യെമനില്‍ വ്യോമാക്രമണത്തില്‍ 35 പേര്‍ കൊല്ലപ്പെട്ടു: നിരവധിപേര്‍ക്ക് ഗുരുതര പരുക്ക്
Posted by
24 August

യെമനില്‍ വ്യോമാക്രമണത്തില്‍ 35 പേര്‍ കൊല്ലപ്പെട്ടു: നിരവധിപേര്‍ക്ക് ഗുരുതര പരുക്ക്

സന : യെമനില്‍ വ്യോമാക്രമണത്തില്‍ 35 പേര്‍ കൊല്ലപ്പെട്ടു. നിരവധിപേര്‍ക്ക് ഗുരുതര പരുക്കേറ്റു. സനായില്‍ ഹൂതി വിമതരുടെ നിയന്ത്രണത്തിലുള്ള പ്രദേശത്തിലാണ് വ്യോമാക്രമണം ഉണ്ടായത്.25 ഓളം തവണ വ്യോമാക്രമണം ഉണ്ടായതായാണ് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തത്. മരണ സംഖ്യ ഇനിയും ഉയര്‍ന്നേക്കാമെന്നും റിപ്പോര്‍ട്ടുണ്ട്.

‘മാന്യമായ വസ്ത്രം ധരിച്ചിരുന്നെങ്കില്‍ യുവാക്കള്‍ വെറുതെ വിട്ടേനെ’; ഓടുന്ന ബസ്സില്‍ കൂട്ടബലാത്സംഗത്തിനിരയായ യുവതിയെ അപമാനിച്ച് മതമൗലികവാദികള്‍
Posted by
23 August

'മാന്യമായ വസ്ത്രം ധരിച്ചിരുന്നെങ്കില്‍ യുവാക്കള്‍ വെറുതെ വിട്ടേനെ'; ഓടുന്ന ബസ്സില്‍ കൂട്ടബലാത്സംഗത്തിനിരയായ യുവതിയെ അപമാനിച്ച് മതമൗലികവാദികള്‍

മൊറോക്കോ: ഓടുന്ന ബസില്‍ സഹയാത്രികരും ജീവനക്കാരും നോക്കി നില്‍ക്കെ കൂട്ടബലാത്സംഗത്തിനിരയായ യുവതിയെ അപമാനിച്ച് മതമൗലിക വാദികള്‍. മൊറോക്കോയിലാണ് സംഭവം. യുവതി മാന്യമായ വസ്ത്രം ധരിക്കാത്തതുകൊണ്ടാണ് യുവാക്കള്‍ അത്തരത്തില്‍ പെരുമാറിയതെന്നാണ് ചില മതമൗലിക വാദികള്‍ സോഷ്യല്‍മീഡിയയില്‍ വ്യാപകമായി പ്രചരണം അഴിച്ചു വിടുന്നത്.

കഴിഞ്ഞ ദിവസമാണ് ഓടുന്ന ബസ്സില്‍ യുവതിയെ ഒരുസംഘം വരുന്ന യുവാക്കള്‍ ബലാത്സംഗം ചെയ്യുന്നതിന്റെ വീഡിയോ പുറത്തുവരുന്നത്. ഇതിനു പിന്നാലെ മൊറോക്കോയില്‍ ആക്രമണത്തിനെതിരെ പ്രതിഷേധം ശക്തമായിരുന്നു. നാല് യുവാക്കള്‍ യുവതിയുടെ വസ്ത്രം വലിച്ചുകീറുന്നതും പീഡിപ്പിക്കുന്നതും അസഭ്യം പറയുന്നതും ആര്‍ത്തുചിരിക്കുന്നതുമെല്ലാം വീഡിയോയില്‍ വ്യക്തമായിരുന്നു.

എന്നാല്‍ സഹായത്തിനഭ്യര്‍ത്ഥിച്ച് യുവതി കരയുന്നുണ്ടെങ്കിലും ബസ്സ് ഡ്രൈവറും സഹയാത്രക്കാരും ഉള്‍പ്പെടെ ആരും യുവതിയെ സഹായിക്കാനായി എത്തിയിരുന്നില്ല. ഇത്രയും ക്രൂരമായ അവസ്ഥയിലൂടെ ആ സ്ത്രീ കടന്നു പോയതിനു പിന്നാലെയാണ് അവരെ അപമാനിച്ചുകൊണ്ടും കുറ്റപ്പെടുത്തിക്കൊണ്ടും ചിലര്‍ രംഗത്തെത്തിയത്.

വീഡിയോപുറത്ത് വന്നതിന് പിന്നാലെ അക്രമത്തിനിരയായ സ്ത്രീ മാന്യമായ വേഷം ധരിക്കാത്തതുകൊണ്ടാണ് യുവാക്കള്‍ അത്തരത്തില്‍ പെരുമാറിയതെന്നായിരുന്നു പലരുടെയും ന്യായവാദം. യുവതി ബലാത്സംഗം ചെയ്യപ്പെട്ടതില്‍ ദു;ഖമുണ്ടെന്നും എന്നാല്‍ ശരീരം മുഴുവന്‍ മറയ്ക്കുന്ന രീതിയിലുള്ള വസ്ത്രം യുവതി ധരിക്കേണ്ടിയിരുന്നു എന്നുമാണ് ഒരാള്‍ ഫേസ്ബുക്കില്‍ കുറിച്ചത്.

സംഭവവുമായി ബന്ധപ്പെട്ട് 15 നും 17 നും ഇടയില്‍ പ്രായമുള്ള ആറ് യുവാക്കളെ അറസ്റ്റ് ചെയ്തതായി മൊറോക്കന്‍ അതോറിറ്റീസ് അറിയിച്ചു. മൊറോക്കോയില്‍ സ്ത്രീകള്‍ക്കെതിരായ അതിക്രമം തുടര്‍ക്കഥയാകുന്ന പശ്ചാത്തലത്തില്‍ ഭരണകൂടത്തിനെതിരെ വലിയ പ്രതിഷേധമാണ് ഉയരുന്നത്.

ജോണ്‍സന്‍ ആന്റ് ജോണ്‍സന്‍ പൗഡര്‍ ഉപയോഗിച്ച യുവതിക്ക് ഒവേറിയന്‍ കാന്‍സര്‍: കമ്പനിക്ക് 417 മില്യണ്‍ ഡോളര്‍ പിഴ
Posted by
22 August

ജോണ്‍സന്‍ ആന്റ് ജോണ്‍സന്‍ പൗഡര്‍ ഉപയോഗിച്ച യുവതിക്ക് ഒവേറിയന്‍ കാന്‍സര്‍: കമ്പനിക്ക് 417 മില്യണ്‍ ഡോളര്‍ പിഴ

കാലിഫോര്‍ണിയ: ജോണ്‍സന്‍ ആന്റ് ജോണ്‍സന്‍ കമ്പനിയുടെ ഫെമിനിന്‍ ഹൈജീന്‍ പൗഡര്‍ ഉപയോഗിച്ചത് മൂലം തനിക്ക് ഒവേറിയന്‍ കാന്‍സര്‍ ബാധിച്ചെന്ന സ്ത്രീയുടെ പരാതിയില്‍ കമ്പനിക്ക് 417 മില്യണ്‍ ഡോളര്‍ പിഴ. കാലിഫോര്‍ണിയ സ്വദേശിനിയായ ഈവ എഷിവേറിയ എന്ന സ്ത്രീയുടെ പരാതിയിന്മേലാണ് ഇതുവരെയുള്ളതില്‍ ഏറ്റവും കനത്ത പിഴ കമ്പനിക്ക് ലഭിച്ചത്. ടാല്‍ക് ബേസ് പൗഡറുകള്‍ മൂലമുള്ള കാന്‍സര്‍ സാധ്യതയെ കുറിച്ച് ഉപഭോക്താക്കള്‍ക്ക് സൂചന നല്‍കിയില്ല എന്നതിനാലാണ് ഇത്രയും കനത്ത പിഴ നല്‍കുന്നതെന്നും കോടതി വ്യക്തമാക്കി.

താന്‍ വര്‍ഷങ്ങളായി ജോണ്‍സണ്‍ ആന്റ് ജോണ്‍സണ്‍ ഉത്പന്നങ്ങള്‍ ഉപയോഗിക്കുന്ന വ്യക്തിയാണെന്നും, അതുമൂലമാണ് തനിക്ക് ഒവേറിയന്‍ കാന്‍സര്‍ പിടിപെട്ടതെന്നും 63 വയസ്സുകാരിയായ ഈവ പരാതിപ്പെട്ടു. കമ്പനി സ്വന്തം ജെനിറ്റല്‍ ടാല്‍കം പൗഡറുകള്‍ മൂലമുള്ള കാന്‍സര്‍ സാധ്യത മറച്ചു വെച്ചുകൊണ്ട് അവ ഉപയോഗിക്കാന്‍ സ്ത്രീകളെ പ്രേരിപ്പിക്കുന്നുവെന്ന് വാദിഭാഗം അഭിഭാഷകര്‍ കോടതിയെ ധരിപ്പിച്ചു. ജെനിറ്റല്‍ ടാല്‍കം പൗഡര്‍ കാന്‍സര്‍ ഉണ്ടാക്കുന്നുവെന്നു ശാസ്ത്രീയമായി ആരും തെളിയിച്ചിട്ടില്ല എന്ന് കമ്പനി വാദം.

ഇതിനു മുന്‍പും സമാനമായ കേസുകളില്‍ ഇതേ കോടതിയില്‍ നിന്നും കമ്പനിക്ക് പിഴ ശിക്ഷ ലഭിച്ചിട്ടുണ്ട്.2002 നും, 2013 നുമിടയില്‍ ഇത്തരം കേസുകള്‍ മൂലം കമ്പനിക്ക് 2.2 ബില്യണ്‍ ഡോളര്‍ പിഴ ഒടുക്കേണ്ടി വന്നിട്ടുണ്ടെന്ന് കമ്പനി അധികൃതര്‍ തന്നെ സമ്മതിച്ചിക്കുന്നു. 2016 ഫെബ്രുവരി മാസത്തില്‍ 72 മില്യണ്‍ ഡോളറും, അതേ വര്‍ഷം മെയ് മാസത്തില്‍ 55 മില്യണ്‍ ഡോളറും, 2017 മെയ് മാസത്തില്‍ 110 മില്യണ്‍ ഡോളറും നഷ്ടപരിഹാരമായി നല്‍കിയ കമ്പനിക്ക് പുതിയ വിധി മൂലം വീണ്ടും കോടികളുടെ നഷ്ടമാണ് സംഭവിക്കുന്നത്. അമേരിക്കയില്‍ മാത്രം കമ്പനിക്കെതിരെ സമാനമായ 4,800 കേസുകള്‍ നിലവിലുണ്ടെന്നാണ് റിപ്പോര്‍ട്ടുകള്‍. മിസോറി കോടതിയില്‍ മാത്രം നിലവിലുള്ള കേസുകളില്‍ മാത്രം കമ്പനി മുന്നൂറു മില്യണ്‍ ഡോളര്‍ നഷ്ടപരിഹാരം നല്‍കേണ്ടി വരും എന്നാണ് നിഗമനം.

കാണാതായ മാധ്യമപ്രവര്‍ത്തകയുടെ മൃതദേഹം ദുരൂഹസാഹചര്യത്തില്‍ കപ്പലില്‍ കണ്ടെത്തി
Posted by
22 August

കാണാതായ മാധ്യമപ്രവര്‍ത്തകയുടെ മൃതദേഹം ദുരൂഹസാഹചര്യത്തില്‍ കപ്പലില്‍ കണ്ടെത്തി

ഡെന്‍മാര്‍ക്ക്: മാഡ്‌സണെ ഇന്റര്‍വ്യൂ ചെയ്യാന്‍ പോയ വനിതാ മാധ്യമപ്രവര്‍ത്തകയുടെ മൃതദേഹം കപ്പലില്‍ കണ്ടെത്തി. കോപ്പന്‌ഹേഗന് കടല്‍ തീരത്താണ് മൃതദേഹം കണ്ടെത്തിയത്. ഡെന്‍മാര്‍ക്ക് സ്വദേശിയായ പീറ്റര്‍ മാഡിസണ്‍ തന്റെ സ്വദേശി നിര്‍മിത അന്തര്‍വാഹിനി കപ്പലില്‍വെച്ച് ഒരു സ്വീഡിഷ് മാധ്യമപ്രവര്‍ത്തകയെ കൊലപ്പെടുത്തിയിരുന്നു എന്ന് പ്രാദേശിക കോടതി കണ്ടെത്തിയിരുന്നു.

ഓഗസ്റ്റ് 11 മുതല്‍ ഇവരെ കാണാനില്ലായിരുന്നു. തന്റെ കപ്പലില്‍വെച്ചു അവര്‍ ഒരപകടത്തില്‍പെട്ട് മരണമടഞ്ഞുവെന്നും തുടര്‍ന്ന് മൃതദേഹം കടലില്‍ എറിഞ്ഞു എന്നുമാണ് മാഡ്‌സണ്‍ കോടതിയില്‍ നല്‍കിയ വിശദീകരണം. തുടക്കത്തില്‍ മാധ്യമപ്രവര്‍ത്തകയുടെ തിരോധാനത്തില്‍ തനിക്ക് പങ്കില്ലെന്ന നിലപാടിലായിരുന്നു ഇദ്ദേഹം. അംഗഭംഗം വരുത്തിയ നിലയിലാണ് മൃതദേഹം കണ്ടെത്തിയത്. അതിനാല്‍ മൃതദേഹം മാധ്യമപ്രവര്‍ത്തകയുടേതാണെന്ന് പൊലീസ് ഇനിയും സ്ഥിരീകരിച്ചിട്ടില്ല. മൃതദേഹം ഫോറന്‍സിക് പരിശോധനക്ക് അയച്ചു.

ദുഷ്ടശക്തിയായ യുഎസിന്റെ വിധി ഇവിടെ അവസാനിക്കുന്നു; അമേരിക്കയുടേയും ദക്ഷിണകൊറിയയുടേയും സംയുക്ത സൈനികാഭ്യാസത്തില്‍ കല്ലുകടിച്ച് ഉത്തരകൊറിയ
Posted by
22 August

ദുഷ്ടശക്തിയായ യുഎസിന്റെ വിധി ഇവിടെ അവസാനിക്കുന്നു; അമേരിക്കയുടേയും ദക്ഷിണകൊറിയയുടേയും സംയുക്ത സൈനികാഭ്യാസത്തില്‍ കല്ലുകടിച്ച് ഉത്തരകൊറിയ

സോള്‍: ദുഷ്ടശക്തിയായ യുഎസിന്റെ വിധി ഇവിടെ അവസാനിക്കുകയാണെന്ന് ഉത്തരകൊറിയയുടെ മുന്നറിയിപ്പ്. അമേരിക്കയും ദക്ഷിണകൊറിയയും തമ്മില്‍ സംയുക്തമായി സൈനികാഭ്യാസം നടത്തുന്നതില്‍ കല്ലുകടിച്ച് ശക്തമായ തിരിച്ചടി നല്‍കുമെന്ന മുന്നറിയിപ്പുമായി രംഗത്തെത്തിയിരിക്കുകയാണ് ഉത്തരകൊറിയ.

സൈനികാഭ്യാസത്തിനിടെ ഉപയോഗിക്കുന്ന മാരകായുധങ്ങള്‍, ഏകാധിപതി കിം ജോങ് ഉന്നിന്റെ തലയറുക്കുന്നതിനുള്ള പരിശീലനത്തിനായിട്ടാണ് എത്തിച്ചിരിക്കുന്നതെന്നാണ് ഉത്തരകൊറിയയുടെ വാദം. കഠിനമായ ശിക്ഷയാകും യുഎസിനുമേല്‍ നടപ്പാക്കുകയെന്നും യുഎസ് പ്രസിഡന്റ് ഡോണള്‍ഡ് ട്രംപിനെ വധിക്കുമെന്ന തരത്തിലുള്ള ഭീഷണിയും ഉത്തരകൊറിയ പുറപ്പെടുവിച്ചിരുന്നു.

പത്തു ദിവസം നീണ്ടുനിന്ന ഉള്‍ചി ഫ്രീഡം ഗാര്‍ഡിയന്‍ സൈനികാഭ്യാസമാണ് യുഎസും ദക്ഷിണകൊറിയയും സംയുക്തമായി നടത്തുന്നത്. 17,500 യുഎസ് സേനാംഗങ്ങളാണ് ഇത്തവണത്തെ സൈനികാഭ്യാസങ്ങളില്‍ പങ്കെടുക്കുന്നത്.

കോടതി വളപ്പില്‍വെച്ച് ജഡ്ജിക്കെതിരെ ആക്രമണം: അജ്ഞാതന്‍ വെടിയേറ്റു മരിച്ചു
Posted by
22 August

കോടതി വളപ്പില്‍വെച്ച് ജഡ്ജിക്കെതിരെ ആക്രമണം: അജ്ഞാതന്‍ വെടിയേറ്റു മരിച്ചു

വാഷിങ്ടണ്‍: അമേരിക്കയില്‍ കോടതിക്കു പുറത്തുവച്ച് ജഡ്ജിക്കു നേരെ വെടിവെപ്പ്. ജഡ്ജിയും സുരക്ഷാ ഉദ്യാഗസ്ഥനും ചേര്‍ന്ന് തിരികെ നടത്തിയ വെടിവെപ്പില്‍ അക്രമി കൊല്ലപ്പെട്ടു.
ഓഹിയോയിലെ ജെഫേഴ്‌സന്‍ കണ്‍ട്രി കോര്‍ട്ട് ജഡ്ജിയായ ജോസഫ് ബ്രസസെയ്ക്കു നേരെയാണ് വധശ്രമമുണ്ടായത്. അക്രമിക്കു നേരെ ജോസഫ് അഞ്ചുവട്ടം വെടിയുതിര്‍ത്തു.

സ്റ്റ്യൂബന്‍ വില്ലയില്‍ തിങ്കളാഴ്ച രാവിലെയായിരുന്നു സംഭവം. അക്രമി ആരാണെന്ന് തിരിച്ചറിഞ്ഞിട്ടില്ല. എന്തിനാണ് ഇയാള്‍ ജഡ്ജിക്കു നേരെ വെടിയുതിര്‍ത്തതെന്ന കാര്യവും വ്യക്തമായിട്ടില്ല. ജഡ്ജിയുടെ വെടിയേറ്റാണോ അതേ സുരക്ഷാ ഉദ്യോഗസ്ഥന്റെ വെടിയേറ്റാണോ അക്രമി കൊല്ലപ്പെട്ടതെന്ന് വ്യക്തമായിട്ടില്ല. കോടതിയിലേക്കു വരികയായിരുന്ന ജോസഫിനു വേണ്ടി അക്രമി കാത്തുനില്‍ക്കുകയായിരുന്നെന്ന് പോലീസ് അറിയിച്ചു. പരുക്കേറ്റ ജോസഫിനെ ശസ്ത്രക്രിയക്കായി ആശുപത്രിയില്‍ പ്രവേശിപ്പിച്ചു. അദ്ദേഹത്തിന്റെ സ്ഥിതി മെച്ചപ്പെട്ടതായി ആശുപത്രി അധികൃതര്‍ അറിയിച്ചിട്ടുണ്ട്.

സൂര്യഗ്രഹണത്തെ നഗ്‌നനേത്രങ്ങള്‍ കൊണ്ട് നോക്കുന്ന ട്രംപിനെ കളിയാക്കി സോഷ്യല്‍ മീഡിയ
Posted by
22 August

സൂര്യഗ്രഹണത്തെ നഗ്‌നനേത്രങ്ങള്‍ കൊണ്ട് നോക്കുന്ന ട്രംപിനെ കളിയാക്കി സോഷ്യല്‍ മീഡിയ

വാഷിങ്ടണ്‍: സൂര്യഗ്രഹണം നഗ്‌നനേത്രങ്ങള്‍ കൊണ്ട് ഉറ്റു നോക്കുന്ന ട്രംപിനെ കളിയാക്കി സോഷ്യല്‍ മീഡിയ. ഗ്രഹണം നഗ്‌നനേത്രങ്ങള്‍ കൊണ്ട് കാണുന്നത് കാഴ്ച്ച ശക്തി നഷ്ടപ്പെടാനിടയാകും എന്ന ശാസ്ത്രജ്ഞരുടെ മുന്നറിയിപ്പ് അവഗണിച്ചാണ് അമേരിക്കന്‍ പ്രസിഡന്റ് കണ്ണടയോ ലെന്‍സോ ഉപയോഗിക്കാതെ സൂര്യഗ്രഹണം കണ്ടത്.
കുടുംബത്തോടൊപ്പമാണ് അമേരിക്കന്‍ പ്രസിഡന്റ് ഗ്രഹണം കണ്ടത്. ഭാര്യ മെലാനിയ ട്രംപും മകന്‍ ബാരണും പ്രൊട്ടക്ടീവ് ഗ്ലാസ് ഉപയോഗിച്ചാണ് ഗ്രഹണം കണ്ടത്. ചുറ്റില്‍ നിന്നും ഗ്ലാസ് ഉപയോഗിച്ച് സൂര്യനെ നോക്കാന്‍ ഉപദേശം ഉയര്‍ന്നിരുന്നെങ്കിലും പ്രസിഡന്റ് ഇതവഗണിക്കുകയായിരുന്നു.സൂര്യഗ്രഹണം നഗ്‌നനേത്രങ്ങള്‍ കൊണ്ട് നോക്കുന്ന അമേരിക്കന്‍ പ്രസിഡന്റിന്റെ ചിത്രത്തോടൊപ്പം നിരവധി ട്രോളുകളാണ് ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്.

അടയും മുന്‍പേ ലിഫ്റ്റ് ഉയര്‍ന്നു: പ്രസവശേഷം സ്‌ട്രെച്ചറില്‍ കിടക്കുകയായിരുന്ന യുവതിയുടെ ശരീരം രണ്ടായി മുറിഞ്ഞു: മരണവേദനയിലും കുഞ്ഞിനെ മാറോട് ചേര്‍ത്ത് സുരക്ഷയേകി ഒരമ്മ
Posted by
22 August

അടയും മുന്‍പേ ലിഫ്റ്റ് ഉയര്‍ന്നു: പ്രസവശേഷം സ്‌ട്രെച്ചറില്‍ കിടക്കുകയായിരുന്ന യുവതിയുടെ ശരീരം രണ്ടായി മുറിഞ്ഞു: മരണവേദനയിലും കുഞ്ഞിനെ മാറോട് ചേര്‍ത്ത് സുരക്ഷയേകി ഒരമ്മ

സെവില്‍: മരണ വേളയില്‍ പോലും പത്തു മാസം വയറ്റിലിട്ടു നൊന്തു പ്രസവിച്ച പൊന്നുമോളെ മാറോട് ചേര്‍ത്തുപിടിച്ചു സുരക്ഷിതത്വമേകിയ മാതൃത്വം.പ്രസവിച്ച് ഏതാനും മണിക്കൂറുകള്‍ക്കുള്ളില്‍ മരണത്തിനു കീഴടങ്ങിയ നൂനസ് (25) എന്ന യുവതിയുടെ വേര്‍പാടിന്റെ വാര്‍ത്തയാണ് കരളലിയിപ്പിക്കുന്നത്.

അടയും മുന്‍പേ ലിഫ്റ്റ് മുകളിലേക്ക് ഉയര്‍ന്നതിനെ തുടര്‍ന്ന്, പ്രസവശേഷം സ്‌ട്രെച്ചറില്‍ കിടക്കുകയായിരുന്ന യുവതിയുടെ ശരീരം രണ്ടായി മുറിഞ്ഞു മരണത്തിന് കീഴടങ്ങുകയായിരുന്നു. പ്രസവിച്ച് ഏതാനും മണിക്കൂറുകള്‍ക്കുള്ളില്‍ അമ്മ മരണത്തിനു കീഴടങ്ങിയതോടെ നാലും അഞ്ചും വയസ്സുള്ള രണ്ടു കുട്ടികള്‍ ഉള്‍പ്പെടെ മൂന്നു പെണ്‍മക്കള്‍ അനാഥരായി. തെക്കന്‍ സ്‌പെയിനിലെ സെവിലിലെ വെര്‍ജിന്‍ ഡി വാല്‍മെ ആശുപത്രിയില്‍ റോസിയോ കോര്‍ട്‌സ് നൂനസ് (25) എന്ന യുവതിയാണു ലിഫ്റ്റില്‍ ദാരുണമായി മരിച്ചത്.

രാവിലെ 11 മണിക്കു പ്രസവ ശസ്ത്രക്രിയ കഴിഞ്ഞ് രണ്ടരയോടെ മുകള്‍ നിലയിലെ വാര്‍ഡിലേക്കു മാറ്റുന്നതിനിടെയാണ് അപകടം. റോസിയോയും നവജാതശിശുവുമായി വന്ന സ്‌ട്രെച്ചര്‍ പൂര്‍ണമായി കയറ്റാന്‍ അറ്റന്‍ഡര്‍ക്കു സാധിക്കുന്നതിനു മുന്‍പ് ലിഫ്റ്റ് മേലോട്ടുയരുകയായിരുന്നു. ലിഫ്റ്റിന്റെ ലോഹഭാഗങ്ങളില്‍ തട്ടിയാണ് ശരീരം രണ്ടായി മുറിഞ്ഞത്. മരണവേദനയ്ക്കിടയിലും പൊതിഞ്ഞു ചേര്‍ത്തുപിടിച്ച അമ്മയുടെ കൈക്കുള്ളില്‍ കുഞ്ഞു ടിയാന സുരക്ഷിതയായിരുന്നു.

ചരിത്രത്തിലാദ്യമായി അമേരിക്ക പൂര്‍ണ്ണമായും ഇരുട്ടില്‍; സമ്പൂര്‍ണ്ണ സൂര്യഗ്രഹണം ആഘോഷമാക്കി ജനങ്ങള്‍
Posted by
22 August

ചരിത്രത്തിലാദ്യമായി അമേരിക്ക പൂര്‍ണ്ണമായും ഇരുട്ടില്‍; സമ്പൂര്‍ണ്ണ സൂര്യഗ്രഹണം ആഘോഷമാക്കി ജനങ്ങള്‍

വാഷിങ്ടണ്‍: ചരിത്രത്തലാദ്യമായി സമ്പൂര്‍ണ്ണ സൂര്യഗ്രഹണത്തിന് സാക്ഷ്യം വഹിച്ച് അമേരിക്ക. ഓഗസ്റ്റ് 21നാണ് അമേരിക്കയുടെ ഭൂരിഭാഗം പ്രദേശങ്ങളേയും ഇരുട്ടിലാക്കി യുഎസ് ചരിത്രത്തിലെ ആദ്യ സമ്പൂര്‍ണ സൂര്യഗ്രഹണം നടന്നത്.

ഓറിഗോണ്‍ മുതല്‍ സൗത്ത് കാരോലിന വരെയുള്ള 48 സംസ്ഥാനങ്ങളിലെ ജനങ്ങള്‍ ഗ്രഹണത്തിന് സാക്ഷ്യം വഹിച്ചു. അമേരിക്കന്‍ ജനതയുടെ കാത്തിരുപ്പ് വെറുതെയായില്ല. 48 സംസ്ഥാനങ്ങളില്‍ പൂര്‍ണ്ണമായി ദൃശ്യമാകുന്ന ആദ്യത്തെ സൂര്യഗ്രഹണം അതിന്റെ എല്ലാ സൂക്ഷ്മതയോടും കൂടി തന്നെ രാജ്യം ദര്‍ശിച്ചു.

സൂര്യനെ പൂര്‍ണ്ണമായും ചന്ദ്രന്‍ മറച്ചപ്പോള്‍ ബെയ്‌ലീസ് ബീഡ്‌സ് എന്ന പ്രതിഭാസവും ഡയമണ്ട് റിംഗ് എന്ന പ്രതിഭാസവും സുരക്ഷാ സന്നാഹങ്ങളുപയോഗിച്ച് ജനം അനുഭവിച്ചറിഞ്ഞു.

അമേരിക്കന്‍ സമയം രാവിലെ പത്ത് പത്ത് പതിനാറിന് തുടങ്ങിയ ഗ്രഹണം അവസാന സംസ്ഥാനമായ സൗത്ത് കാരൊലിനയില്‍ ദൃശ്യമായപ്പോള്‍ ഒന്നര മണിക്കൂര്‍ പിന്നിട്ടിരുന്നു. ഓരോ സ്ഥലത്തും രണ്ട് മിനിറ്റ് 40 സെക്കന്റ് നേരമാണ് ചന്ദ്രന്‍ സൂര്യനെ മറച്ചത്

ഇനി ഇതുപോലെ ഒരു സൂര്യഗ്രഹണം ദൃശ്യമാവണമെങ്കില്‍ 2024 വരെ കാത്തിരിക്കണം. അതിനാല്‍ ഈ ഗ്രഹണത്തെ പൂര്‍ണ്ണമായും പഠനവിധേയമാക്കാന്‍ എല്ലാ തയ്യാറെടുപ്പുകളും അമേരിക്ക പൂര്‍ത്തിയാക്കിയിരിക്കുന്നു. അമേരിക്കന്‍ ബഹിരാകാശ ഏജന്‍സിയായ നാസ തങ്ങളുടെ വെബ്‌സൈറ്റില്‍ ഗ്രഹണം തത്സമയം കാണാന്‍ അവസരമൊരുക്കിയിരുന്നു.

പൂര്‍ണ്ണമായ തോതില്‍ ഗ്രഹണം ദൃശ്യമായത് അമേരിക്കയില്‍ മാത്രമായിരുന്നുവെങ്കിലും നോര്‍ത്ത് അമേരിക്കയിലും കാനഡയിലും ബൊളീവിയയിലും ഭാഗികമായി ഗ്രഹണം ദൃശ്യമായി. പ്രസിഡന്റ് ഡൊണാള്‍ഡ് ട്രംപും ഭാര്യം മെലാനിയയും മകന്‍ ബാരണും വാഷിംഗ്ടണ്‍ ഡിസിയില്‍ ഗ്രഹണത്തിന് സാക്ഷ്യം വഹിച്ചു.

പാക്കിസ്താന് ശക്തമായ മുന്നറിയിപ്പുമായി അമേരിക്ക
Posted by
22 August

പാക്കിസ്താന് ശക്തമായ മുന്നറിയിപ്പുമായി അമേരിക്ക

വാഷിങ്ടണ്‍: പാക്കിസ്താന് ശക്തമായ മുന്നറിയിപ്പുമായി അമേരിക്കന്‍ പ്രസിഡന്റ് ഡൊണള്‍ഡ് ട്രംപ്. പാക്കിസ്താനുമായി സൈനിക സഹകരണം സാധ്യമല്ല. ഭീകരരെ സഹായിക്കുന്ന നിലപാടാണ് പാക്കിസ്താന്റേത്. ഈ മേഖലയില്‍ ഇന്ത്യയുമായുള്ള ബന്ധം മെച്ചപ്പെടുത്തും. കൂടുതല്‍ വ്യാപാരപങ്കാളിത്തം ഇന്ത്യയുമായി അനിവാര്യമാണ്. ദക്ഷിണേ·ഷ്യന്‍ സൈനികനയം വ്യക്തമാക്കി സംസാരിക്കുകയായിരുന്നു ട്രംപ്. അഫ്ഗാനിസ്ഥാനില്‍ നിന്ന് സേനയെ പിന്‍വലിക്കില്ലെന്നും ട്രംപ് വ്യക്തമാക്കി.