സദ്ഭാവനയാത്ര ഹൈന്ദവ തീവ്രവാദത്തെ ശക്തിപ്പെടുത്താന്‍; കവി റഫീഖ് അഹമ്മദിനെതിരെ മാധ്യമപ്രവര്‍ത്തക
Posted by
12 December

സദ്ഭാവനയാത്ര ഹൈന്ദവ തീവ്രവാദത്തെ ശക്തിപ്പെടുത്താന്‍; കവി റഫീഖ് അഹമ്മദിനെതിരെ മാധ്യമപ്രവര്‍ത്തക

കൊച്ചി: വര്‍ഗ്ഗീയതയ്ക്കും മതവിരുദ്ധതയ്ക്കുമെതിരെ ശബരിമലയിലേക്ക് നടത്തുന്ന സദ്ഭാവനയാത്രയ്‌ക്കെതിരെ ആഞ്ഞടിച്ച് പ്രമുഖ മാധ്യമപ്രവര്‍ത്തക രംഗത്ത്. പ്രശസ്ത സാഹിത്യകാരന്‍ കെപി രാമനുണ്ണി, കവി റഫീഖ് അഹമ്മദ്, രാഹുല്‍ ഈശ്വര്‍ എന്നിവര്‍ നേതൃത്വം നല്‍കുന്ന സദ്ഭാവനയാത്രയ്‌ക്കെതിരെ രംഗത്തെത്തിയിരിക്കുകയാണ്
മാധ്യമപ്രവര്‍ത്തക മനില സി മോഹന്‍.

കേരളത്തിന്റെ പ്രമുഖ മുസ്ലിം, ഹിന്ദു, ക്രിസ്ത്യന്‍ ക്ഷേത്രങ്ങള്‍ സന്ദര്‍ശിച്ച് മതസമുന്നയം നടത്തുകയാണ് യാത്രയുടെ ഉദ്ദേശ്യമെന്നാണ് സംഘാടകര്‍ പറയുന്നത്. ജനാധിപത്യ മതപരമായ ബോധത്തിലേക്ക് ഉയര്‍ത്തപ്പെടുന്നതിനായി ഓരോരുത്തരും യാത്രയില്‍ പങ്കെടുക്കണമെന്ന് സദ്ഭാവനയാത്ര ആഹ്വാനം ചെയ്യുന്നു. പരിഷ്‌കൃത സമൂഹത്തിന് വര്‍ഗ്ഗീയത ചേരുന്നതല്ലെന്നും, അപമാനകരമാണെന്നും കവി കൂടിയായ റഫീഖ് അഹമ്മദ് പറയുന്നു.

അതേസമയം, റഫീഖ് അഹമ്മദ് സദ്ഭാവനയാത്രയെ പിന്തുണയ്ക്കുന്നതിനെ രൂക്ഷമായി വിമര്‍ശിക്കുകയാണ് മനില. പ്രിയ റഫീഖ് അഹമ്മദ്, താങ്കളുടെ എല്‍പി സ്‌കൂള്‍ ടാബ്ലോ രാഷ്ട്രീയം നിരാശപ്പെടുത്തുന്നു എന്നു പറഞ്ഞാണ് മനില വിമര്‍ശനാത്മക കുറിപ്പ് തുടങ്ങുന്നത്.

ഹിന്ദുവര്‍ഗ്ഗീയതയുടെ അപ്പോസ്തലനായ തന്ത്രി കുടുംബാംഗത്തിന്റെയും
ഹിന്ദുവര്‍ഗ്ഗീയതയ്ക്ക് സാഹിത്യത്തിന്റെ ചെലവില്‍ സ്വീകാര്യതയുണ്ടാക്കിക്കൊടുക്കാന്‍ ശ്രമിച്ചുകൊണ്ടിരിക്കുന്ന സാഹിത്യകാരന്റെയുമൊപ്പം താങ്കള്‍ നടത്താന്‍ നിശ്ചയിച്ചിരിക്കുന്ന യാത്ര ഹൈന്ദവ തീവ്രവാദത്തിന് ശക്തിയുണ്ടാക്കിക്കൊടുക്കുമെന്ന് മനില പറയുന്നു. വര്‍ഗ്ഗീയത നല്ലത്, ചീത്ത എന്നൊന്നുമില്ല.

രാജ്യം ഭരിക്കുന്ന വര്‍ഗ്ഗീയ ശക്തികള്‍ കേരളത്തില്‍ പ്രയോഗിക്കുന്ന തന്ത്രമാണിത്. സാംസ്‌കാരിക മൂലധനം കൈവശമുള്ള, മുസ്ലിം നാമധാരി കൂടിയായ ഒരാളുടെ പങ്കാളിത്തം ഹൈന്ദവതയിലേക്ക് മുതല്‍ക്കൂട്ടുക എന്ന തന്ത്രം. അതില്‍ ഒരു വിപ്ലവവുമില്ല പ്രിയ കവീ. നവോത്ഥാന ചരിത്രത്തെ മറന്നു കൊണ്ട് വര്‍ഗ്ഗീയ ചേരിയില്‍ ചെന്ന് കയറിക്കൊടുക്കരുത്. അതിന് പുറത്താണ് താങ്കളെന്ന് ഒരു വരി കവിതയെഴുതണമെന്നും മനില പറയുന്നു.

ഡിസംബര്‍ 27 ന് കാഞ്ഞങ്ങാട് ശ്രീകുറുംബ ക്ഷേത്രത്തില്‍ നിന്നാരംഭിക്കുന്ന യാത്ര 30 ന് ശബരിമലയില്‍ എത്തും. അതിനിടയില്‍ കേരളത്തിന്റെ പ്രമുഖ ക്ഷേത്രങ്ങളിലും യാത്ര നടത്തുന്നതാണ് എന്ന് കെപി രാമനുണ്ണി പറയുന്നു. മതസാഹോദര്യത്തിന്റെ അത്ഭുത കേന്ദ്രമാണ് ശബരിമലയെന്നും അയ്യപ്പനും വാവരും അതുകൊണ്ടാണ് ഇപ്പോഴും ആരാധിക്കപ്പെടുന്നതെന്നും രാഹുല്‍ ഈശ്വരറും പറയുന്നു.

പേര് റയാന്‍, വയസ് ആറ്, പ്രതിവര്‍ഷ വരുമാനം 11 ദശലക്ഷം ഡോളര്‍: ഫോബ്‌സ് പട്ടികയിലെ കുഞ്ഞന്‍ കോടിപതിയെ അറിയാം
Posted by
11 December

പേര് റയാന്‍, വയസ് ആറ്, പ്രതിവര്‍ഷ വരുമാനം 11 ദശലക്ഷം ഡോളര്‍: ഫോബ്‌സ് പട്ടികയിലെ കുഞ്ഞന്‍ കോടിപതിയെ അറിയാം

കളിപ്പാട്ടങ്ങള്‍ എന്നും കുട്ടികള്‍ പ്രിയപ്പെട്ടതാണ്. കുസൃതി കുട്ടന്മാരെ വരുതിയിലാക്കാന്‍ ഈ കളിക്കോപ്പുകള്‍ വഹിക്കുന്ന പങ്കും ചെറുതല്ല. എന്നാല്‍ ആറാം വയസില്‍ കളിപ്പാട്ടങ്ങള്‍ കൊണ്ട് കോടികള്‍ കൊയ്യുന്ന ഏതെങ്കിലും ഒരു കുട്ടിയെ നിങ്ങള്‍ കണ്ടിട്ടുണ്ടോ? യൂട്യൂബില്‍ കയറി റയാന്‍ ടോയ്‌സ് റിവ്യൂ എന്ന് പരതി നോക്കിയാല്‍ കക്ഷിയെ കിട്ടും. തനിക്ക് ലഭിക്കുന്ന കളിപ്പാട്ടങ്ങളുടെ അണ്‍ബോക്‌സിംഗും, റിയാക്ഷനുമൊക്കയാണ് റയാന്‍ വീഡിയോകളുടെ ഉള്ളടക്കം.

ഫോബ്‌സിന്റെ ഹൈയസ്റ്റ് പെയ്ഡ് (ഉയര്‍ന്ന വരുമാനമുള്ള) യൂട്യൂബ് സ്റ്റാര്‍ എന്ന പട്ടികയില്‍ ഇടം പിടിച്ചതോടെയാണ് റയാന്‍ എന്ന ഈ കുഞ്ഞന്‍ കോടിപതി ലോകത്തെ ഞെട്ടിച്ചത്. പ്രതിവര്‍ഷം 11 ദശലക്ഷം ഡോളറാണ് തന്റെ വീഡിയോയിലൂടെ റായന്‍ സമ്പാദിക്കുന്നത്. മാതാപിതാക്കളുടെ സഹായത്തോടെയാണ് റയാന്‍ തന്റെ നാലാം വയസില്‍ റിയാക്ഷന്‍ വീഡിയോകള്‍ യൂട്യൂബില്‍ പോസ്റ്റ് ചെയ്യാന്‍ ആരംഭിക്കുന്നത്.


കാറുകള്‍, ട്രെയിനുകള്‍, ലീഗോ, സൂപ്പര്‍ ഹീറോസ്, ഡിസ്‌നി കളിപ്പാട്ടങ്ങള്‍, സര്‍പ്രൈസ് എഗ്ഗുകള്‍, പിക്‌സാര്‍ ഡിസ്‌നി കാറുകള്‍, മിനിയണ്‍ ഇങ്ങനെ നീണ്ടു പോകുന്നു റയാന്റെ കളിപ്പാട്ട കൊട്ടാരങ്ങളിലെ അംഗങ്ങളുടെ പട്ടിക. ഡിസ്‌നി പിക്‌സാര്‍ കാര്‍ സീരീസിന്റെ ജിയന്റ് എഗ്ഗ് സര്‍പ്രൈസ് എന്ന നൂറോളം കളിപ്പാട്ടങ്ങള്‍ അടങ്ങുന്ന വലിയ ബോളിന്റെ അണ്‍ബോക്‌സിംഗ് വീഡിയോയാണ് റയാനെ ഒറ്റ രാത്രി കൊണ്ട് യൂട്യൂബിലെ താരമാക്കിയത്.

ദുരിതക്കടലില്‍ നിന്നും കരകയറാത്ത ഒളിമ്പ്യന്‍; പരിശീലനത്തിന് പണമില്ലാതെ മെഡലുകള്‍ വില്‍ക്കാനൊരുങ്ങി മലയാളി നീന്തല്‍ താരം, സര്‍ക്കാര്‍ ജോലിയുടെ ശമ്പളം പോലും കിട്ടുന്നില്ലെന്ന് സജന്‍
Posted by
10 December

ദുരിതക്കടലില്‍ നിന്നും കരകയറാത്ത ഒളിമ്പ്യന്‍; പരിശീലനത്തിന് പണമില്ലാതെ മെഡലുകള്‍ വില്‍ക്കാനൊരുങ്ങി മലയാളി നീന്തല്‍ താരം, സര്‍ക്കാര്‍ ജോലിയുടെ ശമ്പളം പോലും കിട്ടുന്നില്ലെന്ന് സജന്‍

തിരുവനന്തപുരം: വീറും വാശിയുമോടെ വെള്ളത്തില്‍ നീന്തിതുടിക്കുമ്പോള്‍ മെഡലുകള്‍ നേടാതെ സജന്‍ കരകയറിയിട്ടില്ല. നീരിനെ പോലും വെല്ലുവിളിച്ച് വെള്ളത്തില്‍ പായുമ്പോള്‍ സാജന്‍ വിജയം മാത്രമേ മുന്നില്‍ കണ്ടിരിന്നുള്ളൂ. പക്ഷെ ജീവിതമാകുന്ന ദുരിതകടലില്‍ കരകയറാന്‍ സാജന് ഇപ്പോഴും സാധിച്ചിട്ടില്ലെന്നതാണ് സത്യം. മെഡലുകള്‍ വാരിക്കൂട്ടുമ്പോഴും മറ്റ് സംസ്ഥാനങ്ങള്‍ വെച്ച് നീട്ടിയ വമ്പന്‍ വാഗ്ദാനങ്ങള്‍ വേണ്ടെന്ന് വെച്ച് കേരള സര്‍ക്കാരിന്റെ ജോലി സ്വീകരിച്ച ഒളിമ്പ്യന്‍ സജന്‍ പ്രകാശിനെ കേരള സര്‍ക്കാര്‍ ഒന്ന് തിരിഞ്ഞ് നോക്കണം.

രാജ്യാന്തര തലങ്ങളില്‍ പോലും മലയാളത്തിന്റെ അഭിമാനമായി യശസ് ഉയര്‍ത്തിയ ഈ മലയാളി താരത്തിന്റെ അവസ്ഥ ഇന്ന് പരിതാപകരമാണ്, സര്‍ക്കാര്‍ വെച്ച് നീട്ടിയ ജോലിയുടെ ശമ്പളം പോലും കിട്ടാത്ത അവസ്ഥ. പരിശീലത്തിന് പോകാന്‍ പണമില്ലാത്തതിനാല്‍ ഒളിമ്പ്യന്‍ തന്റെ മെഡലുകള്‍ വില്‍ക്കാന്‍ ഒരുങ്ങുകയാണ്. പരിശീലനത്തിന് മറ്റ് വഴികളില്ലെന്ന് വ്യക്തമാക്കിയാണ് ദേശീയ ഗെയിംസില്‍ ലഭിച്ച ആറ് മെഡലുകള്‍ സജന്‍ വില്‍ക്കുന്നത്. പരിശീലത്തിന് പണമില്ലാത്തതിനാല്‍ കോമണ്‍വെല്‍ത്ത് ദേശീയ ഗെയിംസിനുള്ള പരിശീലനം മുടങ്ങുന്നതായി സജന്‍ വ്യക്തമാക്കി.

റിയോ ഒളിംപിക്‌സില്‍ രാജ്യത്തെ പ്രതിനിധീകരിക്കുന്ന ഏക പരുഷ നീന്തല്‍ താരമാണ് സജന്‍. തിരുവനന്തപുരത്ത് നടന്ന ദേശീയ ഗെയിംസില്‍ ആറു സ്വര്‍ണമെഡലുകളും മൂന്നു വെള്ളിമെഡലുകളും നേടിയ സുവര്‍ണതാരം. നീന്തല്‍ക്കുളത്തില്‍ പൊന്നുവാരിയ താരത്തെ വാനോളം പുകഴ്ത്തുകയായിരുന്നു അന്നെല്ലാവരും. ജീവിതത്തിന്റെ കനല്‍വഴികള്‍ താണ്ടി നീന്തിക്കുതിച്ച സജന് സംസ്ഥാന സര്‍ക്കാര്‍ ഗസറ്റഡ് റാങ്കില്‍ ജോലിയും പ്രഖ്യാപിച്ചു. ജോലി ചെയ്യുന്ന സംസ്ഥാനമായ തമിഴ്‌നാടും അയല്‍ സംസ്ഥാനമായ കര്‍ണാടകയും തളികയില്‍ വച്ചുനീട്ടിയ വലിയ പ്രലോഭനങ്ങളെ തള്ളിയാണ് സജന്‍ അന്നു കേരളത്തിനൊപ്പം നിന്നത്.

സുന്ദരന്മാരായ ആണുങ്ങളെ പെണ്ണുങ്ങളും ആഗ്രഹിക്കുന്നു; നരകത്തിലെ വിറക് കൊള്ളി വിമര്‍ശനത്തിനെതിരെ അധ്യാപികയുടെ കുറിപ്പ് വൈറലാകുന്നു
Posted by
08 December

സുന്ദരന്മാരായ ആണുങ്ങളെ പെണ്ണുങ്ങളും ആഗ്രഹിക്കുന്നു; നരകത്തിലെ വിറക് കൊള്ളി വിമര്‍ശനത്തിനെതിരെ അധ്യാപികയുടെ കുറിപ്പ് വൈറലാകുന്നു

കൊച്ചി: ഫ്ലാഷ് മോബിന്റെ പേരില്‍ മുസ്ലിം പെണ്‍കുട്ടികള്‍ക്കെതിരെ രംഗത്തുവന്നവരെ രൂക്ഷമായി വിമര്‍ശിച്ച് അധ്യാപിക രംഗത്ത്. പൊന്നാനി എംഇഎസ് കോളേജിലെ അധ്യാപികയായ അമീറ അയിഷബീഗത്തിന്റെ കുറിപ്പ് സോഷ്യല്‍മീഡിയയില്‍
ചൂടേറിയ ചര്‍ച്ചകള്‍ വഴിയൊരുക്കിയിരിക്കുകയാണ്.

സദാചാരവാദങ്ങള്‍ സ്ത്രീയ്ക്ക് മാത്രമായി ഒതുങ്ങുന്നതല്ല എന്ന് അമീറ പറയുന്നു.
മോഹിപ്പിക്കുന്ന രീതിയില്‍ വസ്ത്രം ധരിച്ചു വന്ന സുന്ദരിയെ ശാസിക്കുന്നതിനു പകരം ആ സുന്ദരിയായ അന്യസ്ത്രീയെ നോക്കി നിന്ന അനുചരനെ ശാസിച്ച ഉദാഹരണവും പ്രവാചകചര്യയില്‍ ഉണ്ട്. ഹിജാബ് പെണ്ണിന് മേല്‍ ഇടാന്‍ മാത്രമല്ല ഇസ്ലാം അനുശാസിക്കുന്നത്. പുരുഷന്റെ മനസിനും ചിന്തകള്‍ക്കും പ്രവര്‍ത്തിക്കും മേല്‍ ഇസ്ലാം ഒരു ഹിജാബ് നിഷ്‌കര്‍ഷിക്കുന്നുണ്ടെന്നും അമീറ പറയുന്നു.

പെണ്ണിന്റെ സൗന്ദര്യം ആണ് കണ്ടാലേ പ്രശ്‌നമുള്ളൂ? ആണിന്റെ സൗന്ദര്യം പെണ്ണ് കണ്ടാലോ? അടിപൊളിയായി ഡ്രസ്സ് ചെയ്തു വരുന്ന സുന്ദരന്മാരായ ആണുങ്ങളെ
പെണ്ണുങ്ങളും ആഗ്രഹിക്കുന്നുണ്ടെന്നും വിമര്‍ശകരോട് അമീറ പറയുന്നു.

അമീറയുടെ ഫേസ്ബുക്ക് പോസ്റ്റിന്റെ പൂര്‍ണരൂപം;

മുസ്ലിം പെണ്‍കുട്ടികളെ മര്യാദ പഠിപ്പിക്കാന്‍ നരകത്തിലെ വിറക് സിദ്ധാന്തവുമായി ഇറങ്ങുന്ന സാന്മാര്ഗികളായ, സ്വര്‍ഗത്തിലെ ഹൂറിമാരെ പുല്‍കാന്‍ തയ്യാറായിരിക്കുന്ന സഹോദരന്മാര്‍ കരുതുന്നത് പെണ്ണുങ്ങള്‍ ഒതുങ്ങിയിരുന്നോളണം, അവര്‍ അന്യ പുരുഷനെ ആകര്‍ഷിക്കുന്ന രീതിയില്‍ വസ്ത്രം ധരിക്കരുത്, അവളുടെ സൗന്ദര്യം അവളുടെ ഭര്‍ത്താവിന് മാത്രം ആസ്വദിക്കാനുള്ളതാണ് എന്നൊക്കെയാണല്ലോ. ആയിക്കോട്ടെ സഹോദരന്മാരെ. പക്ഷെ ഒരു സംശയം ബാക്കി നില്‍ക്കുന്നു. പെണ്ണിന്റെ സൗന്ദര്യം ആണ് കണ്ടാലേ പ്രശ്‌നമുള്ളൂ? ആണിന്റെ സൗന്ദര്യം പെണ്ണ് കണ്ടാലോ? അവള്‍ എന്താ സുന്ദരന്മാരായ ആണുങ്ങളെ മോഹിക്കൂല്ല? നിങ്ങളൊക്കെ നല്ല അടിപൊളിയായി ഡ്രസ്സ് ചെയ്തു വരുമ്പോള്‍ പെണ്ണുങ്ങളും നിങ്ങളെ ആഗ്രഹിക്കുന്നുണ്ട്. അപ്പോള്‍ ഞങ്ങള്‍ പെണ്ണുങ്ങളെ മോഹിപ്പിച്ച കുറ്റത്തിന് നിങ്ങള്‍ ഞങ്ങള്‍ ഉള്ള നരകത്തില്‍ തന്നെ വരുമല്ലോ അല്ലെ?
വ്യക്തി സ്വാതന്ത്ര്യത്തില്‍ നല്ല വിശ്വാസം ഉണ്ട് …എന്നെക്കാളും വിശ്വാസം നിങ്ങള്‍ക്കുണ്ടെന്നു ഹാദിയയുടെ കാര്യത്തില്‍ കണ്ടതുമാണ്.എന്നാല്‍ വ്യക്തി സ്വാതന്ത്ര്യത്തിന്റെ നിര്‍വചനം സാന്ദര്‍ഭികമായി മാറുന്നതാണല്ലോ നിങ്ങള്‍ പൊന്നാങ്ങളമാര്‍ക്ക്. എന്നാല്‍ ഞാന്‍ നല്‍കുന്ന അര്‍ഥം എല്ലാവരുടെ കാര്യത്തിലും ഒരുപോലെ ആയതുകൊണ്ട് തത്കാലം നിങ്ങളൂടെ വ്യക്തി സ്വാതന്ത്ര്യത്തില്‍ ഇടപെടുന്നതില്‍ വിഷമമുണ്ടെന്നു പറഞ്ഞു കൊണ്ട് തന്നെ ചോദിക്കട്ടെ …
അന്യ സ്ത്രീകളെ നിങ്ങള്‍ കാണാമോ? അവര്‍ കാണിച്ചാലും
എന്തിനാ അന്യസ്ത്രീകള്‍ ഉള്ള ഇടങ്ങളില്‍ നിങ്ങള്‍ വരുന്നത്?
എന്തിനാ അവര്‍ക്കു ഫ്രണ്ട് റിക്വസ്റ്റ് അയക്കുന്നത്?
എന്തിനാ അവരുടെ പ്രൊഫൈല്‍ സന്ദര്‍ശിക്കുന്നത്?
എന്തിനാ അവരുടെ പ്രൈവറ്റ് മെസ്സേജ് ബോക്‌സിലേക്ക് നിങ്ങള്‍ ക്ഷണിക്കപ്പെടാത്ത അതിഥിയായി വരുന്നത്?എന്തിനാ അവര്‍ പാടുന്ന പാട്ടു നിങ്ങള്‍ കേള്‍ക്കാന്‍ പോകുന്നത്?
എന്തിനാ അവര്‍ ഡാന്‍സ് വീഡിയോ പോസ്റ്റിയാലും നിങ്ങള്‍ കാണാന്‍ പോകുന്നത്?
എന്തിനാ അവരുടെ ശ്രദ്ധയാകര്‍ഷിക്കുന്ന വിധത്തില്‍ കമന്റ് ഇടുന്നത്?
ദീന്‍ പഠിപ്പിക്കുന്ന നിങ്ങളുടെ പോസ്റ്റുകള്‍,ഫോട്ടോകള്‍ അത് ഇസ്‌ലാമിക വഴിയില്‍ തന്നെ ആണോ? നീന്തല്‍കുളത്തില്‍ നിന്ന് വരെയുള്ള ഫോട്ടോ നിങ്ങള്‍ ഇടാറില്ല? സ്ത്രീയെ മോഹിപ്പിക്കുന്ന ഒന്നും അതില്‍ ഇല്ലെന്ന് പറയാമോ? ഓ മറന്നു പോയി…മോഹിപ്പിക്കുന്നവളും വഴിപിഴപ്പിക്കുന്നവളും സ്ത്രീ ആണല്ലോ… അവള്‍മോഹം ഇല്ലാത്തവളും.
മതത്തിന്റെ പേറ്റന്റ് എടുത്തവര്‍ ആണല്ലോ നിങ്ങള്‍. അന്യ സ്ത്രീകളെ കാണുമ്പോള്‍ നിങ്ങള്‍ നിങ്ങളുടെ ദൃഷ്ടികള്‍ താഴ്ത്തണമെന്നു പഠിച്ചിട്ടില്ലേ? സ്വകാര്യ ഭാഗങ്ങള്‍ സംരക്ഷിക്കണമെന്ന് പഠിച്ചിട്ടില്ലേ?
അപ്പോള്‍ ഫേസ്ബുക്കില്‍ വന്നു സ്ത്രീകളുടെ ഡ്രെസ്സിന്റെ ഇറക്കവും ശരീരത്തിന്റെ വടിവും നൃത്തചുവടുകളുടെ ഭംഗിയും നിങ്ങള്‍ നോക്കാമോ? സണ്ണി ലിയോണിന്റെയും മിയ ഖലീഫയുടേയുമൊക്കെ ഫോട്ടോക്കു അശ്‌ളീല കമെന്റും ലൈകും ഇടാമോ? മോഹിപ്പിക്കുന്ന രീതിയില്‍ വസ്ത്രം ധരിച്ചു വന്ന സുന്ദരിയെ ശാസിക്കുന്നതിനു പകരം ആ സുന്ദരിയായ അന്യസ്ത്രീയെ നോക്കി നിന്ന അനുചരനെ ശാസിച്ച ഉദാഹരണവും പ്രവാചക ചര്യയില്‍ കാണാമല്ലോ. അതൊക്കെ നിങ്ങള്‍ പ്രാവര്‍ത്തികമാക്കുന്നുണ്ടോ?
സദാചാര പോലീസ് ചമഞ്ഞു, സ്വര്‍ഗം പാട്ടത്തിനെടുത്തവര്‍ എന്നു മേനി നടിച്ചു പെണ്‍പിള്ളേരെ ദീന്‍ പഠിപ്പിക്കാനുള്ള അവകാശമുണ്ടെന്ന് വിശ്വസിച്ചു നടക്കുന്നവര്‍ ആദ്യം സ്വന്തം സ്വകാര്യജീവിതം എത്രത്തോളം സംശുദ്ധമാണെന്നു ആലോചിക്കൂ…ഹിജാബ് പെണ്ണിന് മേല്‍ ഇടാന്‍ മാത്രമല്ല ഇസ്ലാം അനുശാസിക്കുന്നത്. പുരുഷന്റെ മനസിനും ചിന്തകള്‍ക്കും പ്രവര്‍ത്തിക്കും മേല്‍ ഇസ്ലാം ഒരു ഹിജാബ് നിഷ്‌കര്ഷിക്കുന്നുണ്ട്. വഴിയിലൂടെ പോകുന്ന ഒരു പെണ്ണിനെ കണ്ണ് കൊണ്ട് പോലും വ്യഭിചാരിക്കാത്തവന്‍ ആണ് എന്ന് ഉറപ്പു വരുത്തൂ.എന്നിട്ട് പോരെ ദീനിന്റെ പേരില്‍ ഈ പരാക്രമങ്ങളും പോര്‍വിളികളും പെരുമാറ്റച്ചട്ടം പഠിപ്പിക്കലും.

നാളുകളെടുത്ത് നീട്ടി വളര്‍ത്തിയ നീളന്‍ മുടി അവര്‍ സന്തോഷത്തോടെ മുറിച്ചു; മറ്റൊരാളുടെ സന്തോഷത്തിനായി സ്വന്തം സൗന്ദര്യം ദാനം നല്‍കി പാലക്കാട് മോയന്‍സ് സ്‌കൂളിലെ ഇരുന്നൂറ് പെണ്‍കുട്ടികള്‍
Posted by
08 December

നാളുകളെടുത്ത് നീട്ടി വളര്‍ത്തിയ നീളന്‍ മുടി അവര്‍ സന്തോഷത്തോടെ മുറിച്ചു; മറ്റൊരാളുടെ സന്തോഷത്തിനായി സ്വന്തം സൗന്ദര്യം ദാനം നല്‍കി പാലക്കാട് മോയന്‍സ് സ്‌കൂളിലെ ഇരുന്നൂറ് പെണ്‍കുട്ടികള്‍

പാലക്കാട്: ഏറെ നാളുകളെടുത്ത് നീട്ടി വളര്‍ത്തിയ സുന്ദരമായ മുടി ഒരു നിമിഷം കൊണ്ട് മുറിച്ചു നീക്കിയപ്പോള്‍ ആ പെണ്‍കുട്ടികള്‍ക്കും തെല്ലും ആശങ്കയുണ്ടായിരുന്നില്ല. സന്തോഷത്തോടെ അവര്‍ തങ്ങളുടെ മുടി മുറിച്ചെടുത്ത് ദാനം നല്‍കി. പണംകൊണ്ടോ മറ്റോ സഹായം ചെയ്യാന്‍ സാധിക്കാത്ത പെണ്‍കുട്ടികള്‍ തങ്ങള്‍ക്കാവുന്ന വിധം അര്‍ബുദ രോഗികള്‍ക്ക് സാന്ത്വനമേകിയത് ഇത്തരത്തിലായിരുന്നു. പാലക്കാട് മോയന്‍സ് ഗവണ്‍മെന്റ് ഗേള്‍സ് ഹയര്‍സെക്കന്ററി സ്‌കൂളിലെ ഇരുന്നൂറ് വിദ്യാര്‍ത്ഥിനികളാണ് അര്‍ബുദ രോഗികള്‍ക്കായി തങ്ങളുടെ മുടി ദാനംചെയ്ത് മാതൃകയായത്.

മനോഹരമായും വൃത്തിയോടെയും പരിപാലിച്ചു വന്ന നീണ്ട മുടി ചീകിയൊതുക്കിയ ശേഷം ഓരോരുത്തരായി മുറിച്ച് നല്‍കി. നേരത്തെ ആലോചിച്ചുറപ്പിച്ചെടുത്ത തീരുമാന പ്രകാരമായിരുന്നു പെണ്‍കുട്ടികളുടെ നന്മനിറഞ്ഞ പ്രവര്‍ത്തി. സ്‌കൂളിലെ എന്‍എസ്എസ് യൂണിറ്റിന്റെ നേതൃത്വത്തിലാണ് വിദ്യാര്‍ത്ഥിനികള്‍ മഹത്തായ സേവനത്തിന്റെ ഭാഗമായത്.

സിനിമാ താരം ഗോവിന്ദ് പദ്മസൂര്യ ഉദ്ഘാടനം ചെയ്ത ചടങ്ങില്‍ എന്‍എസ്എസ് വളണ്ടിയറായ പ്ലസ്ടു വിദ്യാര്‍ത്ഥിനി നിഖിലയാണ് ആദ്യം മുടി ദാനം ചെയ്തത്. നിഖിലയുടെ മനസ്സിലുദിച്ച ആശയം എന്‍എസ്എസ് യൂണിറ്റ് ഏറ്റെടുത്ത് നടപ്പിലാക്കുകയായിരുന്നു.

ജെസിഐ പാലക്കാടുമായി സഹകരിച്ചാണ് എന്‍എസ്എസ് യൂണിറ്റ് പദ്ധതി പ്രാവര്‍ത്തികമാക്കിയത്. ഓരോ വിദ്യാര്‍ത്ഥിനിയുടെയും പേരില്‍ മുടി ശേഖരിച്ച് തൃശൂരിലെ കാന്‍സര്‍ സെന്ററിന് കൈമാറും. പിന്നീട് ഈ മുടി വിഗ്ഗായി മാറ്റിയ ശേഷം നിരാലംബരായ അര്‍ബുദ രോഗികള്‍ക്ക് സൗജന്യമായി നല്‍കും. ഇതാണ് പദ്ധതി.

ഈ ചെറിയ പെണ്‍കുട്ടികളുടെ ഇച്ഛാശക്തിയേയും നന്മ നിറഞ്ഞ മനസിനും നല്‍കാം ഒരു കൈയ്യടി.

സ്വന്തം ഭാര്യയുടെ മൃതദേഹം ചുമന്ന് പത്ത് കിലോമീറ്റര്‍ നടന്ന മാഞ്ചിയെ ഓര്‍ക്കുന്നുണ്ടോ? ഒന്നര വര്‍ഷം പിന്നിടുമ്പോള്‍ അദ്ദേഹത്തിന്റെ ജീവിതം ഇന്ന് ഇങ്ങനെയാണ്‌
Posted by
06 December

സ്വന്തം ഭാര്യയുടെ മൃതദേഹം ചുമന്ന് പത്ത് കിലോമീറ്റര്‍ നടന്ന മാഞ്ചിയെ ഓര്‍ക്കുന്നുണ്ടോ? ഒന്നര വര്‍ഷം പിന്നിടുമ്പോള്‍ അദ്ദേഹത്തിന്റെ ജീവിതം ഇന്ന് ഇങ്ങനെയാണ്‌

ആമ്പുലന്‍സ് എത്തിച്ചേരാത്തതിനെ തുടര്‍ന്ന് സ്വന്തം ഭാര്യയുടെ മൃതദേഹം വഹിച്ച് പത്ത് കിലോമീറ്റര്‍ നടന്ന നിസഹായനായ ദാന മാഞ്ചിയുടെ ദൃശ്യം അങ്ങനെയൊന്നും ഭാരതീയരുടെ മനസില്‍ നിന്നും മാഞ്ഞ് പോകില്ല. എന്നാല്‍ സംഭവം നടന്ന ഒന്നര വര്‍ഷം പിന്നിടുമ്പോള്‍ ദാരിദ്ര്യത്തിന്റെ കരാള ഹസ്തങ്ങളില്‍ നിന്നും വിടുതല്‍ നേടിയിരിക്കുകയാണ് ആ കര്‍ഷകന്‍. താന്‍ മേടിച്ച പുതിയ ബൈക്കിന്റെ മേല്‍ ഇരിക്കുന്ന ദാന മാഞ്ചിയുടെ ചിത്രം ഏറെ ആഹ്ലാദത്തോടെയാണ് സോഷ്യല്‍ മീഡിയയില്‍ പ്രചരിക്കുന്നത്.

ഒഡീഷയിലെ ആദിവാസി കുടുംബത്തിലെ അംഗമാണ് ദാന മാഞ്ചി. ടിബി വന്ന് മരണപ്പെട്ട ഭാര്യ അമങ്ങ് ദെയുടെ മരവിച്ച ശരീരം പുതപ്പില്‍ ചുരുട്ടി സ്വന്തം മകളുടെ അകമ്പടിയോടെയായിരുന്നു അദ്ദേഹം ഒറീസയിലെ റോഡിലൂടെ പത്ത് കിലോമീറ്ററോളം നടന്നത്. ആ ദൃശ്യം കണ്ട മനസാക്ഷിയുള്ള എല്ലാവരും ഉള്ളില്‍ സ്വയം പഴിക്കുകയും, തങ്ങള്‍ അവിടെ ഉണ്ടായിരുന്നെങ്കില്‍ എന്ന് ആഗ്രഹിക്കുകയുമാണ് ചെയ്തത്.


മാഞ്ചിയുടെ അതിപരിതാപകരമായി അവസ്ഥ കണ്ട് ബഹ്‌റൈന്‍ പ്രധാനമന്ത്രി ഖലീഫ ബിന്‍ സല്‍മാന്‍ അല്‍ ഖലീഫ രാജകുമാരന്‍ അദ്ദേഹത്തിന് 9 ലക്ഷം രൂപ നല്‍കുകയുണ്ടായി. ഒരു ബാങ്ക് അക്കൗണ്ട് പോലും ഇല്ലാതിരുന്ന ആ സാധാരണക്കാരനായ കര്‍ഷകന് ബഹ്‌റൈന്‍ പ്രധാനമന്ത്രിയുടെ സഹായം വലിയ ആശ്വസമായിരുന്നു. തുടര്‍ന്ന് ഇന്ത്യന്‍ പ്രധാനമന്ത്രിയുടെ ഗ്രാമീണ്‍ ആവാസ് യോജന വഴി പണിയുന്ന വീടിന്റെ നിര്‍മ്മാണ പ്രവര്‍ത്തനങ്ങള്‍ പുരോഗമിക്കുകയാണ്. തന്റെ മൂന്ന് മക്കള്‍ക്കും ഭുവനേശ്വറിലെ സ്‌കൂളില്‍ സൗജന്യ വിദ്യഭ്യാസവും സര്‍ക്കാര്‍ ഉറപ്പാക്കി. ഇതിനിടയില്‍ അലമതി ദെയ് എന്ന സ്ത്രീയെ മാഞ്ചി വിവാഹവും ചെയ്തു. അവര്‍ ഇന്ന് ഗര്‍ഭണിയുമാണ്.

ബാബറി മസ്ജിദ് പൊളിച്ചതിന് പ്രാശ്ചിത്തമായി 100 പള്ളികള്‍ പണിയും: ഇസ്ലാം മതം സ്വീകരിച്ച് മൂന്ന് കര്‍സേവകര്‍
Posted by
06 December

ബാബറി മസ്ജിദ് പൊളിച്ചതിന് പ്രാശ്ചിത്തമായി 100 പള്ളികള്‍ പണിയും: ഇസ്ലാം മതം സ്വീകരിച്ച് മൂന്ന് കര്‍സേവകര്‍

ന്യൂഡല്‍ഹി: ബാബറി മസ്ജിദ് പൊളിച്ചതില്‍ പശ്ചാത്തപിക്കുന്നതായി പള്ളി തകര്‍ക്കാന്‍ മുന്നില്‍ നിന്ന മൂന്ന് കര്‍സേവകര്‍. ഇസ്ലാം മതം സ്വീകരിച്ച ബല്‍ബീന്ദര്‍ സിങ്, യോഗേന്ദ്ര സിങ്, ശിവപ്രസാദ് എന്നിവരാണ് തങ്ങളുടെ പ്രവര്‍ത്തിയില്‍ കുറ്റ ബോധമുണ്ടെന്ന് വെളിപ്പെടുത്തിയത്. ഇതിന് പ്രാശ്ചിത്തമായി മരിക്കുന്നതിന് മുന്‍പ് നൂറ് പള്ളികള്‍ പണിയുക എന്നതാണ് ഇവരുടെ ലക്ഷ്യം.

ഇതിനോടകം തന്നെ ഇവര്‍ ചേര്‍ന്ന് 40 പള്ളികള്‍ പണികഴിപ്പിച്ച് കഴിഞ്ഞു. ചെയ്ത തെറ്റ് മനസിലായപ്പോളുണ്ടായ മനോവേദനയിലാണ് തങ്ങള്‍ ഇസ്ലാം മതം സ്വീകരിച്ചതെന്നാണ് മൂവരും പറയുന്നത്. 1992 ഡിസംബര്‍ 2ന് മസ്ജിദ് പൊളിക്കാന്‍ മുന്നില്‍ നിന്ന ശിവസേന പ്രവര്‍ത്തകന്‍ ബല്‍ബീര്‍ സിങ് ഇന്ന് മുഹമ്മദ് ആമിറാണ്. മസ്ജിദ് പൊളിച്ചതിന് ജന്മാനാടായ പാനിപ്പത്തില്‍ ഇദ്ദേഹത്തിന് സ്വീകരണം പോലും ലഭിച്ചിരുന്നു. അദ്ദേഹത്തിന്റെ സഹപ്രവര്‍ത്തകമായിരുന്ന യോഗേന്ദ്ര പാല്‍ മുഹമ്മദ് ഉമറാവുകയും, ശിവപ്രസാദ് ഷാര്‍ജയിലെത്തി മുഹമ്മദ് മുസ്തഫയാവുകയുമായിരുന്നു.

മൗലാന സിദ്ധീഖി എന്ന മുസ്ലീം പണ്ഡിതന്റെ മത പ്രഭാഷണങ്ങളും ഇവര്‍ ഇസ്ലാം മതം സ്വീകരിക്കുന്നതില്‍ വലിയ പങ്ക് വഹിച്ചിട്ടുണ്ട്. ബല്‍ബീര്‍ സിങ് പാനിപ്പത്തില്‍ നിന്നും ഹൈദ്രാബാദിലേക്ക് സ്ഥലം മാറുകയും, ഒരു മുസ്ലീം യുവതിയെ വിവാഹം ചെയ്യുകയും ചെയ്തു.

 

ഈ ഒരൊറ്റ ഡാന്‍സുകൊണ്ട് അവര്‍ നരകത്തില്‍ പോവുമെങ്കില്‍, ചിലത് ചോദിക്കാനുണ്ട്: യുവതിയുടെ ഫേസ്ബുക്ക് പോസ്റ്റ്‌
Posted by
05 December

ഈ ഒരൊറ്റ ഡാന്‍സുകൊണ്ട് അവര്‍ നരകത്തില്‍ പോവുമെങ്കില്‍, ചിലത് ചോദിക്കാനുണ്ട്: യുവതിയുടെ ഫേസ്ബുക്ക് പോസ്റ്റ് വൈറല്‍

മതമൗലീക വാദികളെ ഏറെ ചൊടിപ്പിച്ച ഒരു സംഭവമായിരുന്നു എയഡ്‌സ് ബോധവത്കരണത്തിനായി മലപ്പുറത്ത് പര്‍ദ്ദ ധരിച്ച ഏതാനം പെണ്‍കുട്ടികള്‍ ചേര്‍ന്ന് അവതരിപ്പിച്ച ഫഌഷ് മൊബ്‌. ഇത് കണ്ട് അസഹിഷ്ണരായി ഭീഷണി ഉയര്‍ത്തുന്നവര്‍ക്ക് ഉശിരന്‍ മറുപടിയുമായി രംഗത്ത് എത്തിയിരിക്കുകയാണ് ഷംന കോളക്കോടന്‍ എന്ന യുവതി

ഷംനയുടെ ഫേസ്ബുക്ക് പോസ്റ്റ്‌

രണ്ട് കൊല്ലം മുന്‍പ് ശ്രീശങ്കരാചാര്യയില്‍ പഠിക്കുമ്പോള്‍ വളാഞ്ചേരി പരിസരത്ത് ഞങ്ങള്‍ സുഹൃത്തുക്കള്‍ ചേര്‍ന്നൊരു തെരുവു നാടകം നടത്തി. ആണ്‍ പെണ്‍ സൗഹൃദം, സ്ത്രീ സൗഹൃദ സമൂഹം ഒക്കെത്തന്നെയായിരുന്നു പ്രമേയം. ഒട്ടും സ്വീകാര്യത ഉണ്ടാവില്ല എന്നുറപ്പുണ്ടായിട്ടും വളരെ നന്നായിത്തന്നെ അവതരിപ്പിച്ചു. അലറി വിളിച്ച പെണ്‍കുട്ടികളെയും കൂട്ടത്തില്‍ തട്ടമിട്ട പെണ്ണിനേയും ഒരിക്കലും നെഞ്ചിലേക്കടുപ്പിക്കാന്‍ തയ്യാറുണ്ടായിരുന്നില്ല അന്നവിടെ കൂടിയവര്‍ക്ക്. നിനക്കൊക്കെപറ്റിയ പണി വേറെയാ ടീ എന്നലറിയത്, ഇവളെയൊക്കെ കയറൂരി വിട്ടതാണോ എന്നൊക്കെ വിളിച്ചു കൂവിയ ചേട്ടന്മാരെ ഓര്‍ക്കുന്നുണ്ട്. തിരിച്ചൊന്നും പറയാതെ പോന്നതിലിന്ന് ഖേദമുണ്ട്. നാടകം തിരൂര്‍ സ്റ്റാന്റിലും നടത്താന്‍ പദ്ധതിയുണ്ടായിരുന്നെങ്കിലും പെണ്‍കുട്ടികള്‍ക്ക് നേരെയുണ്ടായ അസഭ്യവര്‍ഷങ്ങള്‍ കാരണം വേണ്ടെന്ന് വെച്ച് മടങ്ങുകയായിരുന്നു.

എത്ര സുന്ദരമായിട്ടാണന്നറിയോ ഞങ്ങളന്നത് അവതരിപ്പിച്ചത്. വളരെ ചുരുക്കം പേരാണെങ്കിലും കാണികളില്‍ ചിലര്‍ പ്രമേയത്തെയും അവതരണത്തെയും കുറിച്ച് നല്ല രീതിയില്‍ പ്രതികരിച്ചിരുന്നു.
ഇനി ഫ്‌ലാഷ് മൊബിലേക്ക് വരാം.അന്നവിടെ മോശം രീതിയില്‍ ആക്രോഷിച്ച ആള്‍ക്കാരാരില്‍ നിന്നും ഇപ്പറയുന്ന ഖുര്‍ആനിന്റെ നടുക്കണ്ടമായ ആള്‍ക്കാരിലും ഒരു വ്യത്യാസവും ഞാന്‍ കാണുന്നില്ല. എന്ത് സുന്ദരമായിട്ടാണ് ആ പെണ്‍കുട്ടികള്‍ഡാന്‍സ് ചെയ്തത്.മലപ്പുറത്തിന്റെ ഒത്ത നടുക്കല്ല, അതിരു കെട്ടി വിലക്കിയിട്ട് സംരക്ഷിക്കുന്ന അനേകായിരം പെണ്‍മനസുകളിലാണവര്‍ തുള്ളിക്കളിച്ചത്. ആ ഒരൊറ്റ ഡാന്‍സുകൊണ്ട് അവര്‍ നരകത്തില്‍ പോവുമെങ്കില്‍ ഒന്ന് ചോദിക്കട്ടെ, ഇക്കണ്ട കാലമത്രയും പെണ്ണുങ്ങളെ സ്വര്‍ഗത്തില്‍ കേറ്റാനുള്ള തത്രപ്പാടിനിടയില്‍ നിങ്ങള്‍ (മനപൂര്‍വ്വം)ചിലരെ വിട്ടു പോയി. കള്ളുകുടിക്കണ, പെണ്ണുപിടിക്കുന്ന, പലിശ വാങ്ങുന്ന, പലിശ കൊടുക്കുന്ന, മീഡിയകളില്‍ നിറഞ്ഞ് നില്‍ക്കുന്ന, അക്രമം കാണിക്കുന്ന, മാതാപിതാക്കളെ അനുസരിക്കാത്ത അവരെ സംരക്ഷിക്കാത്ത അനേകായിരം ആള്‍ക്കാര്‍ ഈ ഭൂമിയിലുണ്ട്.ഇവരെയൊന്നും നേരെയാക്കാതെ പെണ്ണുങ്ങള്‍ ഒന്ന് പുറത്തിറങ്ങിയാല്‍, ഒന്ന് ആടിയാല്‍ അങ്ങ് ചീത്തയാവുമെന്നും നേരെ നരകത്തിലെത്തുമെന്ന് ഭയം കാണിക്കുന്നതിലെയും ലോജിക്ക് എന്തെന്ന് മനസിലായില്ല.


ഒട്ടുമിക്ക പെണ്‍കുട്ടികളും ഇത്തരം പരിഹാസങ്ങളും അവഗണനയും കണ്ടും കേട്ടും തന്നയാണ് വളര്‍ന്നു വരുന്നത്.ഒന്നാലോചിച്ചു നോക്കു.. നിങ്ങളുടെ ഒരൊറ്റ നോട്ടം കൊണ്ട്, വാക്കു കൊണ്ട് എത്രയെത്ര ഊര്‍ജസ്വലരായ പെണ്‍കുഞ്ഞുങ്ങളെയാണ് നിങ്ങള്‍ നശിപ്പിച്ചു കളഞ്ഞത്. അതു വഴി അവളുടെ എത്ര മോഹങ്ങളാണ് നിങ്ങള്‍ തല്ലിക്കെടുത്തിയത്. പെണ്ണിനെ കുഴിച്ചുമൂടിയ ജാഹിലീ യ കാലത്തേക്ക് മടങ്ങണമെന്നാണോ നിങ്ങളീ കവല തോറും നടന്ന് സംസാരിക്കുന്നത്?
പൂത്തിരി പോലെ കത്തി നിന്ന് ചിരിക്കണ പെങ്കുട്ട്യോളെ കണ്ടിട്ടുണ്ടോ നിങ്ങള്‍? മനസില്‍ സന്തോഷത്തിന്റെ ഒരായിരം പൂത്തിരി കത്തിച്ച് ചുറ്റും പ്രകാശം പരത്തുന്ന ചിലരെ..ആത്മവിശ്വാസത്തോടെ മുന്നോട്ട് നടന്ന് സമൂഹത്തെ പടുത്തുയര്‍ത്തുന്ന സ്ത്രീകളെ.. തന്നിലെ കഴിവിനെ വളര്‍ത്തി നാടിനുപകരിക്കുന്ന രീതിയില്‍ മാറ്റിയെടുക്കുന്ന പെണ്ണിനെ.. ഇതാ കണ്ടോളൂ.. നരകത്തിലേക്കെന്ന് നിങ്ങള്‍ പറഞ്ഞ ആ പെണ്‍കുട്ടികള്‍ തന്നെയായിരിക്കും നാളെയുടെ ഭാവി.അവര്‍ക്ക് പിന്നില്‍ വരുന്ന ഒരായിരം പെണ്‍മക്കള്‍ക്ക് ഊര്‍ജം പകരാന്‍ അവര്‍ക്കിപ്പോഴേകഴിഞ്ഞു..
പിന്നെ, പുറമെ മതം നന്നാക്കലും അകത്ത് ഉഗ്രന്‍ വിഷവുമായി നടക്കുന്ന മത ഭ്രാന്തന്മാരുടെ സ്ഥാനം ഇപ്പറയുന്ന നരകത്തില്‍ തന്നെയാവും.
പെണ്ണിനെതിരെ മതം പറഞ്ഞ് ഇതുപോലുള്ള ആയിരം ആള്‍ക്കാരെ സൃഷ്ടിക്കുന്നതിലും വലിയ തിന്മ വേറെയുണ്ടെന്ന് തോന്നുന്നില്ല.

ഇനിയും പെണ്ണുങ്ങള്‍ ആടും,പാടും,കൂട്ടുകൂടും. ചുറുചുറുക്കുള്ള പെണ്‍കുട്ടികള്‍ തെരുവുകള്‍ കീഴടക്കുക തന്നെ ചെയ്യും. ഇങ്ങനത്തെ ഉസ്താദുമാരെക്കൊണ്ട് നിറഞ്ഞ സുവര്‍ഗ്ഗപ്പൂങ്കാവനം മ്മക്ക് മാണ്ട ബളേ..

 

ബിജെപി എംഎല്‍യുടെ പോത്തുകള്‍ മോഷണം പോയി: ഉടന്‍ കണ്ടെത്താന്‍ അന്വേഷണ സംഘത്തിന് മേല്‍ ഉന്നതരുടെ സമ്മര്‍ദ്ദം
Posted by
05 December

ബിജെപി എംഎല്‍യുടെ പോത്തുകള്‍ മോഷണം പോയി: ഉടന്‍ കണ്ടെത്താന്‍ അന്വേഷണ സംഘത്തിന് മേല്‍ ഉന്നതരുടെ സമ്മര്‍ദ്ദം

ഉത്തര്‍പ്രദേശിലെ ബിജെപി എംഎല്‍എ സുരേഷ് റാഹിയുടെ മോഷണം പോയ പോത്തുകളെ കണ്ടെത്താന്‍ കോട്വാലി പോലീസ് അന്വേഷണം ആരംഭിച്ചു. കഴിഞ്ഞ ശനിയാഴ്ച്ചയാണ് സീതാപൂര്‍ ജില്ലിയിലെ ഹര്‍ഗോണില്‍ നിന്ന് പോത്തുകളെ കാണാതായത്.

കാവല്‍ക്കാരുള്ള ഫാമില്‍ നിന്നാണ് ഒരു ലക്ഷം രൂപ വിലവരുന്ന രണ്ട് പോത്തുകളെ കാണാതായതെന്നാണ് എംഎല്‍എ പോലീസിനെ അറിയിച്ചത്. സംഭവത്തില്‍ പോലീസ് ഇതിനോടകം എഫ്‌ഐആര്‍ രജിസ്റ്റര്‍ ചെയ്ത് അന്വേഷണം ആരംഭിച്ച് കഴിഞ്ഞു. പോത്തുകളെ കണ്ടെത്താന്‍ ഉന്നത പോലീസ് ഉദ്യോഗസ്ഥരുടെ സമ്മര്‍ദ്ദവും കോട്വാലി പോലീസിനു മേലുണ്ട്.

നരസിംഹ റാവു സര്‍ക്കാരില്‍ കേന്ദ്രമന്ത്രിയായിരുന്ന കോണ്‍ഗ്രസ് നേതാവ് രാം ലാല്‍ റാഹിയുടെ മകനാണ് സുരേഷ് റാഹി. മുന്‍പും സമാജ്‌വാദി പാര്‍ട്ടിയുടെ മന്ത്രിയായിരുന്ന അസം ഖാന്റെ പോത്തുകള്‍ മോഷണം പോയപ്പോഴും ഉത്തര്‍പ്രദേശ് പോലീസാണ് അന്വേഷിച്ച് കണ്ടെത്തിയത്.

നല്ല കാര്യത്തെ അവഗണിച്ച് കുഴപ്പങ്ങള്‍ പെരുപ്പിക്കാന്‍ ശ്രമിച്ചു, പിണറായി സര്‍ക്കാര്‍ ചെയ്തത് മാധ്യമങ്ങള്‍ കാണാതെ പോയി: ഓഖി ദുരന്തത്തെ രാഷ്ട്രീയമാക്കാന്‍ ശ്രമിച്ചവരെ പൊളിച്ചടുക്കി മാധ്യമ പ്രവര്‍ത്തകന്‍
Posted by
05 December

നല്ല കാര്യത്തെ അവഗണിച്ച് കുഴപ്പങ്ങള്‍ പെരുപ്പിക്കാന്‍ ശ്രമിച്ചു, പിണറായി സര്‍ക്കാര്‍ ചെയ്തത് മാധ്യമങ്ങള്‍ കാണാതെ പോയി: ഓഖി ദുരന്തത്തെ രാഷ്ട്രീയമാക്കാന്‍ ശ്രമിച്ചവരെ പൊളിച്ചടുക്കി മാധ്യമ പ്രവര്‍ത്തകന്‍

കൊച്ചി: കേരളതീര്ത്ത് ആഞ്ഞടിച്ച ഓഖി കൊടുങ്കാറ്റ് വിതച്ച ദുരന്തത്തിനിടയിലും രാഷ്ട്രീയം തിരുകി കയറ്റാന്‍ ശ്രമിച്ച മാധ്യമ പ്രവര്‍ത്തനത്തെ പൊളിച്ചടുക്കി മാധ്യമപ്രവര്‍ത്തകനായ മഹേഷ് ചന്ദ്രന്‍ രംഗത്ത്. 2004ലെ സുനാമി ദുരന്തം റിപ്പോര്‍ട്ട് ചെയ്ത അനുഭവം പങ്കുവെച്ചാണ് മഹേഷ് ഓഖി ദുരന്തത്തെ വിശകലനം ചെയ്യുന്നത്. ഭയം വിതച്ചും രാഷ്ട്രീയം കൊയ്യാന്‍ ശ്രമിക്കുന്ന ഇപ്പോഴത്തെ മാധ്യമ പ്രവര്‍ത്തന രീതിയെ ചില പഴയ കാര്യങ്ങളെല്ലാം ഓര്‍മിപ്പിക്കുകയാണ് മഹേഷ് തന്റെ ഫേസ്ബുക്ക് പോസ്റ്റിലൂടെ.

മഹേഷിന്റെ ഫേസ്ബുക്ക് പോസ്റ്റ് ഇങ്ങനെ:

സുനാമി മുതല്‍ ഓഖി വരെ

2004 ല്‍ സുനാമി റിപ്പോര്‍ട്ട് ചെയ്ത മാധ്യമപ്രവര്‍ത്തകരില്‍ ഒരാളായിരുന്നു ഞാന്‍. കുളച്ചല്‍ എന്ന പ്രദേശത്ത് മാത്രം മരിച്ചത് 600 പേര്‍. എ.വി.എം കനാലില്‍ നിറയെ മൃതദേഹങ്ങളായിരുന്നു. ദുരന്തം ഉണ്ടായി മൂന്നാം ദിവസമാണ് മൃതദേഹങ്ങള്‍ പുറത്തെടുത്ത് തുടങ്ങിയത്. ഉപ്പുവെള്ളം കൊണ്ട് ചീര്‍ത്ത് തടിച്ച മൃതദേഹങ്ങള്‍ പേടിപ്പെടുത്തുന്ന കാഴ്ചയായിരുന്നു. മിക്കവരുടെയും കൈകള്‍ മുകളിലേക്ക് രക്ഷപ്പെടുത്തൂ എന്ന അപേക്ഷ പോലെ ഉയര്‍ന്നുനിന്നിരുന്നു. കുളച്ചലിലെ ആശുപത്രിയുടെയും സ്‌കൂളിന്റെയും മുറ്റത്തേക്ക് മൃതദേഹങ്ങളുമായി വാഹനങ്ങളും ആംബുലന്‍സുകളും ചീറിപ്പാഞ്ഞെത്തി മടങ്ങുമ്‌ബോള്‍ അസഹനീയമായ ദുര്‍ഗന്ധവും പരന്നു. തിരിച്ചറിയാനാകാത്ത നിലയിലായ ശവശരീരങ്ങളുടെ ഉടമസ്ഥാവകാശ തര്‍ക്കം ഹൃദയഭേദകമായിരുന്നു. തമിഴ്‌നാട്ടിലെ മുഖ്യമന്ത്രിയോ മന്ത്രിമാരോ കുളച്ചലില്‍ എത്തിയില്ലെന്ന പരാതി ചിലര്‍ പറയുന്നുണ്ടായിരുന്നു.

അപ്രതീക്ഷിതമായാണ് മൃതദേഹങ്ങള്‍ കണ്ടെടുക്കുന്നതും റോഡിലൂടെ കൊണ്ടുവരുന്നതും നിര്‍ത്തിവെക്കാന്‍ നിര്‍ദ്ദേശം ഉണ്ടായത്. എല്‍.കെ അദ്വാനി സംഭവസ്ഥലവും ആശുപത്രിയും സന്ദര്‍ശിക്കാനെത്തുന്നു, അദ്ദേഹത്തിന്റെ കോണ്‍വോയ് സുരക്ഷിതമായി കടന്നുപോകുന്നതിന് ആംബുലന്‍സുകളില്‍ തുടരെ തുടരെ മൃതദേഹങ്ങളുമായി വരുന്നത് വിഘാതമാകുമെന്നായിരുന്നു പോലീസ് ഭാഷ്യം. രക്ഷാപ്രവര്‍ത്തകര്‍ റോഡ് ഉപരോധിച്ചു. അത്രയും നേരം പോലീസ് തൊടാനറച്ച ചീര്‍ത്ത് ദുര്‍ഗന്ധം വമിക്കുന്ന മൃതദേഹങ്ങള്‍ കഷ്ടപ്പെട്ട് കണ്ടെടുത്ത് കൊണ്ടുവന്നവരെ പോലീസ് നിര്‍ദ്ദയം തല്ലിചതച്ചു. സാഹചര്യം മോശമായതോടെ എല്‍.കെ അദ്വാനി സന്ദര്‍ശനം റദ്ദാക്കി തിരികെപോയി. കുറേനേരം മൃതദേഹങ്ങള്‍ കണ്ടെടുക്കുന്നത് വൈകിപ്പിക്കാന്‍ മാത്രമാണ് അദ്വാനിയുടെ സന്ദര്‍ശനനീക്കം കാരണമായത് എന്ന യാഥാര്‍ത്ഥ്യം ഞാന്‍ റിപ്പോര്‍ട്ട് ചെയ്തു സംയമനം പാലിച്ചുതന്നെ.

100 കണക്കിന് മൃതദേഹങ്ങള്‍ കൂട്ടത്തോടെ കുഴി കുത്തി മൂടുന്നത് കണ്ട് റിപ്പോര്‍ട്ട് ചെയ്തത് ഒരിക്കലും മറക്കാനാകാത്ത അനുഭവമായി. സിന്ധു സൂര്യകുമാറിന്റെ നേതൃത്വത്തില്‍ തമിഴ്‌നാട്ടില്‍ നിന്നും ഞാനടക്കമുള്ള ഏഷ്യാനെറ്റ് റിപ്പോര്‍ട്ടര്‍മാര്‍ അന്ന് റിപ്പോര്‍ട്ട് ചെയ്തത് വൈകാരികത ആളികത്തിക്കുന്ന രീതിയിലല്ല. കേരളത്തില്‍ കരുനാഗപ്പള്ളിയില്‍ സുനാമി ദുരന്തം റിപ്പോര്‍ട്ട് ചെയ്യാന്‍ പോയ ഏഷ്യാനെറ്റ് സംഘത്തെയും ഡിഎസ്എന്‍ജി വാനും ജനക്കൂട്ടം തടഞ്ഞുവെച്ച് സംഘര്‍ഷാവസ്ഥ ഉണ്ടാക്കിയതും അന്ന് റിപ്പോര്‍ട്ടിംഗിനായി പോയ രാജീവ് രാമചന്ദ്രന്‍ ആ വിഷയം കൈകാര്യം ചെയ്തതുമെല്ലാം ഇന്നലെയെന്ന പോലെ ഓര്‍മ്മയിലുണ്ട്.

ഇന്ന് മുഖ്യധാരാ മാധ്യമപ്രവര്‍ത്തകനല്ല ഞാന്‍. പക്ഷേ, മാധ്യമപ്രവര്‍ത്തകര്‍ക്കൊപ്പം തന്നെ സഹകരിക്കേണ്ട ജോലി ചെയ്യുന്നു. ജീവന്‍ അപകടത്തിലാകുന്ന പ്രദേശങ്ങളില്‍ വരെ ആവേശത്തോടെ ജോലി ചെയ്യാന്‍ പോകുന്നവരാണ് മാധ്യമപ്രവര്‍ത്തകര്‍. ആവേശം ആഘോഷമാകാറില്ലായിരുന്നു. എന്നാല്‍, ഓഖി എന്ന ചുഴലിക്കാറ്റ് തിരുവനന്തപുരത്ത് രൂക്ഷമായ സ്ഥിതി ഉണ്ടാക്കിയതിനെ തുടര്‍ന്ന് അതിലും വലിയ വിവാദ കൊടുങ്കാറ്റാണ് ചില മാധ്യമങ്ങള്‍ കെട്ടഴിച്ചുവിട്ടത്. അറിയിപ്പ് വൈകിയോ ഇല്ലയോ എന്നത് തലനാരിഴ കീറി പരിശോധിക്കും മുമ്ബ്, അതിനെ നേരിടുന്നതിന് നാം ഇനിയെങ്കിലും കൂടുതല്‍ മുന്‍കരുതല്‍ എടുക്കണമെന്ന തരത്തിലുള്ള ചര്‍ച്ച നിര്‍ഭാഗ്യവശാല്‍ എവിടെയും കണ്ടില്ല.

സര്‍ക്കാര്‍ അത് ചെയ്തില്ല, ഇത് ചെയ്തില്ല എന്ന് പറഞ്ഞവര്‍ കേന്ദ്രസഹായത്തോടെ രക്ഷാപ്രവര്‍ത്തനം ഏകോപിപ്പിച്ചത് പിണറായി സര്‍ക്കാരാണെന്നത് മറന്നുപോയി. സംസ്ഥാന സര്‍ക്കാര്‍ അതീവഗുരുതരമായ സ്ഥിതി കേന്ദ്രത്തെ അറിയിക്കുകയും അത് കേന്ദ്രം അതേ ഗൗരവത്തില്‍ സ്വീകരിക്കുകയും ചെയ്തത് ആരൊക്കെ റിപ്പോര്‍ട്ട് ചെയ്തു. ഇത്രയധികം പേരെ രക്ഷപ്പെടുത്തിയ ഒരു ഓപ്പറേഷന്‍ അടുത്ത കാലത്തൊന്നും ഉണ്ടായിട്ടില്ല എന്നത് ഓര്‍ക്കണം.

മത്സ്യത്തൊഴിലാളികളുടെയും കുടുംബാംഗങ്ങളുടെയും ആശങ്കയും വേദനയും വളരെ വലുതാണ്. അത് അധികാരികളെ അറിയിക്കാനല്ല അത് ആളികത്തിക്കാനും രക്ഷാപ്രവര്‍ത്തനത്തിന് തന്നെ വിഘാതമാകുന്ന തരത്തില്‍ വഴിതിരിച്ചുവിടാന്‍ ചിലര്‍ ശ്രമിച്ചതും ആര്‍ക്ക് വേണ്ടിയാണ്?
കേരളത്തില്‍ സുനാമി ദുരന്തത്തില്‍ മരിച്ചുവീണത് 171 പേരായിരുന്നു. ഇതില്‍ 131 ഉം ആലപ്പാട് എന്ന ഒരു പഞ്ചായത്തിലെ ജനങ്ങളും. സര്‍ക്കാര്‍ വേണ്ടത്ര മുന്‍കരുതല്‍ സ്വീകരിച്ചില്ല എന്ന് പറഞ്ഞ് റോഡ് ഉപരോധിക്കാന്‍ ആവേശം പകര്‍ന്നില്ല അന്നൊരു മാധ്യമപ്രവര്‍ത്തകനും.

സുനാമി ബാധിതര്‍ക്കായി പൊതുസമൂഹം സമാഹരിച്ചുനല്‍കിയ സുനാമി ഫണ്ട് വകമാറ്റി കടല്‍തീരം പോലുമില്ലാത്ത സ്ഥലങ്ങളില്‍ ചെലവഴിച്ച അന്നത്തെ മുഖ്യമന്ത്രിയെ വിചാരണ ചെയ്യാത്തവരാണ് അപ്രതീക്ഷിതമായ ഒരു ആഘാതത്തില്‍ നിന്ന് പരമാവധി ആളുകളെ രക്ഷപ്പെടുത്താന്‍ നേതൃത്വം നല്‍കുന്ന മുഖ്യമന്ത്രി പിണറായി വിജയനും സര്‍ക്കാരിനും എതിരെ ജനരോഷം ഇളക്കാന്‍ ശ്രമിക്കുന്നത്.
കാണുന്നതിനും കേള്‍ക്കുന്നതിനും അപ്പുറം സത്യമുണ്ടെന്ന് മനസിലാക്കുന്നവരാണ് പ്രേക്ഷകരില്‍ വലിയ വിഭാഗമെന്നത് മറക്കുന്നത് നന്നല്ല. എല്ലാം നന്നായി നടക്കുന്നു എന്ന് പറയുന്നതല്ല മാധ്യമപ്രവര്‍ത്തനം. പക്ഷേ, നന്നായി നടക്കുന്ന കാര്യങ്ങളാകെ അവഗണിച്ചോ, ഒതുക്കിയോ കുഴപ്പങ്ങള്‍ പെരുപ്പിച്ച് പറയുന്നതുമല്ല മാധ്യമപ്രവര്‍ത്തനം. സത്യമുള്ള തൊഴിലാണിത് എന്ന് നാളെ ആരോടും പറയാനാകാത്ത സ്ഥിതി ക്ഷണിച്ചുവരുത്തുന്നത് ഭൂഷണമല്ല.