ബ്ലൂവെയ്ലിന്റെ ചോരക്കളിക്കെതിരെ പിങ്ക് വെയ്‌ലെത്തുന്നു
Posted by
18 August

ബ്ലൂവെയ്ലിന്റെ ചോരക്കളിക്കെതിരെ പിങ്ക് വെയ്‌ലെത്തുന്നു

ബ്ലൂവെയ്ല്‍ ഭീഷണികളെ മറികടക്കാന്‍ ഇനി പിങ്ക് വെയ്ല്‍ ചലഞ്ചുകള്‍. ബ്ലൂവെയ്ലിന്റെ ചോരക്കളിക്കെതിരെ സ്നേഹം കൊണ്ട് ജീവിതത്തെ പോസീറ്റീവാക്കി മാറ്റാനുള് ശ്രമങ്ങളാണ് പിങ്ക് വെയില്‍ എന്ന ഗെയിമില്‍ ഉള്ളത്. ബ്ലൂവെയ്ല്‍ ഗെയിമിലെന്ന പോലെ പിങ്ക് വെയ്ല്‍ ഗെയിമിലും 50 സ്റ്റേജുകളുണ്ട്. ബ്ലൂവെയിലില്‍ സ്വയം മുറിവേല്‍പ്പിക്കലും ഒറ്റപ്പെടലും ആത്മഹത്യയുമൊക്കെയാണെങ്കില്‍ ജീവിതത്തെ സ്നേഹം കൊണ്ടും പോസീറ്റീവായും കാണാനുള്ള സ്റ്റേജുകളാണ് പിങ്ക് വെയ്‌ലില്‍ നടക്കുക.

ബ്രസീലിലാണ് പിങ്ക് വെയിലിന്റെ ഉത്ഭവം. ബ്ലൂവെയില്‍ ഗെയിമിന്റെ അപകടങ്ങളുടെ വാര്‍ത്തകളെത്തി തുടങ്ങിയപ്പോഴേ ഒരു ഗ്രാഫിക് ഡിസൈനറാണ് പിങ്ക് വെയില്‍ ഗെയിമിന് തുടക്കം കുറിച്ചത്. ഫേസ്ബുക്കിലും ഇന്‍സ്റ്റാഗ്രാമിലും ഗെയിം തരംഗമായതോടെ 3,40,000 ഫോളോവേഴ്സ് ഇതിനോടകം ഈ ഗെയിമിനുണ്ട്.

കഴിഞ്ഞ ഏപ്രിലിലാണ് ഗെയിം ഉപഭോക്താക്കള്‍ക്ക് ലഭ്യമായി തുടങ്ങിയത്. കളിക്കുന്നയാള്‍ക്ക് പ്രതിദിനം ചെയ്യുന്നതിനായി 107 ടാസ്‌കുകളുണ്ട്.സമനില തെറ്റിക്കുന്ന ബ്ലൂവെയിലിനെ പിടിച്ച് കെട്ടാന്‍ പിങ്ക് വെയിലിനാകുമെന്നാണ് ഇതേക്കുറിച്ച് പഠിച്ചവര്‍ പറയുന്നത്.

എന്നാല്‍ പിങ്ക് വെയില്‍ എത്ര നല്ല കളികളാണെന്ന് പറഞ്ഞാലും മാതാപിതാക്കളുടെ ശ്രദ്ധ കുട്ടികള്‍ ചെയ്യുന്ന കാര്യങ്ങളില്‍ എപ്പോഴും ഉണ്ടായിരിക്കണമെന്ന് പിങ്ക് വെയിലിന്റെ അണിയറ പ്രവര്‍ത്തകര്‍ തന്നെ മുന്നറിയിപ്പ് നല്‍കുന്നുമുണ്ട്.

നട്ടുച്ചയ്ക്കും കൂരിരുട്ട്; ആഗസ്റ്റ് 21ന് അമേരിക്ക പൂര്‍ണ്ണമായും ഇരുട്ടിലാകും; അത്യപൂര്‍വ്വ പ്രതിഭാസത്തിന് സാക്ഷ്യം വഹിക്കാന്‍ ശാസ്ത്രലോകം
Posted by
15 August

നട്ടുച്ചയ്ക്കും കൂരിരുട്ട്; ആഗസ്റ്റ് 21ന് അമേരിക്ക പൂര്‍ണ്ണമായും ഇരുട്ടിലാകും; അത്യപൂര്‍വ്വ പ്രതിഭാസത്തിന് സാക്ഷ്യം വഹിക്കാന്‍ ശാസ്ത്രലോകം

വാഷിങ്ടണ്‍: അമേരിക്ക പൂര്‍ണ്ണമായും ഇരുട്ടിലാകുന്ന അപൂര്‍വ്വ കാഴ്ചയ്ക്ക് സാക്ഷ്യം വഹിക്കാന്‍ ഒരുങ്ങുകയാണ് ശാസ്ത്രലോകം. ആഗസ്റ്റ് 21 ന് തിങ്കളാഴ്ച അമേരിക്കയുടെ ഭൂരിഭാഗവും കുറച്ചു സമയത്തേക്ക് പൂര്‍ണ്ണമായും ഇരുട്ടിലാകും. തിങ്കളാഴ്ച ദിവസം സൂര്യന്‍ ചന്ദ്രന് പിന്നില്‍ മറയും. നട്ടുച്ചയ്ക്ക് പോലും നഗരങ്ങള്‍ ഇരുട്ടിലാകും. ഈ അത്യൂര്‍വ്വ പ്രതിഭാസം വീക്ഷിക്കാനും ഗവേഷണം നടത്താനുമായി ശാസ്ത്രജ്ഞര്‍ ഒരുങ്ങി കഴിഞ്ഞു.

സൂര്യഗ്രഹണം കാണാന്‍ എത്തുന്ന സഞ്ചാരികളുടെ തിരക്കിനാല്‍ കഴിഞ്ഞ വര്‍ഷം തന്നെ ഹോട്ടലുകള്‍ എല്ലാം ബുക്കിങ് തീര്‍ന്നിരുന്നു. അമേരിക്ക രൂപീകരിച്ചതിനു ശേഷം (1776) ദൃശ്യമാകുന്ന ആദ്യത്തെ പൂര്‍ണ്ണഗ്രഹണമായിരിക്കും ആഗസ്റ്റ് 21 നു ഉണ്ടാവാന്‍ പോകുന്നതെന്നാണ് ശാസ്ത്രജ്ഞര്‍ പറയുന്നത്.

അമേരിക്കയുടെ ചരിത്രത്തിലെ തന്നെ ഏറ്റവും വലിയ സൂര്യഗ്രഹണം എന്നതാണ് ഇതിന്റെ പ്രധാന പ്രത്യേകത.

ഇത്രയും നന്നായി കാണാന്‍ പറ്റുന്ന തരത്തില്‍ 1970നു ശേഷം ഒരു സൂര്യഗ്രഹണം ഇവിടെ ഉണ്ടായിട്ടില്ലെന്നും പന്ത്രണ്ടു സ്റ്റേറ്റുകളില്‍ ഉള്ളവര്‍ക്ക് ഇത് കാണാന്‍ സാധിക്കുമെന്നും നാഷവില്ലെയിലെ സോളാര്‍ ഫെസ്റ്റ് സംഘാടകര്‍ പറയുന്നു.

മണ്ണില്‍ നിന്നും വെള്ളി ആഗിരണം ചെയ്യുന്ന നെല്ല്; സുപ്രധാന കണ്ടുപിടുത്തത്തിനു പിന്നില്‍ മലയാളി ഗവേഷകന്‍
Posted by
08 August

മണ്ണില്‍ നിന്നും വെള്ളി ആഗിരണം ചെയ്യുന്ന നെല്ല്; സുപ്രധാന കണ്ടുപിടുത്തത്തിനു പിന്നില്‍ മലയാളി ഗവേഷകന്‍

കൊല്‍ക്കത്ത: മണ്ണില്‍ നിന്നും വെള്ളി ആഗിരണം ചെയ്യുന്ന പ്രത്യേക ഇനം അരി കണ്ടെത്തി മലയാളി ഗവേഷകന്‍. പശ്ചിമ ബംഗാളില്‍ നിന്നും വിളവെടുത്ത അരിയുടെ തവിടിലാണ് സില്‍വറിന്റെ അംശം ധാരാളം അടങ്ങിയിരിക്കുന്നതായി മലയാളി ഗവേഷകന്‍ കണ്ടെത്തിയിരിക്കുന്നത്. മദ്രാസ് ഐഐടിയിലെ പ്രൊഫസറും നാനോ ടെക്നോളജിയിലെ പ്രശസ്ത ശാസ്ത്രജ്ഞനുമായ എടപ്പാള്‍ സ്വദേശി പ്രദീപ് തലാപ്പിലും സംഘവുമാണ് ഈ കണ്ടുപിടുത്തത്തിനു പിന്നില്‍. പശ്ചിമ ബംഗാളിലെ പുരുലിയ പ്രദേശത്ത് വളര്‍ത്തുന്ന ഗരീബ് സാല്‍ എന്ന ഇനം അരിയുടെ തവിടിലാണ് വെള്ളിയുടെ സാന്നിധ്യം സ്ഥിരീകരിച്ചത്.

ഇത്തരം നെല്‍ വര്‍ഗ്ഗത്തിന് ശുദ്ധജലം ആഗിരണം ചെയ്യുവാനും, മണ്ണില്‍ സ്വാഭാവികമായുമുള്ള ലോഹത്തെ വലിച്ചെടുക്കാനും കഴിവുണ്ട്. ഒരു കിലോ ധാന്യത്തില്‍ 15 മില്ലിഗ്രാം ലോഹം അടങ്ങിയിരിക്കുന്നതായി ഗവേഷകര്‍ പറയുന്നു. മണ്ണില്‍ സില്‍വറിന്റെ അംശം. 15 മില്ലിഗ്രാമേ ഉള്ളുവെങ്കിലും ഗരീബ് സാലിനു അതില്‍ കൂടുതല്‍ അളവില്‍ സില്‍വറിനെ ആഗിരണം ചെയ്യാന്‍ കഴിയും. കൃഷിയിലൂടെ ലോഹ വാണിജ്യ വ്യാപനത്തിനുള്ള സാധ്യത കൂടുതലാണെന്ന് ഗവേഷകര്‍ അഭിപ്രായപ്പെടുന്നു.

നിരവധി ഗവേഷണങ്ങള്‍ക്കൊടുവില്‍ ആണ് പ്രധാനമായ ഈ കണ്ടുപിടിത്തം നടത്തിയത്. മൂന്നുവര്‍ഷമായി പ്രദീപും സംഘവും ഇതിന്റെ ഗവേഷണത്തിലായിരുന്നു.

ഇന്നത്തേക്ക് അഞ്ച് വര്‍ഷം പിന്നിട്ടു ക്യൂരിയോസിറ്റി ചൊവ്വയിലിറങ്ങിയിട്ട്
Posted by
06 August

ഇന്നത്തേക്ക് അഞ്ച് വര്‍ഷം പിന്നിട്ടു ക്യൂരിയോസിറ്റി ചൊവ്വയിലിറങ്ങിയിട്ട്

നാസയുടെ ചൊവ്വാപര്യവേക്ഷണ പേടകമായ ക്യൂരിയോസിറ്റി ചൊവ്വയിലിറങ്ങിയിട്ട് അഞ്ച് വര്‍ഷം തികഞ്ഞു. 2011 നവംബര്‍ 26ന് ഫ്‌ളോറിഡയിലെ കേപ് കനവറില്‍ നിന്നും വിക്ഷേപിച്ച ക്യൂരിയോസിറ്റി 2012 ഓഗസ്റ്റ് ആറിനാണ് ചൊവ്വയുടെ പ്രതലത്തില്‍ ഇറങ്ങിയത്.

എട്ടരമാസം കൊണ്ട് 57 കോടി കിലോമീറ്റര്‍ ദൂരം സഞ്ചരിച്ചാണ് ഒരു ടണ്‍ ഭാരമുള്ള വാഹനം ഇന്ത്യന്‍ സമയം 11.02-ന് ചൊവ്വയിലെ മൗണ്ട് ഷാര്‍പ് പര്‍വതമേഖലയിലെ ക്രേറ്റര്‍ എന്ന ഗര്‍ത്തത്തില്‍ ചെന്നിറങ്ങിയത്. ചൊവ്വയെ വലംവെക്കുന്ന ഒഡീസി എന്ന ഉപഗ്രഹം വഴിയാണ് ക്യൂരിയോസിറ്റിയില്‍ നിന്നുള്ള ആദ്യ സിഗ്‌നലുകള്‍ നിമിഷങ്ങള്‍ക്കുള്ളില്‍ ഭൂമിയിലെത്തിയത്.

ചൊവ്വയിലെ ജലസാന്നിധ്യത്തിന്റെ ചരിത്രവും ജീവസാന്നിധ്യത്തിന്റെ സാധ്യതകളും അന്വേഷിക്കുക എന്നതായിരുന്നു ക്യൂരിയോസിറ്റിയുടെ പ്രധാന ദൗത്യം. 2013ല്‍ ചൊവ്വയുടെ പ്രതലത്തില്‍ രണ്ടു ശതമാനം ജലാംശമുണ്ടെന്ന് ക്യൂരിയോസിറ്റി കണ്ടെത്തി. ഇറങ്ങിയ സ്ഥലത്തുനിന്ന് 400 മീറ്റര്‍ അകലെ കാറ്റിലുലഞ്ഞ മണല്‍ത്തിട്ടകളുള്ള റോക്ക്‌നെസ്റ്റ് ( Rocknest ) എന്ന സ്ഥലത്തുനിന്ന് ക്യൂരിയോസിറ്റി ശേഖരിച്ച സാമ്പിള്‍ വിശകലനം ചെയ്താണ് വെള്ളത്തിന്റെ തോത് പേടകം മനസിലാക്കിയത്.

അമേരിക്കന്‍ ബഹിരാകാശ ഗവേഷണ എജന്‍സിയായ നാസ ചൊവ്വയിലിറക്കുന്ന നാലാമത്ത പേടകമാണ് ക്യൂരിയോസിറ്റി. ഭൂമിയ്ക്കപ്പുറത്ത് ജീവനെ സഹായിക്കുന്ന ഘടകങ്ങള്‍ക്കായുള്ള മനുഷ്യന്‍ നടത്തുന്ന അന്വേഷണത്തിന്റെ ഭാഗമാണ് ക്യൂരിയോസിറ്റി.

ചൊവ്വയില്‍ ജീവ സാന്നിധ്യമുണ്ടോ എന്ന് കണ്ടെത്തുന്നതിനേക്കാളുപരി ഭാവിയില്‍ ജിവനെ സഹായിക്കുന്ന എന്തെങ്കിലും ഘടകങ്ങള്‍ ചൊവ്വയുടെ പ്രതലത്തില്‍ അടങ്ങിയിട്ടുണ്ടോ എന്ന് അന്വേഷണത്തിലാണ് ക്യൂരിയോസിറ്റിയെന്ന് നാസ നേരത്തെ തന്നെ വ്യക്തമാക്കിയിരുന്നു.

ദൗത്യം തുടങ്ങി അഞ്ച് വര്‍ഷം തികയുന്ന ഈ വേളയില്‍ വലിയ ലക്ഷ്യങ്ങളുമായി ക്യൂരിയോസിറ്റി പ്രയാണം തുടരുമെന്ന് നാസ വ്യക്തമാക്കി

സ്വന്തമായി ഉണ്ടാക്കിയ ഭാഷയില്‍ പരസ്പരം സംസാരിച്ച് ‘യന്തിരന്മാര്‍’; ഞെട്ടിയ ഫേസ്ബുക്ക് പരീക്ഷണം നിര്‍ത്തി
Posted by
02 August

സ്വന്തമായി ഉണ്ടാക്കിയ ഭാഷയില്‍ പരസ്പരം സംസാരിച്ച് 'യന്തിരന്മാര്‍'; ഞെട്ടിയ ഫേസ്ബുക്ക് പരീക്ഷണം നിര്‍ത്തി

മസാച്ചുസെറ്റ്‌സ്: യന്ത്രമനുഷ്യര്‍ സ്വന്തമായി ഭാഷയുണ്ടാക്കി സംസാരം തുടങ്ങിയാല്‍ ഭയക്കേണ്ടത് മനുഷ്യര്‍ തന്നെയാണ്. കൃത്രിമ തലച്ചോര്‍ പ്രവര്‍ത്തിക്കാന്‍ തുടങ്ങിയാല്‍ യന്തിരന്മാര്‍ വാഴുന്ന കാലം വിദൂരമല്ല. ഇത്തരത്തില്‍ രണ്ട് യന്ത്രമനുഷ്യര്‍ സ്വയം സ്വാതന്ത്ര്യം പ്രഖ്യാപിച്ച് ‘കൃത്രിമബുദ്ധി’ (ആര്‍ട്ടിഫിഷ്യല്‍ ഇന്റലിജന്‍സ്) കയറ്റിയ രണ്ടു പ്രോഗ്രാമുകളിലൂടെ സ്വന്തമായി ഭാഷയുണ്ടാക്കി സംസാരിച്ചു തുടങ്ങിയതോടെ ഫേസ്ബുക്ക് കമ്പനി പരീക്ഷണം തന്നെ നിര്‍ത്തിവച്ചു.

ഫോണില്‍ കസ്റ്റമര്‍മാര്‍ വിളിക്കുമ്പോള്‍ മറുപടി പറയാന്‍ പ്രോഗ്രാം ചെയ്തു വച്ചിരിക്കുന്ന രണ്ടു ‘ചാറ്റ്‌ബോട്ടുകളെ’ പരസ്പരം ബന്ധിപ്പിക്കുകയാണ് ഫേസ്ബുക്ക് വിദഗ്ധര്‍ ചെയ്തത്. ശേഷം ഇവയെ പരസ്പരം ചര്‍ച്ച ചെയ്ത് വിവരങ്ങളെ കൂട്ടിയോജിപ്പിച്ച് ഭാഷ മെച്ചപ്പെടുത്താന്‍ അനുവദിച്ചു.

എന്നാല്‍ സ്വയം തീരുമാനമെടുത്തപോലെ ഇംഗ്ലീഷല്ലാത്ത ഒരു തരം ഷോര്‍ട്ട് ഹാന്‍ഡ് ഭാഷ ഉണ്ടാക്കിയാണ് കംപ്യൂട്ടറുകള്‍ പരസ്പരം സംസാരിച്ചത്.

എന്നാല്‍ ഹേയ്! തങ്ങള്‍ പേടിച്ചിട്ടൊന്നുമല്ല, പരീക്ഷണം നിര്‍ത്തിയതെന്നും മനുഷ്യരോട് പെരുമാറേണ്ടതിനു പകരം പരസ്പരബന്ധമുണ്ടാക്കാന്‍ ശ്രമിച്ച് വഴിതെറ്റിപ്പോയതു കൊണ്ടാണെന്നും ഫേസ്ബുക്ക് അധികൃതര്‍ വിശദീകരിക്കുന്നു.

വൈറസുകളില്‍ നിന്നും സൈബര്‍ അറ്റാക്കുകളില്‍ നിന്നും രക്ഷനേടാന്‍ ചില പ്രധാന പോംവഴികള്‍
Posted by
31 July

വൈറസുകളില്‍ നിന്നും സൈബര്‍ അറ്റാക്കുകളില്‍ നിന്നും രക്ഷനേടാന്‍ ചില പ്രധാന പോംവഴികള്‍

ലോകം മുഴുവന്‍ റാന്‍സംവെയര്‍ അഥവാ വാനാക്രൈ എന്ന സൈബര്‍ ആക്രമണത്തിന്റെ മുള്‍മുനയിലായിരുന്നല്ലോ. 150 രാജ്യങ്ങളും രണ്ട് ലക്ഷം കമ്പ്യൂട്ടര്‍ ശൃഖലകളുമാണ് റാന്‍സംവെയര്‍ ആക്രമണത്തിനു ഇരയായത്. ഇന്ത്യയില്‍ നൂറു കണക്കിനു കമ്പ്യൂട്ടറുകളാണ് റാന്‍സംവെയര്‍ ബാധിച്ചതായി റിപ്പോര്‍ട്ട് ചെയ്തത്. കേരളത്തിലും ഈയൊരു സൈബര്‍ ആക്രമണം നടന്നതായി
രേഖപ്പെടുത്തിയിട്ടുണ്ട്. ലോകം കണ്ടതില്‍ ഏറ്റവും വലിയ സൈബര്‍ ആക്രമണമാണ് റാന്‍സംവെയര്‍.

എന്താണ് റാന്‍സംവെയര്‍?

റാന്‍സംവെയര്‍ ഒരു അപകടകാരിയായ സോഫ്റ്റ്‌വെയറാണ്.അത് കമ്പ്യൂട്ടറുകളിലെ ഫയലുകള്‍ എന്‍ക്രിപ്റ്റ് ചെയ്ത് ഉപയോഗിക്കാന്‍ പറ്റാത്ത രീതിയിലേക്ക് മാറ്റും. പിന്നീട് ആ കമ്പ്യൂട്ടര്‍ തിരിച്ചു പഴയ രീതിയിലേയ്ക്ക് മാറ്റാന്‍ പണം ആവശ്യപ്പെടും.

റാന്‍സംവെയറില്‍ നിന്ന് രക്ഷനേടാന്‍ 5 വഴികള്‍:

1.കംപ്യൂട്ടറിലെ ഓപ്പറേറ്റിങ് സിസ്റ്റം (ഒഎസ്) അപ്‌ഡേറ്റ് ചെയ്യുക

ഒഎസുകളില്‍ ഹാക്കര്‍മാര്‍ക്കും മാല്‍വെയറുകള്‍ക്കും നുഴഞ്ഞു കയറാനുള്ള വഴികള്‍ ഇടയ്ക്ക് ഇടയ്ക്ക് കണ്ടുപിടിക്കപ്പെടാറുണ്ട്. ഇത് അപ്പപ്പോള്‍തന്നെ ഒഎസ് ഉണ്ടാക്കുന്ന കമ്പനി (ഉദാഹരണം വിന്‍ഡോസിന് മൈക്രോസോഫ്റ്റ്) അടയ്ക്കാറുമുണ്ട്. അപ്പോള്‍ നിങ്ങളുടെ കംപ്യൂട്ടറിന്റെ ഒഎസില്‍ ഇത്തരം ഒരു സെക്യൂരിറ്റി പാച്ച് ഇന്‍സ്റ്റാള്‍ ചെയ്യാന്‍ സന്ദേശം വന്നാല്‍ അത് എന്തുകൊണ്ടും ചെയ്യുക. Automatic updates എന്നത് ഓണാക്കി വയ്ക്കുക.
അല്ലെങ്കില്‍ പണി കിട്ടാന്‍ സാധ്യതയുണ്ട്. ഇതുകൂടാതെ പഴയ ഒഎസുകള്‍ക്ക് കമ്പനികള്‍ ഇത്തരം അപ്‌ഡേറ്റ് അയക്കുന്നത് നിര്‍ത്തിയും കാണും. അപ്പോള്‍ സപ്പോര്‍ട്ട് ഇല്ലാത്ത ഒഎസ് ആണ് നിങ്ങള്‍ ഉപയോഗിക്കുന്നതെങ്കില്‍ ഇത്തരം സുരക്ഷാപഴുതുകള്‍ അടയ്ക്കാന്‍ നിങ്ങള്‍ക്ക് സാധിക്കുകയില്ലതാനും. പുതിയ ഒഎസിലേക്ക് മാറുക അല്ലാതെ വേറെ രക്ഷയില്ലതാനും. ഈ പ്രശങ്ങളൊക്കെ കാരണമാണ് വാനാക്രൈ നാശംവിതച്ചത്.

2.ആന്റി മാല്‍വെയര്‍ സോഫ്‌റ്റ്വെയര്‍ ഉപയോഗിക്കുക

ആന്റിവൈറസ് പ്രോഗ്രാമുകള്‍ കുറെയേറെ ആക്രമണങ്ങളില്‍നിന്ന് നിങ്ങളെ രക്ഷിക്കുമെങ്കിലും, അതിന്റെ കൂടെ ഒരു ആന്റി മാല്‍വെയര്‍ സോഫ്റ്റ്‌വെയര്‍കൂടി ഇന്‍സ്റ്റാള്‍ ചെയ്യുന്നതാണ് നല്ലത്. പുതിയ മാല്‍ വെയറുകള്‍ വരുമ്പോള്‍ അതിനെ തുരത്താന്‍ അപ്പപ്പോള്‍ അപ്‌ഡേറ്റുകള്‍ ഇത്തരം പ്രോഗ്രാമുകള്‍ ഇറക്കാറുണ്ട്. കാസ്‌പെര്‍സ്‌കി, നോര്‍ട്ടന്‍ ബിറ്റ് ഡിഫന്‍ഡര്‍ എന്നിവ ചില ഉദാഹരണങ്ങളാണ്.

3.ഡാറ്റാ ബാക്കപ്പ് ചെയ്യുക

സിസ്റ്റം ക്രാഷ് ആയാല്‍ ഡാറ്റ നഷ്ടപ്പെടാന്‍ സാധ്യതുള്ളതുകൊണ്ടു മാത്രമല്ല ഇത്തരം നശീകരണശേഷിയുള്ള മാല്‍വെയറുകള്‍ ആക്രമിച്ചാലും ഡാറ്റാനഷ്ടം വരാം. നഷ്ടം കുറെയേറെ കുറയ്ക്കാന്‍ ഡാറ്റ ബാക്കപ്പ് ചെയ്യാന്‍ ഒന്നുകില്‍ ബോക്‌സ്, ഡ്രോപ്പ്‌ബോക്‌സ് പോലെയുള്ള സേവനങ്ങള്‍ ഉപയോഗിക്കുക, അല്ലെങ്കില്‍ ഒരു എക്‌സ്റ്റേണല്‍ ഡ്രൈവ് ഉപയോഗിക്കുക. ബാക്കപ്പ് എടുത്തതിനുശേഷം ഇത്തരം ഡ്രൈവുകള്‍ ഡിസ്‌കണക്ട് ചെയ്യുകയും വേണം. നെറ്റ്വര്‍ക്കിലെ വേറെ എവിടെയെങ്കിലും ബാക്കപ്പ് എടുത്തുവച്ചാല്‍ മാല്‍വെയറുകള്‍ അവിടെയും ചെന്ന് നാശംവിതയ്ക്കാന്‍ ഇടയുണ്ട്. അതുകൊണ്ട് മുകളില്‍പ്പറഞ്ഞതില്‍ ഒരു മാര്‍ഗം തെരഞ്ഞെടുക്കുക

4.ബൌസറിന്റെയും ഏറ്റവും പുതിയ പതിപ്പ് ഇന്‍സ്റ്റാള്‍ ചെയ്യുക
അത് ക്രോം ആകട്ടെ, ഫയര്‍ഫോക്‌സ് ആകട്ടെ, മറ്റെന്തെങ്കിലും ആകട്ടെ. ഒഎസിലെപ്പോലെ ഇതിലും സുരക്ഷാപിഴവുകള്‍ ഇടയ്ക്കിടയ്ക്ക് കണ്ടുപിടിക്കപ്പെടാറുണ്ട്. അതുകൊണ്ട് പുതുക്കിക്കൊണ്ടിരിക്കുക. ഇതുകൂടാതെ ബ്രൌസറില്‍ ഇന്‍സ്റ്റാള്‍ ചെയ്ത പ്‌ളഗ്ഗിനുകളും എക്സ്റ്റന്‍ഷനുകളുംകൂടി ഇടയ്ക്ക് പുതുക്കുക. അതുകൂടാതെ വിശ്വസ്യയോഗ്യമെന്നു തോന്നുന്ന പ്‌ളഗ്ഗിനുകള്‍ മാത്രം ഇന്‍സ്റ്റാള്‍ ചെയ്യുക

5.ക്‌ളിക് ചെയ്യുമ്പോള്‍ ശ്രദ്ധിക്കുക

വാനാക്രൈ പടരാന്‍ ഉപയോക്താക്കളുടെ അറിവില്ലായ്മ ഒരു വലിയ പങ്കുവഹിച്ചു. മെയിലില്‍ വന്ന മാല്‍വെയര്‍ ഫയല്‍ ക്‌ളിക്ക് ചെയ്ത് അബദ്ധത്തില്‍ ചാടുകയും, മറ്റുള്ളവരെ ചാടിക്കുകയും ആണ് പലരും ചെയ്തത്. അതുകൊണ്ട് സംശയാസ്പദമായ ലിങ്കുകളും അറ്റാച്ച്‌മെന്റ്കളും തുറക്കുന്നത് ഒഴിവാക്കുക. ഇനി പരിചയമുള്ള വിലാസത്തില്‍ നിന്നാണ് ഇങ്ങനെയൊരെണ്ണം വരുന്നതെങ്കിലും ക്‌ളിക്ക് ചെയ്യുന്നത് വളരെ ആലോചിച്ചുവേണം

Researchers have been able to find developing human being in the lab
Posted by
28 July

സമ്പൂര്‍ണ മനുഷ്യനെ ലാബില്‍ വികസിപ്പിക്കുന്ന നിര്‍ണ്ണായക കണ്ടെത്തലുമായി ഗവേഷകര്‍

വാഷിങ്ടണ്‍: പിഴവുകളേതുമില്ലാത്ത സമ്പൂര്‍ണ മനുഷ്യനെ ലാബില്‍ സൃഷ്ടിക്കാനുള്ള മനുഷ്യശ്രമം വിജയിച്ചെന്ന സൂചന നല്‍കി പോര്‍ട്‌ലന്‍ഡിലെ ഒറീഗണ്‍ ഹെല്‍ത്ത് ആന്‍ഡ് സയന്‍സ് യൂനിവേഴ്‌സിറ്റി പഠനം.

മനുഷ്യ ഡിഎന്‍എയുടെ ജനിതക ഘടനയില്‍ നിര്‍ണായക മാറ്റത്തിരുത്തലുകള്‍ വരുത്തി സമ്പൂര്‍ണ്ണ മനുഷ്യനെ വികസിപ്പിക്കാമെന്നാണ് യുഎസിലെ ശാസ്ത്രജ്ഞര്‍ ചൂണ്ടിക്കാണിക്കുന്നത്. ഭ്രൂണത്തിലെ ജനിതക മാറ്റം ഇതാദ്യമായല്ലെങ്കിലും കൂടുതല്‍ ഭ്രൂണങ്ങളെ ഉള്‍പ്പെടുത്തി ആവശ്യമായ എല്ലാ മുന്‍കരുതലുകളോടെയും നടത്തുന്ന ഗവേഷണമാണിതെന്ന് മസാചൂസറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി റിവ്യൂവില്‍ പറയുന്നു.ഒഎച്ച്എസ്‌യു സെന്റര്‍ ഫോര്‍ എംബ്രിയോനിക് സെല്‍ ആന്‍ഡ് ജീന്‍ തെറപ്പിയുടെ ശൗക്രാത് മിറ്റാലിപോവിന്റെ നേതൃത്വത്തിലാണ് പഠനം നടന്നത്.

ജനിതക മാറ്റം വരുത്തിയ ഭ്രൂണം വികസിപ്പിച്ച് മനുഷ്യരെ വികസിപ്പിക്കില്ലെന്ന ഉറപ്പിലാണ് ഓറിഗണില്‍ ഗവേഷണത്തിന് അനുമതി. ഇതിനായി പൊതു ഫണ്ടും അനുവദിച്ചിട്ടില്ല. ഗവേഷണം വിജയമായെങ്കിലും വിവാദങ്ങളുടെ സാധ്യത കണക്കിലെടുത്ത് മാറ്റംവരുത്തിയ ഭ്രൂണങ്ങള്‍ ദിവസങ്ങള്‍ക്കുള്ളില്‍ നശിപ്പിച്ചതായി ഗവേഷകര്‍ പറഞ്ഞു.

ജീനിലെ രോഗബാധിതമായ അനാവശ്യ ഭാഗങ്ങള്‍ നീക്കംചെയ്ത് പുതിയവ പിടിപ്പിക്കാമെന്നതടക്കമുള്ള സാധ്യതകള്‍ ഇതിലുണ്ടെങ്കിലും നിരവധി വിമര്‍ശനങ്ങള്‍ ഉയര്‍ന്നതാണ് ജനിതക എഡിറ്റിങ്. കുഞ്ഞുങ്ങളെ പ്രത്യേകമായി രൂപകല്‍പന ചെയ്‌തെടുക്കുന്ന പ്രവണതക്ക് ഈ പരീക്ഷണം വഴിവെക്കും എന്നു ചൂണ്ടിക്കാണിച്ച് ഇത്തരം പഠനങ്ങള്‍ക്കെതിരെ ഉടമ്പടിയില്‍ ചില രാജ്യങ്ങള്‍ ഒപ്പുവെച്ചിരുന്നു. നിരവധി രാജ്യങ്ങള്‍ ഇത്തരം ഗവേഷണങ്ങള്‍ നിരോധിച്ചിട്ടുമുണ്ട്.

എഡിറ്റിങ് ടെക്‌നോളജി ഉപയോഗിച്ച് മനുഷ്യ ഭ്രൂണത്തിെന്റ ജീനില്‍ നടത്തുന്ന പരീക്ഷണം തീര്‍ത്തും നിരുത്തരവാദപരമായതാണെന്ന് 2015 ഡിസംബറില്‍ വാഷിങ്ടണില്‍ ചേര്‍ന്ന നാഷനല്‍ അക്കാദമി ഓഫ് സയന്‍സിന്റെ യോഗത്തില്‍ വിമര്‍ശനം ഉയര്‍ന്നിരുന്നു. സുരക്ഷയും ക്ഷമതയും സംബന്ധിച്ച പ്രശ്‌നങ്ങള്‍ പരിഹൃതമാവുന്നതുവരെ ഇത്തരം ഗവേഷണങ്ങള്‍ അംഗീകരിക്കാനാവില്ലെന്ന് ശാസ്ത്രജ്ഞരടക്കം ചൂണ്ടിക്കാട്ടി.

പ്രൊഫ. യശ്പാല്‍ അന്തരിച്ചു
Posted by
25 July

പ്രൊഫ. യശ്പാല്‍ അന്തരിച്ചു

ന്യൂഡല്‍ഹി: പ്രമുഖ ശാസ്ത്രജ്ഞനും വൈഞ്ജാനികനും നാഷണല്‍ കരിക്കുലം ഫ്രെയിംവര്‍ക്ക് കമ്മിറ്റി ചെയര്‍മാനുമാണ് പ്രൊഫ. യശ്പാല്‍ അന്തരിച്ചു. നോയിഡയിലെ വസതിയില്‍ ആയിരുന്നു അന്ത്യം. പത്മവിഭൂഷണ്‍ (2013),പത്മഭൂഷണ്‍ (1976),മാര്‍ക്കോണി പ്രൈസ് എന്നീ ബഹുമതികള്‍ ലഭിച്ചിട്ടുണ്ട്.

ഇന്ത്യ സ്വന്തമാക്കുന്ന മിഗ് 35 യുദ്ധവിമാനത്തെ കുറിച്ചുള്ള വിവരങ്ങള്‍ ഇങ്ങനെ ആണ്
Posted by
24 July

ഇന്ത്യ സ്വന്തമാക്കുന്ന മിഗ് 35 യുദ്ധവിമാനത്തെ കുറിച്ചുള്ള വിവരങ്ങള്‍ ഇങ്ങനെ ആണ്

ന്യൂഡല്‍ഹി: ഇന്ത്യ ഏറ്റവും പുതിയ യുദ്ധവിമാനമായ ‘മിഗ്’വാങ്ങാന്‍ തയ്യാറെടുക്കുന്നു.

റഷ്യ വികസിപ്പിച്ച ഏറ്റവും പുതിയ (നാലാം തലമുറ) യുദ്ധവിമാനമാണ് മിഗ്-35. മിഗ്-35 വിമാനങ്ങള്‍ കഴിഞ്ഞ ജനുവരിയിലാണ് അവതരിപ്പിച്ചത്. മിഗ് 35ന്റെ ഒരു യൂണിറ്റിന് ഏതാണ്ട് 2600 കോടി രൂപ ചെലവ് വരുമെന്നാണു കണക്കു കൂട്ടല്‍.

മിഗ്-35 വിമാനങ്ങള്‍ ഇന്ത്യന്‍ വ്യോമസേനയ്ക്കു വില്‍ക്കാന്‍ മിഗ് കോര്‍പ്പറേഷന്‍ താല്‍പര്യം പ്രകടിപ്പിക്കുകയും ചെയ്തു. മിഗ് കോര്‍പറേഷന്റെ സിഇഒ ഇല്യ തരാസെന്‍കോ ആണ് ഇക്കാര്യം വ്യക്തമാക്കിയത്.

മിഗ്-35 വില്‍ക്കുന്നതു സംബന്ധിച്ച് ഇന്ത്യയുടെ വ്യോമസേനയുമായി പ്രാഥമിക ചര്‍ച്ചകള്‍ ആരംഭിച്ചതായും ടെന്‍ഡര്‍ സമര്‍പ്പിച്ചതായും സിഇഒ വ്യക്തമാക്കി. നിര്‍മാണം ആരംഭിക്കുന്നതിന് മുമ്പ് ആവശ്യങ്ങളെക്കുറിച്ചുള്ള ധാരണ കിട്ടേണ്ടതുണ്ടെന്നും ആ തരത്തിലുള്ള ചര്‍ച്ചകളാണ് നടക്കുന്നതെന്നും സിഇഒ പറഞ്ഞു.

എപ്പോഴും പുതിയ വിമാനം അവതരിപ്പിക്കുമ്പോള്‍ മിഗ് ആദ്യം പരിഗണിക്കുന്ന രാജ്യം ഇന്ത്യയാണ്. ഇപ്പോള്‍ വിലയെക്കുറിച്ചു ചര്‍ച്ച ചെയ്യുന്നില്ല. മിഗ്-35ന്റെ സാങ്കേതിക വിശദാംശങ്ങളെക്കുറിച്ചാണ് ആശയവിനിമയം നടക്കുന്നതെന്നും മിഗ് കോര്‍പറേഷന്‍ സിഇഒ പറഞ്ഞു. എന്നാല്‍ ഇതു സംബന്ധിച്ചു ഇന്ത്യന്‍ പ്രതിരോധ മന്ത്രാലയമോ വ്യോമസേനയോ ഔഗ്യോഗികമായി ഒരു വിവരവും ഇതുവരെ പുറത്തു വിട്ടിട്ടില്ല

ചന്ദ്രനിലേക്ക് ആദ്യമായി സ്വകാര്യ വാഹനം അയക്കാനൊരുങ്ങി ഇന്ത്യന്‍ കമ്പനി
Posted by
22 July

ചന്ദ്രനിലേക്ക് ആദ്യമായി സ്വകാര്യ വാഹനം അയക്കാനൊരുങ്ങി ഇന്ത്യന്‍ കമ്പനി

ബംഗളൂരു: ചന്ദ്രനിലേക്ക് ആദ്യമായി പേടകം അയയ്ക്കുന്ന സ്വകാര്യ കമ്പനിയാകാനൊരുങ്ങുകയാണ് ബംഗളൂരു ആസ്ഥാനമായ ഇന്‍ഡസ് കമ്പനി. നിലവില്‍ കമ്പനി നിര്‍മ്മിച്ച പേടകത്തിന്റെ സാമ്പിള്‍ ഐഎസ്ആര്‍ഒയുടെ പരിശോധനയ്ക്കായി അയച്ചിരിക്കുകയാണ്. പരിശോധന പൂര്‍ത്തിയായ ശേഷം യഥാര്‍ത്ഥ ബഹിരാകാശ പേടകത്തിന്റെ നിര്‍മാണം ആരംഭിക്കാനാണ് കമ്പനി ലക്ഷ്യമിടുന്നതെന്ന് അധികൃതര്‍ അറിയിച്ചു.

ഡല്‍ഹി ഐഐടി വിദ്യാര്‍ത്ഥിയായിരുന്ന രാഹുല്‍ നാരായണന്റെ നേതൃത്വത്തിലുള്ള കമ്പനിയില്‍ ഐഎസ്ആര്‍ഒ യില്‍ നിന്ന് വിരമിച്ച ഒരു കൂട്ടം ശാസ്ത്രജ്ഞന്മാരുടെ നേതൃത്വത്തിലാണ് പേടകത്തിന്റെ നിര്‍മ്മാണം.

പറന്നുയര്‍ന്നതിന്ന് 15 മിനിറ്റുകള്‍ക്കുള്ളില്‍ വിക്ഷേപണ വാഹനത്തില്‍ നിന്നും വേര്‍പെടുന്ന പേടകം ഭൂമിയെ ചുറ്റുകയും അതിനു ശേഷം സ്വയം പ്രവര്‍ത്തിച്ച് ചന്ദ്രനിലെത്തുകയും ചെയ്യും. അഞ്ച് ദിവസം കൊണ്ട് 3.8 ലക്ഷം കിലോമീറ്റര്‍ സഞ്ചരിച്ചാവും പേടകം ചന്ദ്രനിലെത്തുക. പേടകം ദൗത്യം പൂര്‍ത്തിയാക്കുകയാണെങ്കില്‍ ചന്ദ്രനിലേക്ക് പേടകമയക്കുന്ന ആദ്യ സ്വകാര്യ കമ്പനി ഇന്ത്യയില്‍ നിന്നാവും.