story of a common man who participated in olympics
Posted by
27 August

ഇരുള്‍ നിറഞ്ഞ വഴിയിലൂടെ നടന്ന് നടന്ന് ഒളിമ്പിക്‌സിലേക്ക്

ഉത്തരാഖണ്ഡ്: റിയോ ഒളിമ്പിക്‌സില്‍ വനിതകളുടെ ബാഡ്മിന്റണില്‍ പിവി സിന്ധുവിലൂടെ വെള്ളിയും വനിതകളുടെ ഗുസ്തിയില്‍ സാക്ഷി മാലിക്കിലൂടെ വെങ്കല മെഡലും നേടി ഇന്ത്യ സന്തോഷിക്കുമ്പാള്‍ നമ്മള്‍ അരിയാതെ പോകുന്ന കഥകള്‍ ഇനിയും ബാക്കി. ഇന്ത്യന്‍ അത്‌ലറ്റുകള്‍ക്ക് അസാധ്യമെന്ന് കരുതിയ കായിക ഇനങ്ങളില്‍ തങ്ങളുടെ പരിശ്രമത്തിലൂടെ ഏവരുടേയും ശ്രദ്ധ പിടിച്ച താരങ്ങളും റിയോയില്‍ ഇനിയുമുണ്ട്. ജിംനാസ്റ്റികില്‍ നാലാം സ്ഥാനത്തെത്തിയ ദീപ കര്‍മാക്കറും വനിതകളുടെ ഗോള്‍ഫില്‍ മികച്ച പ്രകടനം പുറത്തെടുത്ത അതിഥി അശോകും ബാഡ്മിന്റണ്‍ ക്വാര്‍ട്ടര്‍ വരെയെത്തിയ കിഡമ്പി ശ്രീകാന്തും ആ താരങ്ങളില്‍ ഉള്‍പ്പെടുന്നു. ഇതിനിടയില്‍ ആരും ശ്രദ്ധിക്കാത പോയ ഒരു അത്‌ലറ്റുണ്ട്. റിയോയിലെ പ്രകടനത്തിന് എന്തുകൊണ്ടും അഭിനന്ദനം അര്‍ഹിക്കുന്ന ഒരു യുവാവ്;മനിഷ് സിങ് റാവത്ത്.

ഹോട്ടല്‍ വെയ്റ്റര്‍ മുതല്‍ ഒളിമ്പ്യന്‍ വരെയുള്ള ദൂരം ഒട്ടും ചെറുതല്ല. എന്നാല്‍ ഈ ഉത്തരാഖണ്ഡ് യുവാവിന്റെ റിയോയിലെ മത്സര ഇനം അധികമാരും പ്രധാന്യം നല്‍കാത്ത ഒളിമ്പിക് നടത്തമത്സരമായിരുന്നു. 300 പേര്‍ മത്സരിച്ച ഒളിമ്പിക്‌സ് റേസ് വോക്കിങ്ങില്‍ പതിമൂന്നാമതായാണ് മനീഷ് ഫിനിഷ് ലൈനില്‍ തൊട്ടതെന്ന് അറിയുക. യൂറോപ്യന്‍,ഏഷ്യന്‍ ചാമ്പ്യന്‍മാരേയും രണ്ട് മുന്‍ ഒളിമ്പിക് ജേതാക്കളേയും പിന്തള്ളി ആയിരുന്നു ഒളിമ്പിക് ട്രാക്കിലെ കുതിപ്പ്. മികച്ച പ്രകടനം കാഴ്ചവെച്ചുവെങ്കിലും ആരും മനിഷിനെ തിരുച്ചറിഞ്ഞില്ല. ഇനി മനിഷിന്റെ വ്യക്തി ജീവിതത്തിലേക്ക്. ഏവര്‍ക്കും പ്രചോദനമേകുന്നതാണ് മനീഷിന്റെ പിന്‍കാല ജീവിതം. പത്ത് വയസ്സുള്ളപ്പോള്‍ അച്ഛന്‍ മരിച്ചു. കുടുംബത്തിന് ലഭിക്കുന്ന 1500 രൂപയായിരുന്നു പ്രതിമാസ വരുമാനം. ഇതുകൊണ്ട് മാത്രം ജീവിതത്തിന്റെ രണ്ടറ്റവും കൂട്ടിമുട്ടിക്കാന്‍ കഴിയില്ലെന്ന് മനസ്സിലായതോടെ ഈ യുവാവ് ജോലി തേടിയിറങ്ങി. ഹോട്ടല്‍ വെയ്റ്ററായും കുക്ക് ആയും മനീഷ് പലയിടങ്ങളില്‍ ജോലി ചെയ്തു. ഇതിനിടെ കിട്ടിയ സമയങ്ങളില്‍ കായിക പരിശീലനവും. കീറിയ ഷൂസിട്ടായിരുന്നു മനീഷിന്റെ ഒളിമ്പിക് തയ്യാറെടുപ്പ്. എയറോഡൈനാമിക് ഷൂസ് വാങ്ങാനുള്ള പണം കൈയ്യില്‍ ഉണ്ടായിരുന്നില്ല.

മാനസിക ബലവും ശാരീരികമായ സഹനശക്തിയും ആവശ്യത്തിലധികം വേണ്ട ഒരു കായിക ഇനമാണ് റേസ് വോക്കിങ്ങ്. മത്സരത്തിലെ ഒരോ പോയിന്റിലും മത്സരാര്‍ത്ഥിയുടെ കാല്‍പാദം പൂര്‍ണമായും ട്രാക്കില്‍ പതിയണം. ഒപ്പം വേഗതയും. ഞാന്‍ കായിക മോഹം ഉപേക്ഷിക്കുകയാണെന്ന് ഒരിക്കല്‍ കോച്ചിനോട് പറഞ്ഞു. നടത്തം കൊണ്ട് മാത്രം കുടുംബത്തിന് താങ്ങാവാന്‍ സാധിക്കില്ലെന്ന് അറിഞ്ഞപ്പോഴായിരുന്നു ഈ തീരുമാനം. നാല് സഹോദരങ്ങള്‍ അടക്കമുള്ള കുടുംബത്തിന്റെ നിത്യവൃത്തിക്ക് 1,500 രൂപ മതിയാകുമായിരുന്നില്ല. അപ്പോള്‍ എനിക്കൊരു ജോലി ആയിരുന്നു ആവശ്യം. നടത്തത്തിനൊപ്പം പണം കണ്ടെത്താന്‍ ആ വര്‍ഷം ഞാന്‍ ഹൗസ് മെയ്ഡ് ആയി ജോലി ചെയ്യ്തു. ടൂറിസ്റ്റ് ഗൈഡ് ആയും ജോലി ചെയ്തിട്ടുണ്ട്. എന്നാല്‍ സ്‌പോര്‍ട്‌സില്‍ എനിക്ക് ഭാവിയുണ്ടെന്നായിരുന്നു പരിശീലകന്റെ അഭിപ്രായം. അദ്ദേഹത്തിന്റെ പ്രതീക്ഷ ട്രാക്കില്‍ നിലനിര്‍ത്താന്‍ എനിക്ക് സാധിച്ചു. എനിക്ക് ഊര്‍ജ്ജം നല്‍കുന്നതില്‍ ഞാന്‍ പരിശീലകനോടാണ് കടപ്പെട്ടിരിക്കുന്നത്.

pv sindhu rejected foriegn coach
Posted by
25 August

നയിക്കാന്‍ ഗോപിചന്ദ് മതി, വിദേശ കോച്ച് വേണ്ട: പിവി സിന്ധു

ഹൈദരാബാദ്: തന്റെ കോച്ച് ഗോപിചന്ദിനെ തള്ളിപ്പറയാന്‍ ഒരുക്കമല്ലെന്ന് വ്യക്തമാക്കി റിയോ ഒളിംപിക്‌സില്‍ ബാഡ്മിന്റണില്‍ വെള്ളി നേടിയ ഇന്ത്യയുടെ വെള്ളികിലുക്കം പിവി സിന്ധു. തുടര്‍ന്നും തനിക്ക് കോച്ചായി ഗോപിചന്ദ് തന്നെ മതിയെന്നും സിന്ധു വ്യക്തമാക്കി.

തെലങ്കാന ഉപമുഖ്യമന്ത്രി മെഹ്മൂദ് അലിയാണ് സിന്ധുവിന് പുതിയ കോച്ചിനെ നല്‍കാമെന്ന് വാഗ്ദാനം ചെയ്തത്. റിയോ ഒളിംപിക്‌സില്‍ ബാഡ്മിന്റണില്‍ വെള്ളി നേടിയ സിന്ധുവിന് അടുത്ത തവണ സ്വര്‍ണ്ണം നേടാന്‍ മികച്ച വിദേശ കോച്ചിനെ നല്‍കാമെന്നായിരുന്നു മഹ്മമൂദിന്റെ വാഗ്ദാനം. ഇത് നിരസിച്ച സിന്ധു മന്ത്രിയുടെ നിര്‍ദേശത്തോട് പ്രതികരിക്കാനില്ലെന്നും എന്റെ ഏറ്റവും നല്ല കോച്ച് ഗോപിചന്ദ് തന്നെയാണെന്നും പറഞ്ഞു.

ഒളിംപിക്‌സ് കഴിഞ്ഞ് നാട്ടിലത്തിയ സിന്ധുവും ഗോപിചന്ദും അനുമോദന ചടങ്ങുകളിലും സ്വീകരണ പരിപാടികളിലും പങ്കെടുത്തു കൊണ്ടിരിക്കുകയാണ്. വലിയ രീതിയിലുള്ള അഭിനന്ദനപ്രവാഹങ്ങളാണ് സിന്ധുവിനേയും ഗോപിചന്ദിനേയും തേടിയെത്തിക്കൊണ്ടിരിക്കുന്നത്.

ഇന്ത്യയ്ക്ക് കൂടൂതല്‍ ഒളിംപിക്‌സ് മെഡലുകള്‍ നേടണമെങ്കില്‍ അത്‌ലറ്റിക്‌സ് മേഖലയെ കൂടൂതല്‍ മെച്ചപ്പെടുത്തണമെന്ന് ഗോപി ചന്ദ് പറഞ്ഞു. അതിനായി സര്‍ക്കാര്‍ നേരിട്ട് ഇടപെട്ട് മികച്ച സംവിധാനങ്ങളൊരുക്കണമെന്നും ഗോപിചന്ദ് പറഞ്ഞു. നമുക്ക് നല്ലൊരു സംവിധാനമില്ല എന്നുള്ളതാണ് പ്രശ്‌നം. നല്ല സംവിധാനത്തിനു മാത്രമേ രാജ്യത്ത് മെഡലുകള്‍ കൊണ്ടുവരാന്‍ കഴിയൂ എന്നും ഗോചിചന്ദ് പറഞ്ഞു.

virender Sehwag’s classy response to Pierce Morgan’s sarcastic tweet
Posted by
25 August

120 കോടി ജനങ്ങളുള്ള രാജ്യം തോല്‍വിയിലും രണ്ടു മെഡല്‍ നേട്ടം ആഘോഷമാക്കുന്നുവെന്ന് പരിഹസിച്ച ബ്രിട്ടീഷ് മാധ്യമപ്രവര്‍ത്തകന്റെ വായടപ്പിച്ച് വിരേന്ദ്ര സെവാഗ്

ന്യൂഡല്‍ഹി: ഒളിംപിക്‌സിലെ ഇന്ത്യയുടെ പ്രകടനത്തേയും നേടിയ രണ്ടു മെഡലുകളേയും പരിഹസിച്ച ബ്രിട്ടീഷ് മാധ്യമപ്രവര്‍ത്തകന്‍ പിയേഴ്സ് മോര്‍ഗന് ചുട്ടമറുപടി കൊടുത്ത് വായടപ്പിച്ചിരിക്കുകയാണ് ക്രിക്കറ്റ് താരം വിരേന്ദ്ര സെവാഗ്.

”തോറ്റതിനാണോ ഇത്ര വലിയ ആഘോഷം? തോറ്റതിലൂടെ ലഭിച്ച രണ്ട് മെഡലുകള്‍ 120 കോടി വരുന്ന ഇന്ത്യ വലിയതോതില്‍ ആഘോഷിക്കുന്നു. എങ്ങനെ അമ്പരക്കാതിരിക്കും,പിവി സിന്ധുവിന്റേയും സാക്ഷി മാലിക്കിന്റേയും ഒളിമ്പിക് മെഡല്‍ നേട്ടം ഇത്ര ആഘോഷിക്കാനുണ്ടോ” എന്നു ചോദിച്ചാണ് മോര്‍ഗന്‍ ഇന്ത്യയുടെ മെഡല്‍ നേട്ടത്തെ പരിഹസിച്ചത്.

അതേസമയം ട്വിറ്ററിലൂടെ തന്നെ ഇന്ത്യയുടെ വീരു ചെറിയ സന്തോഷമാണെങ്കില്‍ അത് ഇന്ത്യക്കാര്‍ ആഘോഷിക്കുമെന്നും ക്രിക്കറ്റ് കണ്ടുപിടിച്ച ഇംഗ്ലണ്ട് ഇതുവരെ ലോകകപ്പ് നേടാത്തത് എന്തേ എന്നും തിരിച്ചടിച്ചു. കൂടാതെ ഇംഗ്ലണ്ടിന് ഇതുവരെ ലോകകപ്പ് നേടാനായിട്ടില്ല, എന്നിട്ടും ഇപ്പോഴും ലോകകപ്പ് കളിക്കുന്നു. അമ്പരപ്പുണ്ടാക്കുന്നില്ലേ? എന്നു തിരിച്ചു ചോദിക്കുകയും ചെയ്തു. ബാറ്റുകൊണ്ട് എതിര്‍ടീമിലെ ബോളേഴ്‌സിനു നല്‍കുന്ന അതേ തരത്തിലുള്ള മറുപടിയാണ് വീരുവിന്റെ മറുപടിയിലൂടെ മോര്‍ഗന് ലഭിച്ചിരിക്കുന്നത്. ഏതായാലും മറുപടി വളരെ വേഗത്തില്‍ തന്നെ ട്വിറ്ററില്‍ വൈറലായി മാറുകയും ചെയ്തു.

ഉത്തരം മുട്ടിയ മോര്‍ഗന്‍ നൂറ്റാണ്ടുകളുടെ ക്രിക്കറ്റ് പാരമ്പര്യമുള്ള ഇംഗ്ലണ്ടിന്റെ ലോകകപ്പ് നഷ്ടത്തെ ന്യായീകരിച്ച് ”അമ്പരിപ്പിക്കുന്നത് തന്നെ. കെവിന്‍ പീറ്റേഴ്സണ്‍ കളിച്ചിരുന്നുവെങ്കില്‍ ഞങ്ങള്‍ ലോകകപ്പ് നേടിയേനെ. ട്വന്റി 20 ലോകകപ്പ് നേടിയത് പോലെ. അദ്ദേഹമായിരുന്നു മാന്‍ ഓഫ് ദ സീരിസ്” എന്നു ട്വീറ്റു ചെയ്തു. എന്നാല്‍ ഉടനെ തന്നെ സെവാഗ് തിരിച്ചടിച്ചു. പീറ്റേഴ്സണ്‍ ദക്ഷിണാഫ്രിക്കക്കാരനാണെന്നും 2007 ലോകകപ്പില്‍ അദ്ദേഹം കളിച്ചിട്ടും ഇംഗ്ലണ്ട് കപ്പ് നേടിയിരുന്നില്ലെന്ന് സേവാഗ് മോര്‍ഗനെ ഓര്‍മ്മിപ്പിച്ചു. കെപി ഇതിഹാസമാണെന്നതില്‍ സംശയമില്ല. എന്നാല്‍ അദ്ദേഹം ദക്ഷിണാഫ്രിക്കയിലാണ് ജനിച്ചത്. അങ്ങനെയെങ്കില്‍ താങ്കളുടെ ലോജിക് പ്രകാരം 2007ല്‍ ഇംഗ്ലണ്ട് കപ്പ് നേടണമായിരുന്നു. ഞങ്ങള്‍ ആഘോഷിക്കുന്നതില്‍ നിങ്ങള്‍ക്കെന്താണ് പ്രശ്നം എന്നും സെവാഗ് തിരിച്ചു ചോദിച്ചു.
മോര്‍ഗന്റെ ട്വീറ്റിനെതിരെ നേരത്ത വ്യാപക വിമര്‍ശനം ഉയര്‍ന്നിരുന്നുവെങ്കിലും ഉരുളക്കുപ്പേരി പോലെ കൃത്യമായ മറുപടി നല്‍കി സെവാഗ് ട്വിറ്ററില്‍ താരമായിരിക്കുകയാണ്.

OP Jaisha retreats
Posted by
24 August

ആരോപണങ്ങള്‍ തിരുത്തി ഒപി ജെയ്ഷ; എനര്‍ജി ഡ്രിങ്ക് വേണമോയെന്ന് ചോദിച്ചിരുന്നു; താരങ്ങള്‍ക്കായി കോടികള്‍ മുടക്കാനും ഫെഡറേഷന്‍ തയ്യാര്‍

ബംഗളൂരു: റിയോ ഒളിംപികിസ് മാരത്തണ്‍ മത്സരത്തിനിടെ തനിക്ക് കുടിക്കാന്‍ വെള്ളം പോലും അത്‌ലറ്റിക് ഫെഡറേഷന്‍ ലഭ്യമാക്കിയില്ല എന്ന ആരോപണം തിരുത്തി മലയാളി കായികതാരം ഒപി ജെയ്ഷ രംഗത്ത്. കുടിവെള്ളം നല്‍കിയില്ല എന്നു താന്‍ ആരോപിച്ചിട്ടില്ല. ഇന്ത്യന്‍ അത്‌ലറ്റുകള്‍ക്ക് മികച്ച പിന്തുണയാണ് നല്‍കുന്നതെന്നും കായികതാരങ്ങള്‍ക്കായി കോടികള്‍ മുടക്കാന്‍ തയ്യാറാണെന്നും ജെയ്ഷ ബംഗളൂരുവില്‍ പറഞ്ഞു.

തന്റെ പരിശീലകന്‍ നിക്കാളോയ്‌യോട് എനര്‍ജി ഡ്രിങ്കുകള്‍ വേണമോയെന്ന് ചോദിച്ചിരുന്നുവെന്നും എന്നാല്‍ അദ്ദേഹം വേണ്ടെന്ന് പറയുകയുമായിരുന്നുവെന്നും താരം വെളിപ്പെടുത്തി. ഇനി നിക്കോളായ്ക്ക് കീഴില്‍ പരിശീലിക്കാന്‍ താനില്ലെന്നും വിവാദങ്ങളുടെ പേരില്‍ കരിയര്‍ ഉപേക്ഷിക്കില്ലെന്നും വ്യക്തമാക്കി. നേരത്തെ തന്നെ 1500 മീറ്ററില്‍ മത്സരിക്കാന്‍ താത്പര്യപ്പെട്ടിരുന്ന തന്നെ പരിശീലകന്‍ നിര്‍ബന്ധിച്ച് മാരത്തണില്‍ മത്സരിപ്പിക്കുകയായിരുന്നുവെന്നും ജെയ്ഷ പറഞ്ഞിരുന്നു. ഇനി മാരത്തണിലേക്ക് ഇല്ലെന്നും 1500മീറ്ററില്‍ തന്നെ ശ്രദ്ധകേന്ദ്രീകരിക്കുമെന്നും ജെയ്ഷ വ്യക്തമാക്കി.

നേരത്തെ ജെയ്ഷ ഇന്ത്യന്‍ അധികൃതര്‍ക്കെതിരെ ശക്തമായ ആരോപണങ്ങളാണ് ഉന്നയിച്ചിരുന്നത്. തന്നെ അധികൃതര്‍ അവഗണിച്ചെന്നും മത്സര ശേഷം ആശുപത്രിയിലായ തന്നെ തിരിഞ്ഞു നോക്കിയില്ലെന്നും അവര്‍ ആരോപിച്ചിരുന്നു. എന്നാല്‍ സഹതാരമായിരുന്ന കവിതാ റൗത്ത് ജെയ്ഷയുടെ ആരോപണങ്ങള്‍ തള്ളിക്കളഞ്ഞിരുന്നു.

തുടര്‍ന്ന് പ്രതിരോധത്തിലായ താരം തന്റെ ആരോപണങ്ങള്‍ തിരുത്താന്‍ തയ്യാറാവുകയായിരുന്നു. ജെയ്ഷയുടെ ആരോപണത്തിന്റെ പശ്ചാത്തലത്തില്‍ കേന്ദ്ര കായിക മന്ത്രി വിജയ് ഗോയല്‍ അന്വേഷണസമിതിയെ നിയമിക്കുകയും ചെയ്തിരുന്നു.

ethopian olympic winner does’nt know where to go
Posted by
24 August

ഒളിംപിക് ജേതാവിനെ തൂക്കി കൊല്ലാന്‍ ഒരുങ്ങുന്നു

നെയ്‌റോബി: ഒളിംപിക്‌സ് മാരത്തോണില്‍ വെള്ളിമെഡല്‍ ജേതാവായ എതോപ്യന്‍ താരം ഫെയിസ ലിലെസ്സയെ സ്വന്തം രാജ്യത്ത് കാത്തിരിക്കുന്നത് വധശിക്ഷ. ഒളിംപിക്‌സ് വേദിയില്‍ എത്യോപ്യന്‍ ഭരണകൂടത്തിനെതിരായ ആംഗ്യം കാണിച്ചതിന്റെ പേരില്‍ തനിക്കിനി നാട്ടിലേക്ക് മടങ്ങാന്‍ സാധിക്കില്ലെന്നും മടങ്ങിയാല്‍ താന്‍ നേരിടേണ്ടി വരിക കടുത്ത തടവുശിക്ഷയോ വധശിക്ഷയോ ആവുമെന്നും ഫെയിസ ലിലെസ്സ അന്താരാഷ്ട്ര മാധ്യമങ്ങളോട് പ്രതികരിച്ചു.

2015 നവംബര്‍ മുതല്‍ എത്യോപ്യന്‍ ഭരണകൂടത്തിനു നേരെ ഒരോമ വിഭാഗം ജനങ്ങള്‍ പ്രക്ഷോഭം ആരംഭിച്ചിരുന്നു. കൃഷിയിടങ്ങളില്‍ നിന്നും കുടിയിറക്കപ്പെട്ടതിന്റെ പേരിലായിരുന്നു ഇത്. മാസങ്ങളായി പ്രതിഷേധം നടത്തിവരുന്ന പ്രക്ഷോഭകര്‍ക്ക് തന്റെ ചേഷ്ടകളിലൂടെ ഐക്യദാര്‍ഢ്യം പ്രഖ്യാപിച്ചതിന്റെ പേരിലാണ് താരം നിയമനടപടി നേരിടാന്‍ പോകുന്നത്. പ്രക്ഷോഭത്തെ തുടര്‍ന്ന് 400ഓളം പേരെ സൈന്യം കൊലപ്പെടുത്തിയിരുന്നു. നൂറുകണക്കിന് ആള്‍ക്കാരെ ഭരണകൂട വിരുദ്ധത ആരോപിച്ച് ജയിലിലടയ്ക്കുകയും ചെയ്തിട്ടുണ്ട്.

ഒളിംപിക്‌സ് മെഡല്‍ നേട്ടത്തിനു പിന്നാലെ കൈകള്‍ രണ്ടും നെഞ്ചിന് കുറുകെ എക്‌സ് ആകൃതിയില്‍ പ്രദര്‍ശിപ്പിച്ചാണ് ലോകത്തിന് മുന്നില്‍ ഒരോമ ജനതയ്ക്കുള്ള തന്റെ ഐക്യദാര്‍ഢ്യം ലിലെസ്സ തുറന്നുകാണിച്ചത്. ഇതിനെ ഭരണകൂട വിരുദ്ധമെന്നാണ് എത്യോപ്യ വിശകലനം ചെയ്യുന്നത്. പ്രക്ഷോഭകരും ഈ ആംഗ്യമാണ് പ്രതിഷേധത്തിന്റെ സൂചകമായി തെരഞ്ഞെടുത്തിരിക്കുന്നത്. അവാര്‍ഡ് ദാന ചടങ്ങിനിടയിലും ലിലെസ്സ ഇത്തരത്തില്‍ കാണിച്ചിരുന്നു.

sakshi malik appointed as ambassodor of beti bachavo beti padavo project
Posted by
24 August

സാക്ഷി നയിക്കും: ബേട്ടി ബച്ചാവൊ ബേട്ടി പഠാവൊ കാമ്പെയ്‌ന്റെ ബ്രാന്‍ഡ് അംബാസിഡറായി സാക്ഷി മാലിക്

ന്യൂഡല്‍ഹി: ബേട്ടി ബച്ചാവൊ ബേട്ടി പഠാവൊ കാമ്പെയ്‌ന്റെ ബ്രാന്‍ഡ് അംബാസിഡറായി റിയോ ഒളിമ്പിക്‌സിലെ മെഡല്‍ ജേതാവ് സാക്ഷി മാലിക്കിനെ നിയമിച്ചു. ഹരിയാനയുടെ സംസ്ഥാന കാമ്പെയ്‌ന്റെ ബ്രാന്‍ഡ് അംബാസിഡറായാണ് സാക്ഷിയെ നിയമിച്ചത്. സംസ്ഥാന ആരോഗ്യ, കായിക മന്ത്രി അനില്‍ വിജാണ് ഇക്കാര്യം പ്രഖ്യാപിച്ചത്. റിയോ ഒളിമ്പിക്‌സ് വനിതാ ഗുസ്തിയില്‍ വെങ്കല മെഡല്‍ നേടി ഇന്ത്യയുടെ അഭിമാനമായ സാക്ഷി ബുധനാഴ്ച്ച ന്യൂഡല്‍ഹിയില്‍ തിരിച്ചെത്തിയിരുന്നു

പുലര്‍ച്ചെ 3.50ന് ന്യൂഡല്‍ഹി ഇന്ദിരാ ഗാന്ധി വിമാനത്താവളത്തെലെത്തിയ സാക്ഷിയെ സ്വീകരിക്കാന്‍ ഹരിയാനയിലെ മന്ത്രിമാരായ കവിത ജെയ്ന്‍ റാവു നര്‍ബീര്‍ സിംഗ്, മനീഷ് ഗ്രോവര്‍ വിപുല്‍ ഗോയല്‍ എന്നിവര്‍ എത്തിയിരുന്നു. ഹരിയാണയിലെ ബഹുദൂര്‍ ഖണ്ഡിലെ സ്വീകരണ യോഗത്തില്‍ മുഖ്യമന്തി മനോഹര്‍ ലാല്‍ ഖട്ടര്‍ സാക്ഷിക്ക് രണ്ടര കോടി രൂപ സമ്മാനിക്കും. ഹരിയാനയില്‍ നിന്നും ഇന്ത്യയുടെ അഭിമാനമായി മാറിയ സാക്ഷിയെ മാതൃകയാക്കി കൂടുതല്‍ പെണ്‍കുട്ടികളെ മുന്‍നിരയിലെത്തിക്കാന്‍ കൂടിയാണ് ഇത്തരത്തിലൊരു ശ്രമം.

Athletic Federation of India denies OP Jaisha’s allegations
Posted by
23 August

ജെയ്ഷയോ കോച്ചോ കുടിവെള്ളം ആവശ്യപ്പെട്ടില്ല; ആവശ്യപ്പെട്ടാല്‍ മാത്രം വെള്ളം; ആരോപണങ്ങളോട് വിചിത്രമായി പ്രതികരിച്ച് അത്ലറ്റിക് ഫെഡറേഷന്‍ ഓഫ് ഇന്ത്യ

ന്യൂഡല്‍ഹി: റിയോ ഒളിംപിക്‌സില്‍ മാരത്തണ്‍ മത്സരത്തിനിടെ കുടിവെള്ളം പോലും ഇന്ത്യന്‍ അധികൃതര്‍ നല്‍കിയില്ലെന്ന അത്‌ലറ്റ് ഒപി ജെയ്ഷയുടെ ആരോപണങ്ങളോട് വിചിത്രമായി പ്രതികരിച്ച് അത്‌ലറ്റിക് ഫെഡറേഷന്‍ ഓഫ് ഇന്ത്യ. ഓട്ടത്തിനിടെ ജെയ്ഷയോ കോച്ചോ കുടിവെള്ളം ആവശ്യപ്പെട്ടില്ലെന്നും ആവശ്യപ്പെടാതെ വെള്ളം കൊടുക്കുന്ന പതിവില്ലെന്നും അത്ലറ്റിക് ഫെഡറേഷന്‍ വക്താവ് വിശദീകരിച്ചു. ജെയ്ഷയുടെ ആരോപണങ്ങള്‍ തെറ്റാണെന്നും അവര്‍ വെള്ളം ആവശ്യപ്പെടാത്തതുകൊണ്ടാണ് ലഭ്യമാക്കാതിരുന്നതെന്നും അത്‌ലറ്റിക് ഫെഡറേഷന്‍ വിശദീകരിക്കുന്നു.

എന്നാല്‍ താന്‍ ഒരിക്കലും വെള്ളം വേണ്ടെന്ന് പറഞ്ഞിട്ടില്ലെന്നും 42 കിലോമീറ്റര്‍ ഓടുന്ന ഒരു താരത്തിന് ആവശ്യമായ സംവിധാനങ്ങള്‍ ഒരുക്കേണ്ടത് അത്ലറ്റിക് ഫെഡറേഷന്റെ ഉത്തരവാദിത്തമാണെന്നും ജെയ്ഷ പ്രതികരിച്ചു. അതേസമയം 42 കിലോമീറ്ററിലധികം ദൂരം പൊരിവെയിലത്ത് നിര്‍ത്താതെ ഓടുന്ന താരം വെള്ളം ചോദിച്ചാല്‍ മാത്രമേ കൊടുക്കൂയെന്ന ഫെഡറേഷന്‍ വാദത്തിനെതിരെ രൂക്ഷ വിമര്‍ശനമാണ് ഉയരുന്നത്.

മറ്റു രാജ്യങ്ങള്‍ തങ്ങളുടെ കായികതാരങ്ങള്‍ക്ക് നിശ്ചിതമായ ഇടവേളകളില്‍ ഊര്‍ജ്ജപ്രദാനമായ ഭക്ഷ്യ വസ്തുക്കളും കുടിവെള്ളവും എത്തിച്ച് കൊടുക്കുമ്പോള്‍ ഇന്ത്യന്‍ ഒഫീഷ്യലുകള്‍ നില്‍ക്കേണ്ട സ്ഥലത്ത് രാജ്യത്തിന്റെ പതാക മാത്രമായിരുന്നു ഉണ്ടായിരുന്നതെന്നും ജലം വെള്ളമോ ഗ്ലൂക്കോസോ ബിസ്‌കറ്റ് അടക്കമുള്ള ലഘുഭക്ഷണമോ നല്‍കാന്‍ ഇന്ത്യന്‍ ഒഫീഷ്യലുകള്‍ തയ്യാറായില്ലെന്നും ഇന്നലെ ജെയ്ഷ ആരോപിച്ചിരുന്നു.

മാരത്തണ്‍ മത്സരത്തില്‍ ഒളിംപിക് കമ്മിറ്റി നല്‍കുന്ന വെള്ളത്തെ മാത്രം ആശ്രയിച്ച് 42.195 കിലോമീറ്റര്‍ ദൂരം ഓടിത്തീര്‍ത്ത ജെയ്ഷ, താന്‍ എങ്ങനെയാണ് ഫിനിഷിങ് ലൈന്‍ വരെ എത്തിയതെന്ന് തനിക്ക് തന്നെ അറിയില്ലെന്നാണ് അഭിപ്രായപ്പെട്ടത്. ഓട്ടം പൂര്‍ത്തിയാക്കിയ താരം ഫിനിഷ് ലൈനില്‍ തളര്‍ന്നു വീഴുകയായിരുന്നു. ഏഴു കുപ്പി ഡ്രിപ്പ് കയറ്റിയ ശേഷം മൂന്നു മണിക്കൂര്‍ കഴിഞ്ഞാണ് ജെയ്ഷയ്ക്ക് ബോധം തെളിഞ്ഞതെന്നും റിപ്പോട്ടുകളുണ്ട്. കൂടാതെ ഫിനിഷിങ് ലൈനില്‍ വീണു പോയ താരത്തിനെ ശുശ്രൂഷിക്കാന്‍ ഇന്ത്യന്‍ സംഘത്തിന്റെ കൂടെയുള്ള ഡോക്ടര്‍മാര്‍ എത്താന്‍ വൈകിയെന്നും ആരോപണം ഉയര്‍ന്നിട്ടുണ്ട്.

”ഞാന്‍ തളര്‍ന്നു വീണതു കണ്ട് കോച്ച് തന്റെ അടുത്ത് വന്നു നോക്കിയപ്പോള്‍ എന്റെ ശരീരത്തില്‍ പള്‍സ് പോലും ഇല്ലായിരുന്നു. ശരിക്കും ഞാന്‍ മരിച്ചു പോയെന്നാണ് അദ്ദേഹം കരുതിയത്. അങ്ങനെ തന്നെയാണ് അദ്ദേഹം ഒളിംപിക്സ് വില്ലേജില്‍ പോയി പറഞ്ഞതും” ജെയ്ഷ തന്റെ മത്സരദിനം ഓര്‍ത്തെടുക്കുന്നത് ഇങ്ങനെയാണ്.

അതേസമയം, ജെയ്ഷയുടെ ആരോപണങ്ങള്‍ മുഴുവന്‍ അടിസ്ഥാനരഹിതമാണെന്നും എനര്‍ജി ഡ്രിങ്ക് ജെയ്ഷയും കോച്ചും വേണ്ടെന്നുവയ്ക്കുകയായിരുന്നുവെന്നും ഫെഡറേഷന്‍ വാര്‍ത്താക്കുറിപ്പില്‍ വിശദീകരിച്ചു. ജെയ്ഷയുടെ കൂടെ ഓടിയ താരങ്ങള്‍ക്ക് വെള്ളെ എത്തിച്ചിരുന്നുവെന്നും ആവശ്യമായ വൈദ്യസഹായം ലഭ്യമാക്കുന്നതില്‍ സംഘാടകര്‍ ഒരു വീഴ്ചയും വരുത്തിയിട്ടില്ലെന്നും അത്ലറ്റിക് ഫെഡറേഷന്‍ അറിയിച്ചു. അത്‌ലറ്റിക് ഫെഡറേഷന്റെ വാദങ്ങള്‍ അംഗീകരിച്ചുകൊണ്ട് അത്‌ലറ്റ് കവിതയും രംഗത്തു വന്നിട്ടുണ്ട്.

Athlete OP Jaisha against Indian Olympic team officials
Posted by
22 August

വെള്ളമില്ലാതെ ഒരാള്‍ക്ക് എത്ര കിലോമീറ്റര്‍ ഓടാന്‍ സാധിക്കും; ഒരു തുള്ളി വെള്ളം പോലും ഇന്ത്യന്‍ ഉദ്യോഗസ്ഥര്‍ എത്തിച്ചില്ല; ഒളിംപിക്‌സില്‍ 42.195 കിലോമീറ്റര്‍ ഓടിതീര്‍ത്ത ഒപി ജെയ്ഷ തുറന്നടിക്കുന്നു

ബംഗളൂരു: കഴിവുറ്റ താരങ്ങള്‍ ഉണ്ടായിട്ടും ഒളിംപിക്‌സില്‍ മികച്ച പ്രകടനം കാഴ്ചവെക്കാന്‍ ഇന്ത്യക്ക് സാധിക്കാതെ പോകുന്നത് ഇന്ത്യന്‍ ഒഫീഷ്യലുകളുടെ അനാസ്ഥമൂലമാണെന്ന് തുറന്ന് കാണിച്ച് അത്‌ലറ്റ് ഒപി ജെയ്ഷ രംഗത്ത്. റിയോയില്‍ ഇന്ത്യയെ പ്രതിനിധീകരിച്ച് മാരത്തണ്‍ മത്സരത്തില്‍ 42.195 കിലോമീറ്റര്‍ ഓടിത്തീര്‍ത്ത ഒപി ജെയ്ഷ പറയുന്നു ആവശ്യത്തിന് വെള്ളം പോലും ലഭിക്കാതെയാണ് താന്‍ ആ ദൂരമത്രയും ഓടിത്തീര്‍ത്തതെന്ന്.

”എല്ലാ 2.5 കിലോ മീറ്റര്‍ പിന്നിടുമ്പോഴും വെള്ളവും മറ്റ് ഊര്‍ജ്ജ പ്രദാന വസ്തുക്കളുമായി മത്സരാര്‍ഥികള്‍ക്ക് പിന്തുണ നല്‍കാന്‍ എല്ലാ രാജ്യങ്ങളുടെ ഉദ്യോഗസ്ഥരും നിശ്ചിത സ്ഥലങ്ങളില്‍ ഉണ്ടായിരുന്നു. എന്നാല്‍ ഇന്ത്യയുടെ പേരിനും പതാകയ്ക്കും സമീപത്ത് ആരും തന്നെ ഉണ്ടായിരുന്നില്ല” ദേശീയ റെക്കോര്‍ഡിനുടമയായ ഒ പി ജെയ്ഷ പറയുന്നു.

മത്സരത്തിന്റെ അവസാനം കുഴഞ്ഞു വീണ ജെയ്ഷ പിന്നീട് 2-3 മണിക്കൂറുകള്‍ക്കു ശേഷം ഏഴുകുപ്പിയോളം ഗ്ലൂക്കോസ് കുത്തിവച്ചതിനു ശേഷമാണ് ബോധം വീണ്ടെടുത്തത്. ശനിയാഴ്ച തിരിച്ചെത്തിയ ജെയ്ഷയോട് സായിയിലെ ഡോക്ടര്‍മാര്‍ ആശുപത്രിയില്‍ അഡ്മിറ്റാകാന്‍ നിര്‍ദ്ദേശം നല്‍കിയിരുന്നുവെങ്കിലും താരം അത് നിരസിക്കുകയായിരുന്നു. ആയുര്‍വേദ ചികിത്സ ചെയ്യാനാണ് ജെയ്ഷയുടെ തീരുമാനം.

”വെള്ളമില്ലാതെ ഒരാള്‍ക്ക് എത്ര കിലോമീറ്റര്‍ ഓടാന്‍ സാധിക്കും, എനിക്ക് എങ്ങനെയാണ് വെള്ളമില്ലാതെ മത്സരം പൂര്‍ത്തിയാക്കിയത് എന്ന് ഇപ്പോഴും അറിയില്ല. എല്ലാ 8 കിലോമീറ്റര്‍ ഇടവേളകളിലും റിയോ സംഘാടകര്‍ വെള്ളവും സ്പോഞ്ചും നല്‍കിയിരുന്നെങ്കിലും കഷ്ടിച്ച് 500 മീറ്റര്‍ ഓടാന്‍ മാത്രമേ അത് ഊര്‍ജ്ജം പകരുമായിരുന്നുള്ളു. കത്തുന്ന സൂര്യന് കീഴില്‍ 30 കീലോ മീറ്ററിന് ശേഷമുള്ള ഓട്ടം അതികഠിനമായിരുന്നു”, 2 മണിക്കൂറും 47 മിനിറ്റും 19 സെക്കന്റും കൊണ്ട് മത്സരം പൂര്‍ത്തിയാക്കിയ ജെയ്ഷ വ്യക്തമാക്കുന്നു. ഇന്ത്യന്‍ ഉദ്യോഗസ്ഥരുടെ അനാസ്ഥ കാരണമാണ് വനിത വിഭാഗം മാരത്തണില്‍ ഇന്ത്യന്‍ താരങ്ങള്‍ക്ക് വെള്ളമില്ലാതെ മത്സരിക്കേണ്ടി വന്നതെന്നും ജെയ്ഷ ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ തുറന്നടിച്ചു. കഴിഞ്ഞ ബീജിംഗ് ലോക ചാമ്പ്യന്‍ഷിപ്പില്‍ 2 മണിക്കൂറും 34 മിനിറ്റും 43 സെക്കന്റും കൊണ്ടാണ് ജെയ്ഷ മാരത്തണ്‍ പൂര്‍ത്തിയാക്കിയിരുന്നത്.

നിര്‍ജലീകരണം മൂലം വീണു പോയ ജെയ്ഷ തളര്‍ന്നു കൊണ്ടിരിക്കുന്ന ഇന്ത്യന്‍ അത്‌ലറ്റിക്‌സിന്റെ പ്രതീകമാണ്. ഐഎഎഎഫി ന്റെ നിയമങ്ങള്‍ പ്രകാരം ഒരു രാജ്യത്തിന് നാല് ഉദ്യോഗസ്ഥരെ വരെ മാരത്തണ്‍ അത്ലറ്റുകളുടെ പിന്തുണയ്ക്കായി നിര്‍ത്താം. കോച്ചിന്റെയും ഫെഡറേഷന്റെയും നിര്‍ദ്ദേശപ്രകാരമാണ് ഉദ്യോഗസ്ഥരെ പിന്തുണയ്ക്ക് വേണ്ടി നിയമിക്കുന്നത്. എന്നാല്‍ ഇന്ത്യയുടെ ഭാഗത്തു നിന്നും അത്‌ലറ്റുകളെ പിന്തുണക്കുന്ന നടപടികള്‍ ഉണ്ടായില്ലെന്ന് ആരോപണങ്ങള്‍ സൂചിപ്പിക്കുന്നു.

rio olympics 2016 closing ceremony
Posted by
22 August

ബൈ ബൈ റിയോ... ഇനി ടോക്കിയോയില്‍

റിയോ ഡി ജനീറോ: മുപ്പത്തിയൊന്നാം ഒളിംപിക്‌സിന് റിയോ മരക്കാന സ്റ്റേഡിയത്തില്‍ വര്‍ണാഭമായ സമാപനം. സ്‌നേഹത്തിന്റെയും സൗഹൃദത്തിന്റെയും സന്ദേശങ്ങള്‍ നിറഞ്ഞ റിയോ ഒളിംപിക്‌സ് പതിനാറു ദിവസങ്ങള്‍ക്ക് ശേഷം അതിന്റെ അവസാനത്തിലേക്ക് എത്തുമ്പോള്‍ ലോകം ഇനി ഉറ്റുനോക്കുന്നത് ടോക്കിയോയിലേക്ക്.

rio-4വിശ്വകായിക കിരീടം നിലനിര്‍ത്തി അമേരിക്ക. 46 സ്വര്‍ണ്ണം, 37 വെള്ളിയും 38 വെങ്കലവുമാണ് അമേരിക്ക സ്വന്തമാക്കിയത്. ബ്രിട്ടനാണ് രണ്ടാമത് 27 സ്വര്‍ണവും 23 വെള്ളിയും 17 വെങ്കലവുമാണ് ബ്രിട്ടന്‍ നേടിയത്. 26 സ്വര്‍ണവും 18 വെള്ളിയും 26 വെങ്കലവുമായി ചൈന മൂന്നാമതാണ്. ഒരു വെള്ളിയും ഒരു വെങ്കലവുമുള്ള ഇന്ത്യക്ക് 67ആം സ്ഥാനമാണ്. ബ്രസീല്‍ പതിമൂന്നാമതാണ്.
rio1
ചാമ്പ്യന്മാരായ അമേരിക്ക മറ്റൊരു സ്വപ്നനേട്ടം കൂടി റിയോയില്‍ യാഥാര്‍ഥ്യമാക്കി. ഒളിംപിക്‌സ് ചരിത്രത്തില്‍ അമേരിക്കയുടെ മെഡല്‍ സമ്പാദ്യം 1000 കടന്നു. 1020 മെഡലുകളാണ് അമേരിക്കയുടെ ക്രെഡിറ്റിലുള്ളത്. മൈക്കല്‍ ഫെല്‍പ്‌സും കാത്തി ലെഡക്കിയും സിമോണ്‍ ബിലെസും റയാന്‍ മര്‍ഫിയും ഒത്തുപിടിച്ചതോടെ 46 സ്വര്‍ണവും 37 വെള്ളിയും 38 വെങ്കലവും അമേരിക്കയുടെ കൂടെപ്പോന്നു. 121 മെഡലുകള്‍. അത്ലറ്റിക്‌സിലും സ്വിമ്മിങ്ങിലും ജിംനാസ്റ്റിക്‌സിലുമാണ് അമേരിക്ക ഏറ്റവുമധികം മെഡലുകള്‍ വാരിക്കൂട്ടിയത്.
rio-2
ബ്രസീലിന്റെ സാംസ്‌കാരിക തനിമ വ്യക്തമാക്കി മൂന്ന് മണിക്കൂര്‍ നീണ്ട സമാപന ചടങ്ങോടെ റിയോ ഒളിംപിക്‌സ് കൊടിയിറങ്ങി. ഒളിംപിക് പതാക ടോക്കിയോ ഗവര്‍ണര്‍ ഏറ്റുവാങ്ങി. അടുത്ത ഒളിംപിക്‌സ് 20-20ല്‍ ജാപ്പനീസ് നഗരത്തിലാണ്.

rio-3

olympics little masters
Posted by
21 August

ഇവരെ സൂക്ഷിക്കുക: കൊച്ചു വിരുതരുടെ കായികപ്രകടനങ്ങളുടെ വീഡിയോ വൈറലാകുന്നു

റിയോ: ഒളിമ്പിക്‌സില്‍ വിജയ കിരീടം ചൂടിയവര്‍ ഇനി ഒന്നു സൂക്ഷിക്കണം. അത്യുഗ്രന്‍ പ്രകടനവുമായി കൊച്ചുവിരുതന്മാര്‍ എല്ലാരെയും ഞെട്ടിക്കുകയാണ്. 2032ലെ ലോകചാമ്പ്യന്മാര്‍ ഇവരായിരിക്കുമെന്ന് പ്രവചിക്കുന്ന വീഡിയോ പുറത്തിറങ്ങി 6 ദിവസത്തിനകം നാലരകോടിയോളം ആളുകളാണ് കണ്ടുകഴിഞ്ഞിരിക്കുന്നത്.

രണ്ടോ മൂന്നോ വയസില്‍ തുടങ്ങുന്ന പരിശീലനമാണ് ഓരോ ലോകചാമ്പ്യനേയും സൃഷ്ടിക്കുന്നത്. ഈ പ്രായത്തില്‍ തന്നെ ഇത്തരത്തിലുള്ള പ്രകടനം കാഴ്ച വെക്കുന്ന ഇന്നത്തെ കുട്ടികള്‍, മത്സരിക്കാന്‍ പ്രായമാകുമ്പോഴേക്കും എത്രമാത്രം മികച്ച പ്രകടനമായിരിക്കും നടത്തുകയെന്നും വീഡിയോ ചോദിക്കുന്നു.

ജിംനാസ്റ്റിക്കിലും, മുഹമ്മദലിയെ തോല്‍പ്പിക്കുന്ന ബോക്‌സിംഗിലുമെല്ലാം കാണുന്നത് ഇവരുടെ ഈ മികവ് തന്നെയാണ്. ഫാദര്‍ലി എന്ന ഫെയ്‌സ്ബുക്ക് പോജാണ് വീഡിയോ ഫെയ്‌സ്ബുക്കിലിട്ടത്. റിയോ ആവേശത്തില്‍ ലോകമാകെയുള്ള രക്ഷിതാക്കള്‍ തങ്ങളുടെ മക്കള്‍ക്കും ഇത്തരത്തിലുള്ള കായിക പരിശീലനങ്ങള്‍ ചെറുപ്പത്തിലേ ഒരുക്കി നല്‍കുമെന്ന് പ്രഖ്യാപിച്ച് രംഗത്തെത്തിയിട്ടുണ്ട്.

മെഡല്‍ ക്ഷാമത്തെക്കുറിച്ചുള്ള ഇന്ത്യന്‍ ചര്‍ച്ചകളിലാകെ ഉയരുന്നതും ചെറുപ്പത്തിലുള്ള കായിക പരിശീലനത്തിന്റെ കുറവിനെക്കുറിച്ച് തന്നെയായിരുന്നു. കായികക്ഷമതയും, ആരോഗ്യവുമുള്ള ഒരു തലമുറയുടെ സൃഷ്ടിക്ക് ലോകത്തിന് പ്രചോദനമാകുകയാണ് ഈ കുഞ്ഞുമിടുക്കന്മാര്‍.