ക് കൂടുതല്‍ സ്വാതന്ത്ര്യം ലഭിക്കും. എന്നാല്‍ വിപണിയില്‍ നിന്ന് പിന്മാറുന്നതോടെ യൂറോപ്യന്‍ യൂണിയന്റെ പ്രവര്‍ത്തനത്തിനായി നല്‍കിവന്നിരുന്ന വന്‍തുകയുടെ സംഭാവനകള്‍ എല്ലാം നിര്‍ത്തലാക്കും.

യൂറോപ്യന്‍ യൂണിയനുമായി ഭാഗിക കരാറുകള്‍ക്കില്ല. മറ്റു രാജ്യങ്ങള്‍ പിന്തുടരുന്ന മാതൃകകള്‍ പിന്തുടരാനും തയാറല്ല. ബ്രിട്ടന്‍ യൂറോപ്യന്‍ യൂണിയന്‍ വിട്ടുപോകാന്‍ തീരുമാനിച്ച സ്ഥിതിക്ക് അതിനനുസരിച്ച് ഏറ്റവും ഉചിതമായ ഒരു വ്യവസ്ഥയിലത്തെുകയാണ് തന്റെ ചുമതലയെന്നും മെയ് വ്യക്തമാക്കി. യൂറോപ്യന്‍ യൂണിയന്‍ വിടുക എന്നതിനര്‍ത്ഥം യൂറോപ്പ് വിടുക എന്നല്ലെന്നും യൂറോപ്പിലെ നിര്‍ണ്ണായക ശക്തിയായി ബ്രിട്ടന്‍ തുടരുമെന്നും മെയ് പറഞ്ഞു. യൂറോപ്യന്‍ രാജ്യങ്ങളുമായി തുല്യതാ രീതിയിലുള്ള പങ്കാളിത്തം തുടരും. ബ്രിട്ടനില്‍ കഴിയുന്ന യൂറോപ്യന്‍ യൂണിയന്‍ പൗരന്മാരുടെ അവകാശങ്ങള്‍ സംരക്ഷിക്കും. എന്നാല്‍, ബ്രെക്‌സിറ്റ് നടപ്പാവുന്നതോടെ യൂറോപ്യന്‍ യൂണിയന്‍ രാജ്യങ്ങളില്‍ നിന്ന് ബ്രിട്ടനിലേക്കുള്ള ആളുകളുടെ എണ്ണം നിയന്ത്രിക്കും. ഭാഗിക യൂറോപ്യന്‍ യൂണിയന്‍ അംഗത്വവും മെയ് തള്ളിക്കളഞ്ഞു. കഴിഞ്ഞ ജൂണിലാണ് ബ്രെക്‌സിറ്റിനായുള്ള ഹിതപരിശോധന നടന്നത്. ബ്രെക്‌സിറ്റ് നടപടികള്‍ക്ക് പാര്‍ലമെന്റിന്റെ അനുമതി വേണമെന്ന ഹര്‍ജി സുപ്രീംകോടതി ഈ മാസം അവസാനം പരിഗണിക്കാനിരിക്കുകയാണ്.

Gene Cernan, Last man, who walked on moon passed away
Posted by
17 January

ചന്ദ്രനില്‍ കാലുകുത്തിയ അവസാന ബഹിരാകാശ സഞ്ചാരിയും മരണത്തിന് കീഴടങ്ങി

വാഷിങ്ടണ്‍: ചന്ദ്രനില്‍ കാലുകുത്തിയ അവസാന ബഹിരാകാശ സഞ്ചാരിയും മരണത്തിന് കീഴടങ്ങി. 1972ലെ അപ്പോളോ-17 ദൗത്യത്തിലൂടെ ചന്ദ്രനില്‍ കാലുകുത്തിയവരിലെ അവസാന ബഹിരാകാശ സഞ്ചാരിയായിരുന്ന ജിന്‍ സെര്‍നാന്‍ (82) ആണ് അന്തരിച്ചത്. വാര്‍ദ്ധക്യസഹജമായ അസുഖങ്ങളെ തുടര്‍ന്നായിരുന്നു മരണം.

astro

അപ്പോളോ ദൗത്യങ്ങളില്‍ അവസാനത്തേതായിരുന്നു അപ്പോളോ 17. 1972 ഡിസംബര്‍ 11ന് ചന്ദ്രനിലെ ടോറസ് ലിട്രോവ് എന്ന സ്ഥലത്താണ് കമാന്‍ഡോ പൈലറ്റായ റൊണാള്‍ഡ് ഇവാന്‍സ്, ലൂണാര്‍ മോഡ്യൂള്‍ പൈലറ്റായ ഹാരിസണ്‍ സ്മിത്ത് എന്നിവരുടെ കൂടെ സെര്‍നാന്‍ ചാന്ദ്ര ദൗത്യത്തില്‍ പങ്കാളിയായത്. ചന്ദ്രനിലെ അഗ്‌നിപര്‍വതങ്ങളെക്കുറിച്ചുള്ള പഠനമായിരുന്നു ഇവരുടെ ദൗത്യം.